Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Ku Hundzula Vutomi Bya Xivochwa Ha Xin’we

Ku Hundzula Vutomi Bya Xivochwa Ha Xin’we

Le Spain, makhotso ya 68 ma endzeriwa hi Timbhoni ta Yehovha naswona ti dyondza Bibele ni swivochwa swa kwalomu ka 600.

Mbhoni yin’wana leyi endzelaka makhotso wolowo i Miguel, loyi a heteke malembe ya 12 a ri ekhotsweni loko a nga si va Mbhoni. Sweswi u endzela khotso vhiki ni vhiki. Hikwalaho ka yini? Leswaku a pfuna van’wana va cinca vutomi bya vona, ku fana na yena.

Emalembeni ya nhungu lama hundzeke, Miguel u dyondze Bibele ni swivochwa swo tala. U ri: “Ndza swi tsakela ku pfuna swivochwa ekhotsweni leri a ndzi pfaleriwe eka rona. Entiyisweni swa ndzi tsakisa loko ndzi vona ndlela leyi swi navelaka ha yona ku tshika vugevenga.”

Loko Miguel a ri ni malembe ya mune, muchayeri loyi a a dakwile u tlumbe tata wakwe hiloko a fa. Kutani mana wakwe loyi a veke noni, u boheke ku tirha tiawara to tala leswaku a wundla ndyangu wakwe.

Miguel ni buti wakwe va sungule ku xwa exikolweni, va yiva etindlwini ni le timovheni. Loko Miguel a ri ni malembe ya 12, se a a ri xigevenga lexi nga ni tihanyi. Loko a ri ni malembe ya 15, se a a endla mali yo tala hi ku xavisa swidzidziharisi. Hambiswiritano, leswi a a godzomberiwe hi khokheyini ni heroyini leswi durhaka swinene, swi n’wi kucetele ku yiva ngopfu. Loko a ri ni malembe ya 16, a a tshamela ku nghena ni ku huma ekhotsweni naswona hi ku hatlisa u ve xigevenga lexikulu. U ri: “A ndzi tibyele leswaku ndzi ta fela ekhotsweni kumbe ndzi dlaya hi ku tirhisa swidzidziharisi swo tala ngopfu. A ndzi titwa onge ndzi nhongana leyi phasiweke eka vulwembu bya pume.”

Kambe hi 1994, un’wana wa vanghana va Miguel u kombele Mbhoni yin’wana leswaku yi tsalela Miguel papila, loyi hi nkarhi wolowo a a ri ekhotsweni. Epapileni rero, Miguel u dyondze leswaku xikongomelo xa Xikwembu i ku vuyetela Paradeyisi emisaveni. Mbhoni yoleyo yi n’wi khutaze ku hundzula vutomi byakwe leswaku a ta vona ku hetiseka ka xitshembiso xexo. Miguel u ri: “Marito yakwe ma ndzi khumbe mbilu. Hi siku rero, swilo hinkwaswo swi cincile eka mina naswona ndzi teke xiboho xo dyondza Bibele hambileswi a ndzi swi tiva leswaku sweswo a swi nga ta ndzi olovela nikatsongo.”

Miguel u vule sweswo hikuva a a godzomberiwe hi swidzidziharisi ni fole. Haswimbirhi a swi kumeka hi ku olova ekhotsweni. Swivochwa-kuloni a swi n’wi nyika swidzidziharisi siku ni siku. Kutani a a tshamela ku khongelela matimba yo tshika swidzidziharisi naswona eku heteleleni u swi tshikile.

Endzhaku ka tin’hweti tinharhu, u sungule ku chumayela swivochwa swin’wana hi ripfumelo rakwe. Lembe leri landzeleke, u ntshunxiwile ekhotsweni kutani a khuvuriwa a va Mbhoni ya Yehovha. Nakambe u hlele leswaku a cata kambe ku ve ni xiphiqo. Loko ku sale n’hweti leswaku a cata, huvo yi n’wi gweve malembe ya khume ekhotsweni hikwalaho ka milandzu yo hlayanyana leyi a yi nga si tengiwa. Hambiswiritano, endzhaku ka malembe manharhu ni hafu, u ntshunxiwile ekhotsweni hileswi a a tikhome kahle. Eku heteleleni u catile. A nga ha tlhelanga a endla vugevenga.

 

DYONDZA SWO TALA

Hi Xihi Xikongomelo Xa Xikwembu Hi Misava?

Bibele yi hlamusela xivangelo xo va Xikwembu xi tumbuluxe misava, nkarhi lowu ku xaniseka ku nga ta hela ni leswi vumundzuku byi yi khomeleke swona misava ni lava tshamaka eka yona.