Exeni ambe enga jataka

Segundu menu jimbo nirani

Jeobaeri testiguecha

Purépecha

¿Ambeksï jakajkusïni Jeobaeri testiguecha?

¿Ambeksï jakajkusïni Jeobaeri testiguecha?

¿Ambeksï jakajkusïni Jeobaeri testiguecha?

Jeobaeri testiguechachi jánguarhintasïnga para imani ambe úni enga Jesusi jorhentpipka ka engaksï apostulichajtu úpka. Ini artikuluni jimbo, exenchi jauaka máru ambe engani jucha jakajkujka.

1. Tata Diosï. Kómarhisïngachi imantku Tata Diosïni enga jurhimbitika, enga Sánderu Kʼéri ambeeka ka enga Kueraaka iámindu ambe. Imeri nombri jindesti Jeoba (Salmo 83:18; Jaŋaskuecha [Apocalipsis] 4:11). Ima jindesti Tata Diosï Abraaniri, Moisesiri ka Jesusiri (Éxodo 3:6; 32:11; Juanu 20:17).

2. Biblia. Jakajkusïngachi eska Tata Diosïri uandakueska para iámindu kʼuiripuecha (Juanu 17:17; 2 Timoteo 3:16). Juchari jakajkukuechaksï Bibliarhu pʼitakata jarhasti engaksï 66 libruecharhu jaka, engaksï jindeka Antiguo ka Nuebu Testamentu. Maestru Jason BeDuhn íri ambe uandaspti enga karapka eskaksï Jeobaeri testiguecheri “jakajkukuecha ka ambe engaksï újka, Bibliarhu uaxastakata jarhaska, ka nóksï jukari ambe jatsikusïndi ka niksï xarheni uandani ambe ma enga jima jatsika para uandani”. *

Nájkirukachi jiókuarhijka iámindu ambe enga Biblia uandajka, nochi fundamentalistaeska (nochi arhiasïnga máteruechani eskaksï májkueni ambe uáka o májkueni ambe jakajkuni eska jucha). Ísïsti, máru Bibliarhu anapu uandantskuechaksï no jatsisti para ísï kurhangukuarhini o úrakuarhini eska na karakata jauaka, ísï jimbo, nochi uáka uandani eska meru ísï úkuarhiaka iámindu ambe (Jaŋaskuecha 1:1).

3. Jesusi. Seguirisïngachi Jesusiri ejempluni ka ambe enga ima jorhentpipka, ka kʼéri ambechi arhisïnga jimboka juchari Pʼímutantspitiska ka Tata Diosïri Uájpa (Mateu 20:28; Ukuecha 5:31). I ambe jimbochi xarhatasïnga eskachi kristueri chúxapatiska (Ukuecha 11:26). Peru Biblia no jorhentpesïndi eska Jesusi jindeska Tata Diosï enga sánderu uinhapitika ka ni jorhentpejki eska ima Trinidadi máeska (Juanu 14:28).

4. Tata Diosïri Reinu. Juramukua máesti enga auandarhu jaka; no jindesti ambe ma enga kristianuecheri mintsitecharhu jaka. Kénditauati iámindu juramutichani ka uáti imani ambe enga Tata Diosï méntkisï uékaka úni ini Echerini jingoni (Daniel 2:44; Mateu 6:9, 10). I ambe no ióndaati ísï úkuarhini, jimbokaksï Bibliarhu anapu profesiaecha uandasïnga eskachi “últimu jurhiatikuechani” jimbo irekaxaka (2 Timoteo 3:1-5; Mateu 24:3-14).

Jesusi jindesti juramuti Tata Diosïri Reinueri enga auandarhu jaka. Uénasti juramuni 1914 jimbo (Jaŋaskuecha 11:15).

5. Pʼímutantskua. Kʼuiripuechaksï uáti pʼímutantskata uérani pekadueri ka uarhikueri tata Jesukristueri uarhikuani jimbo (Mateu 20:28; Ukuecha 4:12). Paraksï úni pʼímutantskateni, jatsistiksï para jakajkuni Jesusini, mójtakuni imecheri irekakuani ka itsï atakuarhini (Mateu 28:19, 20; Juanu 3:16; Ukuecha 3:19, 20). Kʼuiripu ma úkuecha jimbo xarhatasïni sini meru jatsiski jakajkukua (Santiagu 2:24, 26). Peru, pʼímutantskua no jindesti ambe ma engachi jucha uáka andakuarhini; sino jindesti ambe ma engachi solu újka jatsini Tata ‘Diosïri kóntperata’ jimbo (Galasia 2:16, 21).

6. Auanda. Jeoba, Jesukristu ka ánjilichaksï auandarhu irekasti jima enga no xarharajka (Salmo 103:19-21; Ukuecha 7:55). * Grupu sapichu ma kʼuiripuecheri —engaksï jindeka 144,000— tsíntaatiksï auandarhu para Jesusini jingoni juramuni Reinurhu (Daniel 7:27; 2 Timoteo 2:12; Jaŋaskuecha 5:9, 10; 14:1, 3).

7. Echeri. Tata Diosï kueraasti echerini paraka kʼuiripu irekapiringa para méntkisï (Salmo 104:5; 115:16; Eclesiastés 1:4) Tata Diosï íntsauati kóntperatechani imechani engaksï méntkisï kurhajchaaka, paraksï no pʼamenchani ka uáti eskaksï méntkisï irekaaka paraisurhu ma ixú Echerirhu (Salmo 37:11, 34).

8. Kómu pʼikuarherakua ka no sési jásï ambe. Biblia uandasïndi eska ánjili ma nóteru uékaspkia kurhajchani Tata Diosïni. Ka ísï uénaspti jarhani kómu pʼikuarherakua ka no sési jásï ambe (Juanu 8:44). I ánjili, enga nóteru uékapkia kurhajchani Tata Diosïni niáraspti mítikateni komueska Noambakiti ka Satanasi, ka úspti eska primeru temungurhiri imani jingonksï úkuarhipiringa. Ini ambe jimbo engaksï Adan ka Eba úpka kánikua no sési nikuaspti imeri desendientichani (Génesis 3:1-6; Roma 5:12). Para úni sési péntani imani ambe enga Satanasi uandapka, Tata Diosï jurajkuxati eska komu pʼikuarherakua ka no sési jásï ambe jauaka ma tiempu, peru no jurajkuati eska para méntkisïuaka.

9. Uarhikua. Enga ma kʼuiripu uarhijka, nóteru nani jarhasïndia (Salmo 146:4; Eclesiastés 9:5, 10). Uarhirichaksï no kómu nitamakuarhixati infiernurhu ma enga kurhini jaka.

Uánikua miioni kʼuiripuecha engaksï uarhikia tsíntatiksï enga Tata Diosï tsítantauaka (Ukuecha 24:15). Peru, imecha engaksï tsítanhantaaka ka nóksï uékani jiókuarhiani Tata Diosïri juramukuechani kʼamajkunhatiksï para méntkisï ka nóteruksï méni uátia irekani (Jaŋaskuecha 20:14, 15).

10. Familia. Ísï eska Tata Diosï na uaxastaka desde uénakuarhu, para jucha, temungurhirikua jindesti enga tataka ka nanaka ma kúnguarhijkaksï, ka ma ambejkusï jati engaksï jimbo uáka diborsiarikuarhini, enga nema relasioni sexuali jatsiaka máteru nema jingoni (Mateu 19:4-9). Seguruchi jarhaska eskaksï Bibliarhu anapu konsejuecha kánikua marhuasïnga ka eskaksï jarhuataasïnga familiechani paraksï tsípekua jingoni irekani (Efesu 5:22–6:1).

11. Juchari kómarhikua. Nochi kómarhisïnga krusini ka ni imajenichani (Deuteronomio 4:15-19; 1 Juanu 5:21). Máru ambe engachi jucha újka juchari kómarhikuarhu, jindesti:

● Kómarhisïngachi Tata Diosïni (Filipusʌ 4:6).

● Arhintasïngachi Bibliani ka estudiarini (Salmo 1:1-3).

● Eratsintasïngachi ambe engachi jorhenguarhijka Bibliarhu (Salmo 77:12).

● Tánguarhisïngachi para kómarhini, Bibliani estudiarini, márku pireni, xarhatani juchari jakajkukua ka uinhaperantaani máteruechani (Kolosasi 3:16; Ebreu 10:23-25).

● Eianhpisïngachi “ambakiti eianhperakua Diosïri juramukueri” (Mateu 24:14).

● Jarhuataasïngachi imechani engaksï sánderu uétarhinchajka (Santiagu 2:14-17).

● Uásïngachi ka kuidariauani Kʼumanchikuechani Reinueri ka máteru edifisiuechani engaksï úkata jaka para orhepani petani Bibliaeri jorhentperakuani interu parhakpini (Salmo 127:1).

● Jarhuajpisïngachi enga no sési jásï ambe úkuarhijka (Ukuecha 11:27-30).

12. Juchari kúnguarhikua. Kúnguarhikuechani jimbochi organisadu jarhaska. Mándani kúnguarhikuani, exesïndiksï grupu ma Testiguecheri engaksï arhinhajka orhejtsïkuticha, peruksï i no ísïsti eska kleru, ka nóksï ma tumina andasïndi (Mateu 10:8; 23:8). Nochi íntspesïnga diesmu nichi euajpejki tumina (2 Korintu 9:7). Juchari ánchikuarhita orhepani uerasïndi imani tumina jimbo engaksï kʼuiripuecha tsípikua jingoni íntspijka ka enga no néna mítijka.

Grupu sapichu ma enga kánikua jánhaskatiika, ka enga arhinhajka Grupu enga Orhejtsïkuajka iámindu kúnguarhikuechani, orhepani petasïndi Jeobaeri testiguecheri ánchikuarhitani desde sede mundialirhu uératini (Mateu 24:45).

13. Márkuchi jarhasïnga. No arhiparini nani uéjkichi anapueni, májkueni ambechi jakajkusïnga (1 Korintu 1:10). Jánguarhintasïngachi para no arhukperani, no arhiparini na uéjki jásï kʼuiripuenchi, na uéjki jásï pʼindekuachi jatsini o na uéjki jásï kolorinchi (Ukuecha 10:34, 35; Santiagu 2:4). Peru nájkirukachi márku jarhajka, i ambe no arhikuekasïndi eska mándani Jeobaeri testigu no uáka jandiajku eratsikuarhini ambe úni, úraparini imani ambe enga Bibliarhu jorhenguarhikia (Roma 14:1-4; Ebreu 5:14).

14. Juchari jángua. Jánguarhisïngachi ambakiti uékperakua xarhatani iámindu ambe jimbo engachi újka (Juanu 13:34, 35). Pʼíngukuarhisïngachi para no úni imani ambe enga Tata Diosï no jeiapanhintajka. Jimbochisï jánguarhintajka no no sési úrani iurhirini. I ambe arhikuekasïndi pori ejemplu, no jiókuarhini iurhiri jatantani (Ukuecha 15:28, 29; Galasia 5:19-21). Sésichi pájperasïnga ka nochi nirasïnga guerrecharhisï (Mateu 5:9; Isaías 2:4). Respetarisïngachi juramutichani ka kurhajchaasïngachi imeri leichani, peru méntkisï engaksï no uanajchakuaka Tata Diosïri juramukuechani (Mateu 22:21; Ukuecha 5:29).

15. Juchari pájperakua máteruecha jingoni. Jesusi uandasti: “Uékaakari máteruni eska tʼujkumindu na uékakuarhijka”. Ka ístu uandasti eskaksï kristianuecha no ‘parhakpinirhu anapueska’ (Mateu 22:39; Juanu 17:16). Jimbochisï jánguarhintajka iáminduechani sési kaani, nájkirukachi no ma politiku jingoni úkuarhijka ka nichi pájperakua ma jatsini relijioni no jurhimbiti jingoni (Galasia 6:10; 2 Korintu 6:14). Peruchi respetarisïnga ambe engaksï erakukia úni máteruecha (Roma 14:12).

Engajtsï útasï uéjka sánderu ambe mítini Jeobaeri testiguecheri ambe, exentakajtsï sánderu informasioni juchari pájinarhu enga Internetirhu jaka. Ístujtsï auaka karani juchari ofisinecharhu, tánguarhikuarhu ma nirani Kʼumanchikua Reinuerirhu ma enga no xáni iauani pakarajka para cha o kurhamarhini Jeobaeri testiguni ma enga jimesïsï irekaka.

^ párr. 4 Exe je libruni Truth in Translation (Jurhimbikua traduksionirhu), pájina 165.

^ párr. 10 Nájkirukaksï no ambarhati ánjilicha petanhantaka auandarhu, seguirixatiksï irekani lugaricharhu engaksï no xarharajka (Jaŋaskuecha 12:7-9).

 

PARAJTSÏ SÁNDERU MÍTINI

KURHAMARHIKUECHA ENGAKSÏ SÁNDERU ÚKUARHIJKA

¿Né uaxastaski Jeobaeri testiguecheri kúnguarhikuani?

¿Charles Taze Russell uaxastaski jimbanhi relijioni ma? Exe je andi nómbe.

KURHAMARHIKUECHA ENGAKSÏ SÁNDERU ÚKUARHIJKA

¿Jatsikuarheskiksï Jeobaeri testiguecha Biblia ma engaksï ima úka?

Para sánderu sési estudiarini Bibliani uétarhisïndi uánikua traduksionichani Bibliaeri úraani. Exe je tanimu ambe engaksïni jimbo uáka jarhuatani Traducción del Nuevo Mundo de las Santas Escrituras.

KURHAMARHIKUECHA ENGAKSÏ SÁNDERU ÚKUARHIJKA

¿Andiksïsï Jeobaeri testiguecha no uántajki kumpleaniuechani?

Tʼámu ambe jarhasti engachi jimbo no uántajka kumpleaniuechani ka enga xarhatajka eska Tata Diosï no jaiapanhiantasïnga.

KURHAMARHIKUECHA ENGAKSÏ SÁNDERU ÚKUARHIJKA

¿Jakajkusïnksï Jesusini Jeobaeri testiguecha?

Exe je andisï jukaparhakue mintsikani Jesusini para kristianuecha engaksï jurhimbitiika.

¿NÉKSÏ ÚXAKI IÁSÏ AMBE ENGA JEOBA UÉKAJKA?

¿Néskichi Jeobaeri testiguecha?

¿Mítiaskijtsï Jeobaeri testiguechani? ¿Na xánijtsï meru mítiski juchari ambe?