Petero ey’Okubanza 3:1-22
3 Omu mulingo nugwo gumu, inywe abakazi, mworoberege baibainywe, nukwo obu haraaba haroho abatarukworobera ekigambo, basobole kusingurwa hataroho kigambo habw’engeso ez’abakazi baabo,
2 habwokuba baba beeroliire bonka engeso zanyu enungi n’ekitiinisa ekingi eki mubatamu.
3 Oburungi bwanyu buleke kuba obwa haruguru honka—okusiba isoke n’okujwara ebikozerwe omu zaabbu rundi engoye enungi,*
4 baitu leka bubege obw’omuntu ow’omu nsita ow’omu mutima, ow’ajwaire ekijwaro ekitasobora kusiisikara eky’omwoyo oguteekaine kandi omuculeezi, ogw’omuhendo muno omu maiso ga Ruhanga.
5 Habwokuba abakazi abarukwera aba ira abaanihirraga omuli Ruhanga nukwo baayecumaga bati niboorobera baibabo,
6 nka Saara oku yayorobiire Ibburahimu naamweta mukama we. Kandi mufooka baana ba Saara, obu mugumizaamu nimukora ebirungi kandi mukanga kwikiriza ekintu kyona kubatiinisa.
7 Na inywe abasaija, mugumizeemu nimwikara n’abakazi banyu nimubeetegereza kurungi.* Mubatemu ekitiinisa nk’ebibindi ebiceke, habwokuba na bo bagwetwa hamu na inywe ab’embabazi enyingi muno* ez’obwomeezi, nukwo esaara zanyu zitangwa kuhulirwa.
8 Eky’okumalirra, inywena mube n’enteekereza emu, musaalirirwangane, mugonzangane nk’ab’oruganda, mugirrangane embabazi kandi mube abeebundaazi.
9 Mutakora kubi omuntu ngu habwokuba abakozere kubi rundi mutajuma ogu anyakubajuma. Baitu mumukorre ebirungi,* habwokuba eki nikyo mwayetiirwe omu muhanda gunu, nukwo musobole kutunga omugisa.
10 “Ogu weena arukugonza obwomeezi n’okurora ebiro ebirungi* alinde orulimi rwe hali ebintu ebibi n’omunwa gwe kutabaza ebisuba.
11 Ayetantale kukora ebibi baitu akole ebirungi; leka aserre obusinge kandi abuhondere.
12 Habwokuba amaiso ga Yahwe* gali h’abahikiriire, n’amatu ge gahuliiriza okwesengereza kwabo, baitu Yahwe* anoba* abo abakora ebintu ebibi.
13 Mali nooha araabakora kubi obu muraaba nimwekamba kukora ebirungi?
14 Noobu mwakubonabona habw’okuhikirra, mwine okusemererwa. Baitu mutatiina eki barukutiina,* noobu kwakuba okwetuntura.
15 Baitu omu mitima yanyu mweze Kristo nka Mukama waanyu, mweteekaniize butoosa kugarukamu ogu arukubakaguza ebirukukwata ha kunihira kwanyu, baitu mukikole muteekaine kandi nimumutamu ekitiinisa kingi.
16 Mwikale mwine omuntu ow’omunda omurungi, nukwo obu baraababazaaho kubi omu mulingo gwona, abo abarukubabazaaho kubi baswale habw’engeso zanyu enungi nk’abahondezi ba Kristo.
17 Habwokuba kirungi kubonabona habw’okukora ebintu ebirungi, Ruhanga obu arukuba akiikiriize, kukira kubonabona habw’okukora ebintu ebibi.
18 Kristo na uwe akafa omurundi gumu yamara habw’ebibi, omuntu ow’ahikiriire kufeera abatahikiriire, nukwo asobole kubahikya hali Ruhanga. Akaitwa omu mubiri, yafoorwa mwomeezi omu mwoyo.
19 Kandi ali omu nyikara egi, akagenda yatebeza emyoyo enyakuli omu nkomo
20 eyajeemere ira, Ruhanga obu akaba alindiriire n’okugumiisiriza* omu kasumi ka Nuha, eryato obu likaba niryombekwa, nambere abantu bake, kandi abo nubo abantu munaana abaajunirwe kutaitwa amaizi.
21 Kinu nitusobora kukirengesaniza n’okubatizibwa okurukubajuna hati (tikiri eky’okubaihaho iko, baitu kusaba hali Ruhanga mube n’omuntu ow’omunda omurungi), kuraba omu kuhumbuuka kwa Yesu Kristo.
22 Ali ha mukono gw’obulyo ogwa Ruhanga, habwokuba akagenda omu iguru, kandi bamalaika, obusobozi, n’amaani byateekwa hansi ye.
Obugambo Obuli Hansi
^ Rundi, “engoye eza sente nyingi.”
^ Rundi, “nimubafaaho; mubamanyire.”
^ Rora, Kusoborra Ebigambo; “Embabazi enyingi muno.”
^ Nkooku kiri, “mumuhe omugisa.”
^ Rundi, “n’okusemererwa.”
^ Rora, Ebyong. A5.
^ Rora, Ebyong. A5.
^ Nkooku kiri, “obuso bwa Yahwe bukimba.”
^ Rundi nikisobora kuhindurwa, “mutatiina okutiinisiriza kwabo.”
^ Nkooku kiri, “okugumiisiriza kwa Ruhanga kukaba kulindiriire.”
