Petero ey’Okubanza 4:1-19
4 Nkooku Kristo yabonabonesiibwe omu mubiri, na inywe mube n’enteekereza nk’eye;* habwokuba omuntu ow’abonaboine omu mubiri aba alekere kukora ebibi,
2 nukwo asobole kumara obwire obu asigaizeeyo ali omu mubiri, naakora Ruhanga ebi agonza, hatali okwegomba okw’abantu.
3 Habwokuba akasumi akaarabireho kakabamara kukora amahanga ebi gagonza, obu mwagenderaga omu bikorwa eby’engeso ezijunzire,* omu kwegomba okubi hataroho okwetanga, omu kunywa ekihinguraine, omu magenyi agarumu akajagarro, omu kunywa okw’akaliitango, n’omu kuramya ebisisani ekirukucwa ebiragiro.
4 Basobiirwe habwokuba timukyagendera hamu na bo omu ngeso embi muno nk’ezi, kandi nikyo barukubajumira.
5 Baitu abantu abo balyetonganaho hali ogu anyakweteekaniize kucwera omusango aboomeezi n’abafu.
6 Enu niyo ensonga habwaki amakuru amarungi gaatebeziibwe na hali abafu, nukwo noobu kiraaba ngu nibacwerwa omusango omu mubiri kusigikirra ha ndora y’abantu, basobole kuba boomeezi nibeebemberwa omwoyo kusigikirra ha ndora ya Ruhanga.
7 Baitu empero ey’ebintu byona iriire haihi. Nahabweki, mube n’enteekereza enungi, kandi mube bulindaara obukirukuhika ha kusaba.
8 Kukira byona, mugonzangane muno, habwokuba okugonza kuswekerra ebibi bingi.
9 Mukuniranganege mutarukutontorroma.
10 Nkooku buli omu ahairwe ekisembo, akikozeseege kuheereza abandi nk’omukeeto omurungi ow’embabazi za Ruhanga enyingi muno* ezoolekwa omu miringo erukwahukana.
11 Omuntu weena obu abaza, abaze nk’ow’arukubaza obutumwa oburukuruga hali Ruhanga; omuntu weena obu aheereza, leka akikole naasigikirra h’amaani Ruhanga aga agaba; nukwo kuraba omu bintu byona, Ruhanga asobole kukugizibwa kuraba omuli Yesu Kristo. Ekitiinisa n’amaani bye ebiro n’ebiro. Amiina.
12 Abagonzebwa, mutahunirra habw’ebirengo ebiri nk’omurro ebirukubahikaho, kikasisana oti rundi nimuhikwaho ekintu ekitali kya buli kiro.
13 Mugumizeemu nimusemererwa habw’orulengo oru muhikireho omu kubagana ha kubonabona kwa Kristo, kandi ekitiinisa kye obu kirisuukurwa, musobole kusemererwa kandi mukyanganuke kukiraho.
14 Obu muraaba nimujumwa habw’ibara lya Kristo, mwine okusemererwa, habwokuba omwoyo ogw’ekitiinisa, kandi ogu nugwo omwoyo gwa Ruhanga, guli hali inywe.
15 Baitu hatabaho n’omu hali inywe ayabonabona habw’okuba omwisi, omusuma rundi habw’okuba enkozi y’ebibi rundi habw’okwetaahya omu nsonga z’abandi.
16 Baitu kakuba omuntu weena abonabona habw’okuba Omukristaayo, atakwatwa ensoni, oihireho agumizeemu naakugiza Ruhanga kandi naayetwaza nk’Omukristaayo.*
17 Akasumi akaatairweho ak’okucwa omusango kahikire kandi kucwa omusango nikutandikira omu nju ya Ruhanga. Hati okucwa omusango oku obu kuraaba nikutandikira hali itwe, kiriba kita hali abo abatarukworobera amakuru amarungi aga Ruhanga?
18 “Kandi obu kiraaba kitarukwanguhira omuntu ow’okuhikirra kujunwa, kiki ekirihika ha musiisi n’omuntu atarukutiina Ruhanga?”
19 Nahabweki, leka abo abarukubonabona habw’okukora Ruhanga ebi agonza, obwomeezi bwabo bagumizeemu kubukwasa Omuhangi omwesigwa obu nibakora ebirungi.
Obugambo Obuli Hansi
^ Rundi, “mucweremu kimu nka uwe.”
^ Rundi, “ebikorwa ebirukuswaza.” Omu Ruyonaani a·selʹgei·a. Rora, Kusoborra Ebigambo; “Engeso ezijunzire.”
^ Rora, Kusoborra Ebigambo; “Embabazi enyingi muno.”
^ Nkooku kiri, “naayetwa ibara eri.”
