Petero ey’Okubanza 1:1-25
1 Nyowe Petero omukwenda wa Yesu Kristo, nimpandiikira abaikazi ab’akacu kake, abaararangiire omu Ponto, Garatiya, Kapadokiya, Asiya, na Bituniya, na hali abakomerwemu
2 nkooku Ruhanga Isiitwe yakimanyire kara, n’okwezebwa kuraba omu mwoyo habw’ekigendererwa eky’okuba bahulizi n’okumiisirwaho esagama ya Yesu Kristo:
Leka embabazi enyingi muno* hamu n’obusinge bibongerweho.
3 Akugizibwe Ruhanga kandi Ise Mukama waitu Yesu Kristo, habw’okuganyira kwe okwingi akatuleetera kuzaarwa buhyaka, twatunga okunihira okwomeezi kuraba omu kuhumbuuka kwa Yesu Kristo kuruga omu bafu,
4 hali obugwetwa obutahwaho, obutasiisikara, kandi obutacucuka. Kandi inywe bubaahuliirwe omu iguru,
5 abarukulindwa amaani ga Ruhanga kuraba omu kwikiriza, nukwo mutunge okujunwa okuteekaniziibwe kwolekwa omu kasumi ak’okumalirra.
6 Eki nikibasemeza muno, noobu kiraaba ngu hati ky’akacu kake, nikibeetaagisa kutuntuzibwa ebirengo ebirukwahukana;
7 nukwo okwikiriza kwanyu okulengerwe okw’omuhendo omwingi kukira ezaabbu erukuhwaho, noobu kiraaba ngu erengerwe* omu murro, kusobole kubaleetera kukugizibwa, kunyumizibwa hamu n’ekitiinisa ha kwolekwa kwa Yesu Kristo.
8 Noobu kiraaba ngu mutamurole, nimumugonza. Noobu kiraaba ngu timurukumurora hati, nimumwikiririzaamu kandi mwijwire okusemererwa okutagambwa kandi okwingi muno,
9 obu nimutunga ekigendererwa eky’okwikiriza kwanyu, kandi oku nukwo okujunwa kwanyu.*
10 Banabbi abaarangire ebirukukwata ha mbabazi enyingi muno ezibasemeriire, bakakaguliiriza muno kandi baaseruliiriza n’obwegendereza ebirukukwata ha kujunwa kunu.
11 Bakaikara nibaseruliiriza obwire bwonyini rundi akasumi omwoyo ogubarumu ebi gwayolekere ha birukukwata hali Kristo, nkooku gwabamanyisize ira ebirukukwata ha kubonabona kwa Kristo n’ebirukukwata ha kitiinisa ekyakuhondiireho.
12 Kikabasuukulirwa ngu bakaba batarukweheereza bonka, baitu bakaba nibaheereza inywe obu nibamanyisa ebintu ebirangiriirwe hati nambere muli, kuraba omuli abo abaarangiriire amakuru amarungi hali inywe, baine omwoyo ogurukwera ogwasindikirwe kuruga omu iguru. Ebintu binu, bamalaika na bo bagonza kubyetegereza.
13 Nahabweki muteekanize ebiteekerezo byanyu kukora omulimo; mwikale nimwetegereza kurungi; okunihira kwanyu mukute ha mbabazi enyingi muno eziraaboolekwa ha kusuukururwa kwa Yesu Kristo.
14 Nk’abaana abahulizi, muleke kutwalirizibwa* okwegomba oku mukaba mwine omu butamanya bwanyu,
15 baitu mube abarukwera omu ngeso zanyu zoona, nk’Ogu ayabeesere oku ali Arukwera,
16 habwokuba kikahandiikwa kiti: “Musemeriire kuba abarukwera, habwokuba ndi arukwera.”
17 Kandi obu muraaba nimukunga Isiitwe arukucwa omusango atarukugwera rubaju, naasigikirra ha mulimo gwa buli muntu, mwetwaze omu mulingo ogurukwoleka okutiina omu kasumi kanu nkooku muli baikazi ab’akacu kake.
18 Habwokuba mukimanyire ngu ebintu ebirukuhwaho, efeeza rundi ezaabbu, tibiri nibyo byakozesiibwe kubacungura* kuruga omu ngeso zanyu ezitarumu ezi mwatungire kuruga hali baisenkuruinywe.
19 Baitu mukacungurwa n’esagama ey’omuhendo eya Kristo, erukusisana n’ey’omwana gw’entaama ogutaroho kamogo koona, noobu kaakuba akatoonyezi.
20 Ky’amananu ngu akamanywa kara ensi etakatandikire, baitu akamanyisibwa ha mpero y’obusumi habwanyu.
21 Kuraba omuli uwe, nimwikiririza omuli Ruhanga ayamuhumbwire kuruga omu bafu kandi yamuha ekitiinisa, nukwo okwikiriza n’okunihira kwanyu bisobole kuba omuli Ruhanga.
22 Hati nkooku mumazire kweyeza inywenka kuraba omu kworobera amananu kandi eki kyabarugirramu kuba n’okugonza okw’ab’oruganda okutarumu bugobya, mugonzangane muno kuruga ha mutima.
23 Habwokuba kuraba omu kigambo kya Ruhanga omwomeezi kandi ow’aikaraho ebiro n’ebiro, muzairwe buhyaka hatali n’embibo ey’erukujunda* baitu ey’etarukujunda.
24 Habwokuba “abantu boona bali nk’obunyansi kandi ekitiinisa kyabo kyona kiri nk’ekyakyo eky’omu kisaka; ebinyansi bihotoka, ebyakyo bigwa,
25 baitu ekigambo kya Yahwe* kiikaraho ebiro n’ebiro.” Kandi “ekigambo” kinu nugo amakuru amarungi agaabatebeziibwe.
Obugambo Obuli Hansi
^ Rora, Kusoborra Ebigambo.
^ Rundi, “esemeziibwe.”
^ Rundi, “okujunwa kw’obwomeezi bwanyu.”
^ Rundi, “kubumbwa; kusisanizibwa.”
^ Nkooku kiri, “kubajuna.”
^ Egi niyo, embibo ey’esobora kwana ebyana rundi kwana ebijuma.
^ Rora, Ebyong. A5.
