Yesu u dyondzise vanhu leswaku va va ni ku rhula ni vanhu van’wana. Kambe siku rin’wana u byele vaapostola vakwe a ku: “Mi nga ehleketi leswaku ndzi tise ku rhula emisaveni; a ndzi tisanga ku rhula, kambe ndzi tise banga. Hikuva ndzi tele ku ta vanga ku avana exikarhi ka jaha ni tata wa rona, nhwanyana ni mana wakwe ni nhlomi ni n’wingi wa yona.” (Mat. 10:34, 35) Yesu a a vula yini?

Yesu a a nga lavi ku hambanisa swirho swa ndyangu kambe a a swi tiva leswaku tidyondzo takwe a ti ta hambanisa mindyangu yin’wana. Hikwalaho, lava lavaka ku va vadyondzisiwa va Kreste ni ku tlhela va khuvuriwa a va fanele va tiva vuyelo bya xiboho xa vona. Loko va kanetiwa hi munghana wa vukati kumbe hi van’wana endyangwini, swi nga ha va tikela ku tshama va tshembekile eka tidyondzo ta Kreste.

Bibele yi byela Vakreste leswaku va va “ni ku rhula ni vanhu hinkwavo.” (Rhom. 12:18) Kambe emindyangwini yin’wana, tidyondzo ta Yesu ti nga ha fana ni “banga.” Leswi swi nga endleka loko un’wana endyangwini a amukela tidyondzo ta Yesu loko lavan’wana va ti ala. Eka xiyimo xo tano, swirho swa ndyangu swi va “valala” va loyi a dyondzaka ntiyiso.—Mat. 10:36.

Vadyondzisiwa va Kreste lava gandzelaka Yehovha va ri voxe emindyangwini ya vona, mikarhi yin’wana va langutana ni swiyimo leswi ringaka ndlela leyi va rhandzaka Yehovha na Yesu hayona. Hi xikombiso, maxaka ma nga ha va sindzisa ku katseka eka tiholideyi ta vukhongeri. Loko va ringiwa, xana va ta tsakisa mani? Yesu u te: “Loyi a rhandzaka tata wakwe kumbe mana wakwe ku tlula mina a nga ndzi faneli.” (Mat. 10:37) I ntiyiso leswaku Yesu a a nga vuli swona leswaku vadyondzisiwa vakwe a va fanele va nga va rhandzi ngopfu vatswari va vona leswaku va ta kota ku n’wi landzela. Kambe a a vula leswaku va fanele va rhangisa swilo swa nkoka. Loko maxaka ya hina ma nga swi lavi leswaku hi gandzela Yehovha, a hi tshiki ku ma rhandza kambe ha swi tiva leswaku hi fanele hi rhandza Xikwembu ku sungula.

Ku kanetiwa hi ndyangu swa vava swinene. Kambe, vadyondzisiwa va Yesu a va ma rivali marito lama nge: “Loyi a nga rhwaliki mhandzi yakwe ya nxaniso kutani a ndzi landzela a nga ndzi faneli.” (Mat. 10:38) Hi marito man’wana, Vakreste va teka ku kanetiwa hi ndyangu ku ri man’wana ya maxangu lawa vadyondzisiwa va Kreste va ma tiyiselelaka. Hilaha ku fanaka, va navela leswaku matikhomelo ya vona lamanene ma ta susumeta swirho swa vona swa mindyangu ku cinca miehleketo ivi swi lava ku dyondza Bibele.—1 Pet. 3:1, 2.