Petero ey’Okubanza 2:1-25
2 Hati mweiheho ebikorwa byona ebibi, kubaza ebisuba, obugobya, ihali, n’okugeyangana okwa buli mulingo.
2 Nk’abaana enkerembe abaakazaarwa, mukurakuranize okwegomba amata agatatabwirwemu kintu kyona ag’ekigambo kya Ruhanga, nukwo kuraba omuli go, musobole kukura kuhika ha kujunwa,
3 habwokuba muba muroleze ngu Mukama waitu w’embabazi.
4 Obu mwija nambere ali, ibaale eryomeezi eryayangirwe abantu, baitu lyakomwa Ruhanga kandi ry’omuhendo hali uwe,
5 inywe inywenka amabaale agoomeezi nimwija kwombekwamu enju ey’eby’omwoyo nukwo musobole kuba banyakatagara abarukwera, abarukuhayo ebihongwa eby’omwoyo ebirukwikirizibwa Ruhanga kuraba omuli Yesu Kristo.
6 Habwokuba Ekyahandiikirwe kigamba kiti: “Dora! Nimbyara omu Sayuni* ibaale erikomerwemu, ery’omusingi erya ha nsonda kandi ery’omuhendo kandi busaho n’omu arukuliikiririzaamu, aliswara.”
7 Nahabweki, hali inywe w’omuhendo habwokuba muli baikiriza; baitu hali abo abatali baikiriza, “ibaale abombeki eri baayangire, niryo lifookere ibaale erikuru erya ha nsonda”*
8 kandi “ibaale erirukutabaijura n’omwandara ogurugirraho kugwa.” Nibatabaijuka habwokuba tibarukworobera ekigambo. Kandi enu niyo empero ey’ebalindiriire.
9 Baitu inywe muli “bantu abakomerwemu, abarukuheereza nka banyakatagara, kandi abakama, ihanga erirukwera, abantu ba Ruhanga ab’embaganiza, nukwo musobole kurangirra oburungi* bw’Ogu ayabeesere kuruga omu mwirima, kwija omu kyererezi kye ekirukuhuniiriza.
10 Habwokuba mukaba mutali bantu ba Ruhanga, baitu hati muli bantu be, mukaba mutarukwolekwa embabazi, baitu hati, mwolekerwe embabazi.
11 Abagonzebwa, nimbateererra nk’abanyamahanga kandi abaikazi ab’akacu kake, kwikara nimwetantara okwegomba okw’omubiri okurukubarwanisa.
12 Mwikalege mwine engeso enungi omu bamahanga, nukwo obu baraabajunaana ngu muli nkozi z’ebibi, basobole kurora ebikorwa byanyu ebirungi, kibaleetere kukugiza Ruhanga ha kiro eky’okurambura kwe.
13 Habwa Mukama waitu, mworoberege abo boona abaine obusobozi abatairweho abantu, k’abe omukama arukukira obusobozi
14 rundi abalemi, muboorobere habwokuba aba abatumire kufubira enkozi z’ebibi, baitu kuhaisaniza abo abakora ebirungi.
15 Habwokuba Ruhanga agonza mukole ebirungi, nukwo musobole kuculeeza abo* abarukubaza ebi batamanyire kandi abatarukwetegereza.
16 Mube bantu ab’obugabe, baitu obugabe bwanyu mutabukozesa nk’eky’okwekwasa* kukora ebibi, baitu mubukozese nk’abairu ba Ruhanga.
17 Mutemuga ekitiinisa abantu aba buli mulingo, mugonzeege ab’oruganda boona,* mutiine Ruhanga, kandi mutemu omukama ekitiinisa.
18 Leka abairu booroberege bakama baabo, nibabatiina nkooku kisemeriire, hatali abarungi n’abatagumangaine bonka, baitu n’abo abagumire kusemeza.
19 Habwokuba nikiikirizibwa omuntu kugumira emitalibaine* n’okubonabona habw’obutali bwinganiza habw’okugonza kuba n’omuntu ow’omunda omurungi omu maiso ga Ruhanga.
20 Kirungi ki ekiri omu kugumiisiriza obu muteerwa habw’okusiisa? Baitu obu mugumiisiriza okubonabona habw’okukora ebintu ebirungi, Ruhanga akisiima.
21 Amananu gali, kinu nikyo mwayetiirwe, habwokuba na Kristo akabonabona habwanyu, yabasigira ekyokurorraho nukwo musobole kurubatira omu bigere bye.
22 Atakole kibi kyona, kandi omu kanwa ke hatasangwemu ebisuba.
23 Obu yajumirwe, uwe atajume. Obu akaba naabonabonesebwa, atatiinisirize, baitu okunihira kwe akakuta omuli Ogu ow’acwa emisango omu kuhikirra.
24 Uwe weenyini akeetweka ebibi byaitu omu mubiri gwe ha muti,* nukwo tusobole kwihwaho ebibi, tube boomeezi kandi tusobole kukora eby’okuhikirra. Kandi “habw’ebihuta bye, mukakizibwa.”
25 Habwokuba mukaba muli nk’entaama ezihabire, baitu hati mugarukire hali omuliisa kandi omuroleerezi w’obwomeezi bwanyu.
Obugambo Obuli Hansi
^ Rora, Kusoborra Ebigambo.
^ Nkooku kiri, “ery’omutwe gw’ensonda.”
^ Ekirukumanyisa, emiringo enungi muno n’ebikorwa bye ebirungi.
^ Nkooku kiri, “kuboha eminwa y’abo.”
^ Rundi, “nk’eky’okuswekerra.”
^ Nkooku kiri, “oruganda rwona.”
^ Rundi, “okuganya; obusaasi.”
^ Rora, Kusoborra Ebigambo; “Omuti.”
