Hanyuma y’akasumi, Abaisareri bali omu irungu, Kora, Dasani, Abiramu n’abandi 250 bakajemera Musa. Bakamugambira ngu: ‘Iwe tukujwahire! Tosemeriire kutwebembera kandi Aroni nauwe tasemeriire kuba nyakatagara omukuru. Yahwe ali hamu naitwe itwena hatali iwe na Aroni inywenka.’ Eki kitasemeze Yahwe. Akabarora nk’abajemiire uwe wenyini!

Musa akagambira Kora n’abaali nibamusagika ngu: ‘Mwije ha heema nyenkya, kandi buli muntu aije n’ekiswa kye akitaireho emyamirro. Yahwe naija kutwoleka owakomere.’

Ekiro ekyahondiireho, Kora hamu n’abasaija 250 bakagenda hali Musa ha heema. Bakatandika kwokya emyamirro kandi kunu batali banyakatagara. Yahwe akagambira Musa na Aroni ati: ‘Mwecweho Kora n’abasaija be.’

Nobukiraaba ngu Kora akagenda hali Musa ha heema ya Yahwe, Dasani, Abiramu, n’ab’amaka gabo bakanga kugyayo. Yahwe akaragira Abaisareri kwirra hara n’eheema za Kora, Dasani hamu na Abiramu ezi baikaramuga. Aho n’aho, Abaisareri bakabairra hara. Dasani, Abiramu, bayemerra hamu  n’ab’amaka gabo aheru y’eheema zabo. Aho n’aho itaka likatikamu kabiri kandi ensi yabamira! Kandi Kora n’abasaija 250 abakaba bali ha heema ya Yahwe, omurro gukaruga omu iguru gwabokya boona bafa.

Yahwe akagambira Musa ati: ‘Tunga omwigo kuruga hali buli mukuru w’oruganda, kandi ohandikeho ibara lye. Baitu ha mwigo gw’oruganda rwa Levi, ohandikeho ibara lya Aroni. Hanyuma, yoona giteeke omu heema, kandi omwigo gw’omusaija ou ndakoma nigwija kwakya ebyakyo.’

Ekiro ekyayongireho, Musa akaleta emiigo yoona aheru kandi yagyoleka abakuru b’enganda. Omwigo gw’Aroni gukaba gwakize ebyakyo, kandi gukaba gwanire amalozi agengere. Omu mulingo gunu, Yahwe akaboleka ngu akaba akomere Aroni kuba nyakatagara omukuru.