Exeni ambe enga jataka

Segundu menu jimbo nirani

Jeobaeri testiguecha

Purépecha

¿Andiksïsï Jeobaeri testiguecha no májkueni úntajki Tateeri Senani ka eska máteru relijionicha?

¿Andiksïsï Jeobaeri testiguecha no májkueni úntajki Tateeri Senani ka eska máteru relijionicha?

Juchachi seguirisïnga ísïmindu úni eska Biblia na arhijka, de na enga jatsika para úkuarhini Miántskua tata Jesukristueri uarhikueri, enga ístu mítikateka komueska ‘Tateeri sena’ o últimu sena (1 Korintu 11:20). Peruksï máteru relijioniri jakajkukuecha ka pʼindekuecha ini miántskueri, nóksï Bibliarhu pʼitakata jarhasti.

¿Andisï úkuarhijki i miántskua?

Úntasïngachi Tateeri Senani para miántani kéjtsïtakuani enga Jesusi úka juchantsïni jimbo ka parachi xarhatani eskachi jukaparharasïnga imeri uarhikuani (Mateu 20:28; 1 Korintu 11:24, Traducción del Nuevo Mundo [TNM]). I miántskua no jindesti para pímbinhaxentani, ni relijioniri pʼindekua máe enga íntspijka kóntperata espesiali ma komu para puáminhantani pekaduechani. * Biblia jorhentpesïndi eskajtsïni Tata Diosï úsïnga puáchiantani juchari pekaduechani, peru solu engachi mintsikaaka tata Jesukristuni, ka no pʼindekuechani jimbo engaksï relijionicha uájka (Roma 3:25; 1 Juanu 2:1, 2).

¿Kada na xáni jatsiski para úkuarhini?

Tata Jesukristu juramukuaspti imeri chúxapatichani eskaksï úntapiringa Tateeri Senani, peru no uandaspti kada na xáni (Lukasʌ 22:19). Máru kʼuiripuechaksï jakajkusïndi eska jatsiska para úkuarhintani mándani kutsï; máteruechaksï uandasïndi eska mándani semana, pauani pauani, uánikua uelta ma jurhiatikua jimbo o xáni eska kʼuiripu na xáni exeaka eska uétarhisïnga. Peru jarhasti máru ambe engachi jatsika para exeni.

Tata Jesukristu uaxastasti Tateeri Senani imani mísmu jurhiatikua engaksï judiuecha úntaenga Paskuani; ka máru orechani tátsekua uándikunhaspti (Mateu 26:1, 2). Peru i ambe no ísku jatini ísï úkuarhispti. Biblia terokutantasïndi Jesusiri uarhikuani, imani karichi jingoni enga Paskuarhu úranhenga (1 Korintu 5:7, 8). Paskua únhantasïrendi mándani uéxurhini (Éxodo 12:1-6; Levítico 23:5). Májkueni, primeru kristianuechaksï mándani uéxurhini úntasïrendi tata Jesukristueri uarhikueri miántskuani, ka ístuchi Jeobaeri testiguecha májkueni úsïnga, jimbokachi imani ambe úsïnga enga Biblia uandajka. *

Fecha ka ora

Ejemplu enga Jesusi uaxastaka, jarhuatasïndijtsïni mítini no solu namuni ueltachi uá úntani ini miántskua, sino ístu ambe jurhiatikua ka ambe jandora. Jesusi 14 de nisanini, uéxurhini 33 jimbo, uaxastaspti ini miántskuani enga na Jurhiata inchajtsïkupkia, seguni Bibliaeri kalendariu lunari (Mateu 26:18-20, 26, TNM). Jeobaeri testiguechajtuchi mándani uéxurhini úntasïnga Miántskuani tata Jesukristueri uarhikueri ka imani mísmu fechani, májkueni úparini eskaksï primeru kristianuecha na uénga. *

Jurhiatikua 14 de nisani uéxurhini 33 jimbo, biernesï jurhiatikua máespti, peru mándani uéxurhini uáti máteru jurhiatikua niárani. Parachi mítini ambe jurhiatikua niárasïni 14 de nisani, májkuenchi úsïnga eska na úkuarhienga Jesusiri jurhiatikuechani jimbo parachi mítini ambe jurhiatikua niáraa, ka no imani úraparini engaksï judiuecha úrajka ini jurhiatikuechani jimbo. *

Kurhinda ka binu

Ini jimbanhi miántskuarhu, tata Jesukristu úraspti kurhindani no xarhiperakua jukari ka binu charhapitini enga pakarapka Paskueri tʼirekuarhu (Mateu 26:26-28, TNM). Ísï jimbo, juchajtuchi úrasïnga kurhindani enga no xarhiperakua jukaka ka ni kondimentu ambe, ka úrasïngachi binu charhapitini enga fermetarikuarhika, ka no solu ubaeri juguni, ni binu enga asukari jatsikunhakia, alkoli, uitsakua, o máteru ambe.

Máru relijionichaksï úrasïndi kurhindani enga xarhiperakua jukajka. Peru Biblia uánikua uelta úrasïndi xarhiperakuani, para pekaduni arhikuekani ka no sési ambeni (Lukasʌ 12:1; 1 Korintu 5:6-8; Galasia 5:7-9). Ísï jimbo, kurhinda enga no xarhiperakua jukajka o máteru ambe, sési representarisïndi tata Jesukristueri kuerpuni enga perfektueka (1 Pedru 2:22). Máteru relijionichaksï ubaeri jugu úrasïndi enbesi de binuni, no úparini ambe enga Biblia uandajka. Usïndiksï i ambe, jimbokaksï no uékasïnga eska anhaaka alkoli, peru no nani jupindaskuarhiparini Bibliarhu (1 Timoteo 5:23).

Kurhinda ka binu, no meru Jesusiri kʼuiripetespti ni iurhiri

Kurhinda ka binu enga Miántskuarhu úrakuarhijka, tata Jesukristueri kuerpuni ka iurhirini arhikuekasïndi. Nóksï meru kʼuiripeta ka ni iurhiri úkuarhintasïndi milagru ma jimbo, ísï eskaksï na eratsijka máru. Ka níjtuksï jeuetakuarhijki kʼuiripeta jingoni ka ni iurhiri jingoni. Ju je exeni ini jorhentperakuani Bibliarhu.

  • Enga Jesusi arhiapiringa imeri chúxapatichani eskaksï apiringa iurhiri, ini ambe jimbo arhiani japirindi eskaksï no kurhajchapiringa Tata Diosïri juramukuani de no arhani iurhiri (Génesis 9:4; Ukuecha 15:28, 29). Peru i ambe méntku no úpirindi ísïni, jimboka Jesusi no méni juramukuapiringa úni ambe ma enga úpiringa eskaksï no kurhajchapiringa Tata Diosïri leichani iurhiriri ambe jimbo (Juanu 8:28, 29).

  • Jesusiri chúxapatichaksï no meru imeri iurhirini arhaspti, jimboka imani chúrikua, Jesusi mísmu uandaspka eska imeri iurhiri ‘tsïtanhapiringa’, xarhataparini eska imeri kéjtsïtakua nótki úkuarhesïrenga (Mateu 26:28).

  • Jesusi ‘ma ueltajku kéjtsïtakua ústi para méntkisï’ (Ebreu 9:25, 26). Enga kurhinda ka binu imeri kʼuiripeta ka iurhiri úkuarhintapiringa mándani Tateeri Sena jimbo, ima engaksï arhajka kurhindani ka binuni méntkuksï úndani japirindi repetirini indeni kéjtsïtakuani.

  • Jesusi uandaspti: “Ú je ini ambe jíntsïni miántsparini”, ka no uandaspti “Ú je ini ambe para repetirini juchiti kéjtsïtakuani” (1 Korintu 11:24).

Kʼuiripuecha engaksï jakajkujka eska kurhinda a binu tata Jesukristueri kʼuiripeta ka iurhiri úkuarhintasïnga (transubstanciación), jakajkusïndiksï indeni ambe jimbokaksï máru Bibliaecha ísï tradusirisïnga. Ejemplu ma, uánikua Bibliaechaksï arhisïndi eska seguni Jesusi ini uandakuechani úraaspka para binuni arhikuekani: “I jindesti juchiti iurhiri” (Mateu 26:28, TNM). Peru, Jesusiri uandakuechaksï uáti tradusirikuarhini komueska: “I, arhikuekasïndi juchiti iurhiri” o “i representarisïndi juchiti iurhirini”. * Ísï eska na úpka uánikua uelta enga jorhentpini jámaenga, Jesusi úraxapti uandakuechani engaksï máteru ambe arhikuekenga (Mateu 13:34, 35).

¿Néksï arhasïni kurhindani ka binuni?

Engaksï Jeobaeri testiguecha úntajka Tateeri Senani, nóksï uánikuesti engaksï arhajka kurhindani ka binuni. ¿Andi?

Iurhirini jimbo enga Jesusi tsïtapka, uaxastanhaspti “jimbanhi eiatsperakua” ma, enga mójtakupka imani jingoni enga ióntki Jeoba úpka ireta Israeli jingoni (Ebreu 8:10-13). Ima engaksï indeni pakatperakuarhu jaka, imaksïsï arhajti kurhindani ka binuni Miántskuarhu. Nóksï iámindu kristianuecha úsïndi arhani, sino imajku “engaksï Diosïni jimbo ioarhinhaka” (Ebreu 9:15; Lukasʌ 22:20, TNM). Íksï kristianuecha juramuati tata Jesukristuni jingoni auandarhu. Biblia uandasïndi eskaksï solu 144,000 kʼuiripuecha jatsiaka ini kóntperatani (Lukasʌ 22:28-30; Jaŋaskuecha [Apocalipsis] 5:9, 10; 14:1, 3).

Peru ma ambe enga ménderuenika imecha jingoni engaksï jindeka “namunitku karichicha” ka engaksï juramuaka tata Jesukristuni jingoni, sáno iámindu juchajtuchi erokuarhikua ma jatsiska de kuenta úkuarhini “uánikua kʼuiripuechani” jingoni engaksï irekaaka ixú Echerirhu para méntkisï (Lukasʌ 12:32, TNM; Jaŋaskuecha 7:9, 10). Nájkirukachi jucha engachi erokuarhikua ma jatsika para ixú Echerirhu irekani, no arhajka kurhindani ka ni binuni, nirasïngachi Miántskuarhu parachi xarhatani eskachi jukaparharasïnga tata Jesukristueri uarhikuani enga íntspika tsípikuani juchantsïni jimbo (1 Juanu 2:2).

^ párr. 4 Libru ma enga arhinhajka, El Espíritu Santo, la Iglesia y los sacramentos, arhisïndi pájina 12: “Tata Diosïri Karakata no úrasïndi ini uandakuani ‘sacramento’: sino ‘misterio’. [...] Nuebu Testamentu no úrasïndi misterio, peru úrasïndi bautismu ka Eucaristía [miántskua Tateeri Sena]”.

^ párr. 7 Exe je The New Schaff-Herzog Encyclopedia of Religious Knowledge, bolumeni IV, pájina 43-44, ka McClintock and Strong’s Cyclopedia, bolumeni VIII, pájina 836.

^ párr. 9 Exe je The New Cambridge History of the Bible, bolumeni 1, pájina 841.

^ párr. 10 Nájkiruka iásï anapu kalendariu judiu úrajka jimbanhi lunani astronómica, para exeni primeru jurhiatikuani kutsï nisaniri, primeru siglurhuksï no ísï úsïrendi. Ióntki anapu judiuechaksï mítispti eska kutsï nisani uénasïrenga enga luna jimbanhi uénaenga xarharani jini Jerusaleni, ma ambe enga újka úkuarhini ma jurhiatikua o uánikua jurhiatikuechanisï tátsekua luna astronómica jimbanhi jingoni. I ambe jimboesti engaksï Jeobaeri testiguecha máteru fecha jimbo úntajka Miántskuani tata Jesukristueri uarhikueri ka enga jimbo no méntkisï terokuntajka iásï anapu judiuecheri Paskua jingoni.

^ párr. 20 Exea je Bibliaechani: A New Translation of the Bible, de James Moffatt; The New Testament—A Translation in the Language of the People, de Charles B. Williams; ka The Original New Testament, by Hugh J. Schonfield.