Nghena endzeni

Hundzela eka leswi nga endzeni

Yehovha U Lava Leswaku Hi Tihlawulela

Yehovha U Lava Leswaku Hi Tihlawulela

 Tshinela Eka Xikwembu

Yehovha U Lava Leswaku Hi Tihlawulela

Deteronoma 30:11-20

“HAKANYINGI a ndzi ri ni ku chava loku nga twisisekiki ka leswaku a ndzi nge tshembeki eka Yehovha.” Sweswo swi vuriwe hi wansati un’wana wa Mukreste loyi a a twa onge swilo swo biha leswi n’wi humeleleke loko a ha ri ntsongo swi nga ha endla leswaku a nga swi koti ku tshembeka. Xana swi tano hakunene? Xana hakunene a hi nge he swi koti ku tshembeka eka Xikwembu? A swi tano. Yehovha Xikwembu u hi nyike nyiko ya ntshunxeko wa ku ti hlawulela, leswaku hi kota ku ti hlawulela ndlela leyi hi lavaka ku hanya ha yona. Yehovha u lava leswaku hi hlawula hi ndlela leyinene, naswona Rito rakwe, ku nga Bibele, ri hi byela ndlela leyi hi nga swi endlaka ha yona sweswo. Xiya marito ya Muxe hilaha ma tsariweke hakona eka Deteronoma ndzima 30.

Xana swa tika ku tiva leswi Xikwembu xi swi languteleke eka hina, ni ku tlhela hi swi endla? * Muxe u te: “Xileriso lexi ndzi ku lerisaka xona namuntlha a xi nonon’hwi ngopfu eka wena, hambi ku ri ku va ekule swinene.” (Ndzimana 11) Yehovha a nga hi kombeli ku endla leswi hi nga tsandzekaka ku swi endla. Leswi a swi languteleke eka hina swa twisiseka naswona hi nga swi kota ku swi endla. Nakambe hi nga swi kota ku swi tiva. A swi lavi leswaku hi ya “[e]matilweni” kumbe “[e]ntsungeni wa lwandle” leswaku hi dyondza leswi Xikwembu xi swi languteleke eka hina. (Ndzimana 12,13) Bibele yi yi veka erivaleni ndlela leyi hi faneleke hi hanya ha yona.—Mikiya 6:8.

Hambiswiritano, Yehovha a nga hi sindzisi leswaku hi n’wi yingisa. Muxe u ri: “Ndzi veka emahlweni ka wena namuntlha vutomi ni vunene, rifu ni vubihi.” (Ndzimana 15) Hi ntshunxekile ku tihlawulela exikarhi ka vutomi ni rifu, vunene ni vubihi. Hi nga hlawula ku gandzela Xikwembu kutani hi kuma mikateko, kumbe hi hlawula ku nga xi yingisi kutani hi kuma vuyelo byo biha. Kutani swi le ka hina leswaku hi hlawula ku endla yini.—Ndzimana 16-18; Vagalatiya 6:7, 8.

Xana Yehovha u ni mhaka ni leswaku hi yihi ndlela leyi hi yi hlawulaka? Ina, swi tano! Muxe u huhuteriwe hi Xikwembu ku vula a ku: “Hlawula vutomi.” (Ndzimana 19) Kambe hi byi hlawula njhani vutomi? Muxe u hlamusele a ku: “Hi ku rhandza Yehovha Xikwembu xa n’wina, hi ku yingisa rito rakwe ni ku n’wi namarhela.” (Ndzimana 20) Loko hi rhandza Yehovha, hi ta lava ku n’wi yingisa ni ku n’wi namarhela hi ku tshembeka hambi ko ba lexi dumaka. Loko hi endla tano, hi hlawula vutomi—ku nga ndlela yo antswa yo hanya sweswi hi ri ni ntshembo wo kuma vutomi lebyi nga heriki emisaveni leyintshwa ya Xikwembu leyi taka.—2 Petro 3:11-13; 1 Yohane 5:3.

Marito ya Muxe ma hi tiyisa nhlana. Ku nga khathariseki leswaku u tshame u langutana ni xiyimo xa muxaka muni eka mafambiselo lawa yo biha ya swilo, u nga swi kota ku tshembeka eka Xikwembu; nakambe a wu nge tsandzeki ku swi endla sweswo. Yehovha u ku xiximile hi ku ku nyika nyiko ya ntshunxeko wa ku ti hlawulela. U nga hlawula ku rhandza Yehovha, ku n’wi yingisa ni ku tshama u tshembekile eka yena. Loko u hlawula ku endla tano, Yehovha u ta katekisa matshalatshala ya wena.

Ntiyiso wolowo—wa leswaku hi na ntshunxeko wo hlawula ku rhandza Yehovha ni ku n’wi tirhela—wu chavelele wansati loyi ku vulavuriweke ha yena eku sunguleni ka xihloko lexi. U ri: “Ndza n’wi rhandza Yehovha. Minkarhi yin’wana a ndzi rivala leswaku leswi nga swa nkoka swinene hi leswaku ndza n’wi rhandza Yehovha. Kutani ndzi nga tshembeka.” Na wena u nga tshembeka hikwalaho ko pfuniwa hi Yehovha.

[Nhlamuselo ya le hansi]

^ par. 5 Vona xihloko lexi nge, “Tshinela Eka Xikwembu—I Yini Leswi Yehovha A Swi Kombelaka Eka Hina?” eka nkandziyiso wa Xihondzo xo Rindza wa October 1, 2009.