Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Vanhu van’wana va vule leswaku Pawulo a nga tshovekeriwanga hi xikepe exihlaleni xa Melita, edzongeni wa Silikiya, kambe xi n’wi tshovekele exihlaleni xin’wana. Xana xikepe xi n’wi tshovekele kwihi?

Xivutiso lexi xi kombetela eka xiringanyeto xa sweswinyana xa leswaku muapostola Pawulo a nga tshovekeriwanga hi xikepe exihlaleni xa Melita, kambe xi n’wi tshovekele eCephalonia (kumbe, eKefallinía) ekusuhi ni le Corfu eLwandle ra Ionia, ekule ni ribuwa ra le vupela-dyambu bya Greece. Matsalwa lama huhuteriweke ma hi byela leswaku Pawulo u suke ekhotsweni ra Yuliyo, ndhuna ya dzana ya Rhoma, le Khezariya swin’we ni masocha man’wana ni vanghana va yena. Hilaha swi kombisiweke hakona emepeni, va tlutele eSidoni ni le Mira.  Loko va cincele eka xikepe lexikulu xa mavele lexi humaka eAleksandriya le Egipta, va ye emahlweni va tlutela evupela-dyambu bya Kinida. A va nga ta swi kota ku famba hi ndlela leyi ku ringanyetiweke yona leyi hundzaka hi le Lwandle ra Aegean va hundza hi le makumu ya Greece kutani va ya eRhoma. Mheho leyikulu yi endle leswaku va ya edzongeni ku kongoma eKreta ehansi ka xisirhelelo xa kona. Kwalaho va yime eHlalukweni ro Saseka. Loko va teka “riendzo ra xikepe ku suka eKreta,” xikepe a xi “biwa hi ntamu” hi “mheho ya xidzedze leyi vuriwaka Yurakuloni.” Xikepe lexikulu xa mavele a xi ‘ndlengandlengisiwa xi ya hala ni hala elwandle’ kukondza ku fika vusiku bya vu-14. Eku heteleleni, vanhu hinkwavo va 276 va tshovekeriwe hi xikepe exihlaleni lexi Matsalwa yo Kwetsima ya Xigriki ma xi vitanaka Me·liʹte.—Mintirho 27:1–28:1.

Emalembeni lama hundzeke, ku nyikeriwe swiringanyeto swo hambana-hambana malunghana ni xihlala lexi xa Me·liʹte. Van’wana a va anakanya leswaku a ku ri xihlala xa Melite Illyrica, lexi sweswi xi tiviwaka xi ri Mljet, eLwandle ra Adriatic ekule ni ribuwa ra Croatia. Kambe swi vonaka swi nga ri tano hikuva swa tika ku hlanganisa ndhawu ya le n’walungwini ya Mljet ni tindhawu leti Pawulo a yeke eka tona endzhaku ka kwalaho, ku nga eSirakusa, Silikiya ni le ribuweni ra le vupela-dyambu bya Italy.—Mintirho 28:11-13.

Vahundzuluxeri vo tala va Bibele va gimete hi leswaku, Me·liʹte i xihlala xa Melite Africanus, lexi sweswi xi vitaniwaka Melita. Hlaluko ro hetelela leri xikepe lexi Pawulo a a xi khandziyile xi yimeke eka rona a ku ri Hlaluko ro Saseka, eKreta. Kutani mheho ya xidzedze yi endle leswaku xikepe xi ya evupela-dyambu bya Kawuda. Mheho leyi yi hambete yi pepetsekisa xikepe ku ringana masiku yo tala. Kutani swa twala ku vula leswaku xikepe lexi a xi pepetsekisiwa hi xidzedze a xi ta ya evupela-dyambu kutani xi ya fika eMelita.

Loko Conybeare na Howson va kambisisa mheho leyi leyi a yi tshamela ku va kona swin’we ni “tlhelo ra kona ni rivilo leri mati ma khulukaka ha rona,” va tsale leswi landzelaka ebukwini ya vona leyi nge The Life and Epistles of St. Paul: “Mpfhuka wo suka eClauda [kumbe eKawuda] u ya eMelita wu le hansinyana ka 770 wa tikhilomitara. Ku twanana koloko ku le rivaleni, lerova swi tikomba swi tika ku pfumela leswaku tiko leri vatluti va fikeke eka rona hi vusiku bya vu-14 a ri ta va ndhawu yin’wana handle ka Melita. A swi kanakanisi leswaku tiko rero a ku ri Melita.”

Hambileswi ku nga ha vulavuriwaka hi tindhawu tin’wana, mhaka ya xikepe lexi kombisiweke emepeni lowu lexi tshovekeke eMelita yi vonaka yi fambisana ni rhekhodo ya le Bibeleni.

[Mepe/Xifaniso lexi nga eka tluka 31]

(Leswaku u vona rungula leri hleriweke hi ku helela, vona nkandziyiso wa kona)

Yerusalema

Khezariya

Sidoni

Mira

Kinida

KRETA

KAWUDA

MELITA

SILIKIYA

Sirakusa

Rhoma

MLJET

GREECE

CEPHALONIA