Petero ey’Okubanza 5:1-14
5 Nahabweki, nk’omugurusi mutaahi waanyu, kaiso w’okubonabona kwa Kristo kandi ow’arukwija kubagana ha kitiinisa ekiraayolekwa, ninteererra* abagurusi abali omuli inywe nti:
2 Muliise igana lya Ruhanga eri mwakwasiibwe, obu nimuheereza nk’abaroleerezi* hatali habw’okuhambirizibwa, baitu mwegondiize omu maiso ga Ruhanga; hatali habw’okugonza kwetungira ebintu, baitu habw’okugonza kuheereza;*
3 hatali kulemesa ikama abo abali bugwetwa bwa Ruhanga, baitu mube kyokurorraho hali igana.
4 Kandi omuliisa omukuru obu alyolekwa, mulitunga ekondo ey’ekitiinisa ey’etarukucucuka.
5 Omu mulingo nugwo gumu, inywe abasigazi mworobere abasaija abakuru.* Baitu inywena mujwale* obwebundaazi obu murukuba nimukoragana n’abandi, habwokuba Ruhanga ahakaniza ab’emyehembo, baitu ayoleka abeebundaazi embabazi enyingi muno.*
6 Nahabweki, mwebundaaze hansi y’omukono gwa Ruhanga ogw’amaani, nukwo asobole kubanyumiza omu kasumi akahikire,
7 obu nimumunagira okutuntura* kwanyu kwona, habwokuba naabafaaho.
8 Mwikale nimuteekereza kurungi kandi muli bulindaara. Omunyanzigwa waanyu, Sitaani,* naagendagenda nk’entale erukububura, naaserra ow’araalya.
9 Mumwangirre, mugumire omu kwikiriza, mukimanyire ngu ab’oruganda omu nsi yoona* nibahikwaho okubonabona nukwo kumu.
10 Baitu obu mulimara kubonabona habw’akacu kake, Ruhanga anyakwijwire embabazi enyingi muno, ayabeesere hali ekitiinisa kye eky’ebiro n’ebiro muli omu bumu na Kristo, naija kumaliiriza okutendekwa kwanyu. Alibagumya, abafoole b’amaani, alibata ha musingi ogugumire.
11 Ogu abe n’amaani ebiro n’ebiro. Amiina.
12 Kuraba omu Sirwano* ou ndukutwara kuba ow’oruganda omwesigwa, mbahandiikiire n’ebigambo binu ebike nukwo nsobole kubagarramu amaani n’okubaha obwakaiso obugumire ngu zinu nizo embabazi za Ruhanga enyingi muno ez’amananu. Muziikalemu mugumire.
13 Omukazi ow’ali Bbabburooni, ayakomerwemu nka inywe, naabaramukya hamu na Marako omwana wange.
14 Muramukyangane n’okunywegera okw’okugonza.
Obusinge bube na inywe inywena abali omu bumu na Kristo.
Obugambo Obuli Hansi
^ Rundi, “ninyesengereza.”
^ Rundi, “nimulirinda n’obwegendereza.”
^ Rundi, “mwine ekihika.”
^ Rundi, “abagurusi.”
^ Rundi, “mweteege.”
^ Rora, Kusoborra Ebigambo.
^ Rundi, “okweraliikirra.”
^ Nkooku kiri, “Diabolo,” ekirukumanyisa “omuhangirizi.” Rora, Kusoborra Ebigambo; “Diabolo.”
^ Nkooku kiri, “oruganda rwanyu.”
^ Kandi arukwetwa Siira.
