Exeni ambe enga jataka

Segundu menu jimbo nirani

Jeobaeri testiguecha

Purépecha

¿Andiksïsï Jeobaeri testiguecha no uántajki kumpleaniuechani?

¿Andiksïsï Jeobaeri testiguecha no uántajki kumpleaniuechani?

Jeobaeri testiguechachi no uántasïnga kumpleaniuechani jimbokachi mítiska eska Tata Diosï no jeiapanhiantasïnga. Nájkiruka Biblia no uandajka eskachi no jatsiska para uántani kumpleaniuechani, jatasti máru ambe engajtsï jarhuatajka kurhanguni na enga exejka Tata Diosï kumpleaniuechani. Ju je exeni tʼámu íri ka exeakachi ambe enga uandajka Biblia ístu inderi ambe.

  1. Kumpleaniuechaksï no jurhimbiti jakajkukuechani jimbo uérasti. Seguni eska na uandajka diccionario enciclopédico ma, í kʼuínchikua uérasti imani jakajkukua jimbo enga uandaenga eska enga nema uéxurhini andangutenga, “espirituecha ka no sési járhati ambecha jámasïrengaksï no sési úkuni imani enga uéxurhini andangutenga” ka eska “engaksï jarhaenga amiguecha ka felisitarini eska inde ambe úsïrenga kuájchakuni kʼuiripuni” (Funk & Wagnalls Standard Dictionary of Folklore, Mythology, and Legend). Máteru librujtu uandasïndi eska ióntki pʼindenhaspka apuntariuani iáminduechani engaksï andajpenuaenga, jimboka “uétarhisïrenga para oroskopuechani uáni”, uaxastakata jarhaspti i ambe “astrologia jimbo”. Ka i mísmu libru uandasïndi: “Ma ambe enga meru jakajkunhajka jindesti eskaksï kandelecha majia jukaska paraksï úni íntspini imani ambe enga kurhajkuarhinhaaka” (The Lore of Birthdays).

    Peru Biblia no jeiapanhintasïndi majiani, uékani adibinarini, sïkuamikua ambe o “na uéjki inde jásï ambe” (Deuteronomio 18:14; Galasia 5:19-21). Ma ambe jimbo enga ióntki Tata Diosï kastigariauapka Babilonia anapuechani jindespti jimbokaksï astrologia ambe niátasïrenga, ma ambe enga sáno májkuenika eska adibinarini (Isaías 47:11-15). Nájkirukachi Jeobaeri testiguecha no jukari jukaparharajka nani engaksï uérajka kʼuínchikuechani o pʼindekuechani, nochi uáka ísku exeni ambe engajtsïni Biblia arhijka sïkuamikueri ambe.

  2. Primeru kristianuechaksï no uántasïrendi kumpleaniuechani. Seguni enciclopedia ma, primeru kristianuechaksï “uandasïrendi eskaksï kumpleaniuecha pʼindekua máespka no jakajkuticheri”, o relijioni no jurhimbitiri (The World Book Encyclopedia). Biblia xarhatasïndi eskaksï apostulicha ka imechani enga Jesusi jorhendaapka enga ixú Echerirhu jámani japka xarhatastiksï na engachi juchajtu jatsika para jámani (2 Tesalonika 3:6).

  3. Ambe engajkuksï kristianuecha jatsipka para miántani no jindesti andajpenukua ma, sino uarhikua ma: Jesusiri (Lukasʌ 22:17-​20). Ka i ambe ísïsti, jimboka Biblia mísmu uandasïnga eska ‘sánderu sésiiska [...] enga ma uarhijka ka eska enga ma andajpenujka’ (Eclesiastés 7:1). Para jiánisï enga tata Jesukristu uarhipka, ambakiti arhinhakua ma úkuarhisptia Tata Diosïni japarini, jimbosï sánderu jukaparhakuepti ima jurhiatikua enga ima uarhipka ka eska ima enga andajpenupka (Ebreu 1:4).

  4. Biblia no nani uandasïndi eska Tata Diosïri marhuari ma uántasïrenga kumpleaniuechani. Ka no uandasïndi no jimbokaksï no uékaska jatsikuni jimboka Biblia tsimani kumpleaniuecheri uandasïnga imecheri engaksï no marhuakuenga Tata Diosïni. Ka Biblia no jeiapanhiantasïndi ini tsimani kumpleaniuechani enga uandaajka (Génesis 40:20-22; Markusʌ 6:21-29).

¿Eratsisïnksï Jeobaeri testiguecheri uájpecha eskaksï ambakiti ambe tsïtakuarhixaka jimbokaksï no uántaasïnga kumpleaniuechani?

Májkueni eska iámindu táticha, Jeobaeri testiguechajtuksï kánikua uékaasïndi uájpechani. Jimboksïsï íntsajti regaluechani peru no meru fecha ma jimbo ka úkuasïndiksï kʼuínchikuechani ka ístu máteru ambe paraksï ima úni tsípikuarhini. Jánguarhintasïndiksï ísïni eska Tata Diosï, jimboka ima méntkisï ambakiti ambe íntsaasïnga imeri marhuarichani (Mateu 7:11). Ísï jimbo, Jeobaeri testiguecheri uájpecha nóksï pʼikuarherasïndi eskaksï ambakiti ambe tsïtakuarhixaka. Ísïksï xarhatasïndi i uandakuecha:

  • “Sánderu sési pʼikuarherakuarhisïndi regalu ma intsïnhani enga ma no erokuarhini jarhajka.” (Tammy, enga 12 jatiriika.)

  • “Juchiti tátichajtsïni no íntskusïndi regaluechani juchiti kumpleaniuecharhu, perujtsïni máteru jurhiatikuechani íntskusïndi. Kánikuani tsitisïnga ambe engani no erokuarhini jarhajka.” (Gregory, enga 11 jatiriika.)

  • “Sapiichaksï solu pasteli arhasïndi ka pireni. No sáni tsitisïnga indeni kʼuínchikuechani, sánderuni tsitisïnga engaksï juchiniu úkuarhijka.” (Eric, enga 6 jatiriika.)