Siku Ra Yehovha Ra Ku Avanyisa Ri Tshinele!

“Siku lerikulu ra Yehovha ri le kusuhi. Ri le kusuhi, naswona ra hatlisa swinene.”—SOFANIYA 1:14.

1. I xitsundzuxo xihi lexi Xikwembu xi xi vuleke hi ku tirhisa Sofaniya?

YEHOVHA XIKWEMBU u le kusuhi ni ku herisa lavo homboloka. Yingisa! Xitsundzuxo xa yena xi ri: “Ndzi ta herisa munhu wa la misaveni . . . Ndzi dlaya vanhu [evuandlalweni] bya misava.” (Sofaniya 1:3) Hosi Leyikulu Yehovha hi yena a vuleke marito wolawo hi ku tirhisa muprofeta Sofaniya, loyi kumbexana a a ri ntukulu-xinguwe wa Hosi Hezekiya wo tshembeka. Marito wolawo, lama vuriweke emasikwini ya Hosi Yosiya lonene, a ma nga profeti vuyelo lebyinene bya vanhu lavo homboloka lava tshamaka etikweni ra Yuda.

2. Ha yini magoza ya Yosiya ma nga ri sivelanga siku ra Yehovha ra ku avanyisa?

² A swi kanakanisi leswaku vuprofeta bya Sofaniya byi n’wi pfule mahlo Yosiya lontsongo leswaku a vona xilaveko xa ku herisa vugandzeri lebyi thyakeke eYuda. Kambe magoza ya hosi yo herisa vukhongeri bya mavunwa etikweni a ma susanga vubihi hinkwabyo exikarhi ka vanhu kumbe ma endla leswaku va rivaleriwa swidyoho swa kokwa wakwe, Hosi Manase, loyi a a “[tate] Yerusalema hi ngati leyi nga riki na nandzu.” (2 Tihosi 24:3, 4; 2 Tikronika 34:3) Hikwalaho, siku ra Yehovha ra ku avanyisa a ri ta fika hakunene.

3. Hi nga tiyiseka njhani leswaku swa koteka ku pona “esikwini ra ku hlundzuka ka Yehovha”?

³ Kambe, a va ta va kona vanhu lava a va ta pona siku rolero leri chavisaka. Hikwalaho, muprofeta wa Xikwembu u te: “Nawu wu nga si tswala nchumu, siku ri nga si hundza kukota mungu, ku hlundzuka lokukulu ka Yehovha ku nga si mi wela, siku ra ku hlundzuka ka Yehovha ri nga si mi fikela, lavani Yehovha, n’wina hinkwenu lavo rhula va misava, n’wina lava mi hanyeke hi ku landza xiboho xa Yena xa vuavanyisi. Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.” (Sofaniya 2:2, 3) Leswi se hi nga ni ntshembo wa ku pona siku ra Yehovha ra ku avanyisa, a hi kambisiseni buku ya Bibele ya Sofaniya. Yi tsariwe eYuda emahlweni ka lembe ra 648 B.C.E., naswona i xiphemu xa “rito ra vuprofeta” ra Xikwembu, leri hinkwerhu hi faneleke hi nyikela nyingiso eka rona hi mbilu hinkwayo.—2 Petro 1:19.

Yehovha A Tshambuluta Voko Ra Yena

4, 5. Xana Sofaniya 1:1-3 yi hetiseke njhani eka lavo homboloka va le Yuda?

⁴ “Rito ra Yehovha” leri yaka eka Sofaniya ri sungula hi xitsundzuxo lexi tshahiweke eku sunguleni. Xikwembu xi ri: “‘Kunene ndzi ta herisa xin’wana ni xin’wana evuandlalweni bya misava,’ ku vula Yehovha. ‘Ndzi ta herisa munhu wa la misaveni ni xivandzana. Ndzi ta herisa xivumbiwa lexi hahaka xa matilo ni tinhlampfi ta le lwandle, swikhunguvanyiso swin’we ni lavo homboloka; ndzi dlaya vanhu [evuandlalweni] bya misava,’ ku vula Yehovha.”—Sofaniya 1:1-3.

⁵ Ina, Yehovha a a ta byi tsuvula vubihi lebyikulu bya le tikweni ra Yuda. Xana Xikwembu a xi ta tirhisa mani leswaku xi “herisa xin’wana ni xin’wana evuandlalweni bya misava”? Leswi handle ko kanakana Sofaniya a profeteke emasungulweni ya ku fuma ka Hosi Yosiya, loku sunguleke hi 659 B.C.E., marito wolawo ya vuprofeta ma hetiseke loko Yuda ni ntsindza wa wona, Yerusalema swi herisiwa hi Vababilona hi 607 B.C.E. Enkarhini wolowo, ku ve ni ku ‘herisiwa’ ka lavo homboloka etikweni ra Yuda.

6-8. I yini leswi profetiweke eka Sofaniya 1:4-6, naswona vuprofeta byebyo byi hetiseke njhani eYuda wa khale?

 ⁶ Loko yi profeta hi leswi Xikwembu xi nga ta swi endla ku lwa ni vagandzeri va mavunwa, Sofaniya 1:4-6 yi ri: “Ndzi ta tshambuluta voko ra mina ku lwa na Yuda ni ku lwa ni vaaki hinkwavo va Yerusalema, naswona endhawini leyi ndzi ta dlaya vanhu va Bali lava va seleke, vito ra vaprista va xikwembu ximbe swin’we ni vaprista, ni lava va nkhinsamelaka vuthu ra le matilweni ehenhla ka malwangu, ni lava va nkhinsamaka, va endla swihlambanyo leswi tiyisiweke eka Yehovha, va tlhela va endla swihlambanyo leswi tiyisiweke eka Malikomo; ni lava va tlhelelaka endzhaku va tshika ku landzela Yehovha ni lava va nga n’wi lavangiki Yehovha naswona va nga vutisangiki ha yena.”

⁷ Yehovha u tshambulute voko rakwe ku lwa ni vanhu va Yuda na Yerusalema. A a tiyimiserile ku herisa vagandzeri va Bali, xikwembu xa Vakanana lexi pfunaka etimhakeni ta ku kuma vana. Swikwembu swa kwalaho swo hambana-hambana a swi vitaniwa Vabali hikuva vagandzeri va swona a va kholwa leswaku swi ni matimba ni nkucetelo wa ku endla swo karhi etindhawini ta kwalaho. Hi xikombiso, a ku ri na Bali loyi a a gandzeriwa hi Vamowabu ni Vamidiyani eNtshaveni ya Peyori. (Tinhlayo 25:1, 3, 6) Etikweni hinkwaro ra Yuda, Yehovha a a ta dlaya vaprista va Bali, swin’we ni vaprista va Valevhi lava nga tshembekangiki, lava a va tlula nawu wa Xikwembu hi ku endla xinakulobye na vona.—Eksoda 20:2, 3.

⁸ Xikwembu a xi ta dlaya ni lava a va ‘nkhinsamela vuthu ra le matilweni,’ lava a swi ri erivaleni leswaku va hanya hi vungoma bya swilo swa le mpfhukeni ni ku gandzela dyambu. (2 Tihosi 23:11; Yeremiya 19:13; 32:29) Nakambe ku hlundzuka ka Xikwembu a ku ta tela lava ringetaka ku pfanganisa vugandzeri bya ntiyiso ni vukhongeri bya mavunwa hi ku ‘endla swihlambanyo leswi tiyisiweke eka Yehovha ni le ka Malikomo.’ Swi nga ha endleka Malikomo ku ri vito rin’wana ra Moleke, xikwembu lexikulu xa Vaamoni. Vugandzeri bya Moleke a byi katsa ku endla switlhavelo hi vana.—1 Tihosi 11:5; Yeremiya 32:35.

Makumu Ya Vujagana Ma Kwala Nyongeni!

9. (a) Vujagana byi ni nandzu wa yini? (b) Xana hi fanele hi tiyimisela ku endla yini leswaku hi nga fani ni vanhu va le Yuda lava nga tshembekangiki?

⁹ Leswi hinkwaswo swi hi tsundzuxa ndlela leyi Vujagana byi ngheneke ha yona hi nhloko evugandzerini bya mavunwa ni le ka vungoma bya swilo swa le mpfhukeni. Ku endla ka yena switlhavelo hi vanhu va timiliyoni etialitarini ta nyimpi, leti seketeriwaka hi vafundhisi, swa nyenyetsa hakunene! Hi nga tshuki hi fana ni vanhu lava nga tshembekangiki va le Yuda, lava ‘tlheleleke endzhaku va tshika ku landzela Yehovha,’ va n’wi xandzukela kutani va nga ha n’wi lavisisi kumbe ku lava nkongomiso wa yena. Ku ri na sweswo, a hi tshameni hi tshembekile eka Xikwembu.

10. U nga wu hlamusela njhani nkoka wa vuprofeta lebyi nga eka Sofaniya 1:7?

¹⁰ Marito ya muprofeta lama landzelaka a ma fanele vadyohi va le Yuda ni vanhu lavo homboloka va le nkarhini wa hina. Sofaniya 1:7 yi ri: “Miyela  emahlweni ka Yehovha, Hosi leyi Lawulaka; hikuva siku ra Yehovha ri le kusuhi, hikuva Yehovha u lunghiselele xitlhavelo; u hlawulekise vanhu vakwe lava rhambiweke.” ‘Vanhu lava rhambiweke’ handle ko kanakana a va ri valala va Vayuda ku nga Vakalidiya. “Xitlhavelo” a ku ri Yuda hi yexe, ku katsa ni ntsindza wa yena. Xisweswo Sofaniya u twarise xikongomelo xa Xikwembu xo herisa Yerusalema, naswona vuprofeta lebyi byi tlhele byi kombetela eku lovisiweni ka Vujagana. Entiyisweni, leswi siku ra Xikwembu ra ku avanyisa ri ngo va kwala nyongeni, misava hinkwayo yi fanele yi ‘miyela emahlweni ka Hosi Leyikulu Yehovha’ ivi yi yingisela leswi yi swi vulaka hi ku tirhisa “ntlhambinyana” wa valandzeri lava totiweke va Yesu ni vanakulobye va vona, “tinyimpfu tin’wana.” (Luka 12:32; Yohane 10:16) Hinkwavo lava va nga taka va nga n’wi yingiseli ivi va lwisana ni Mfumo wa Xikwembu va ta lovisiwa.—Pisalema 2:1, 2.

Siku Ra Ku Kolola Ri Ta Fika —Ku Nga Ri Khale!

11. Hi wihi mongo wa Sofaniya 1:8-11?

¹¹ Malunghana ni siku ra Yehovha, Sofaniya 1:8-11 ya engetela: “‘Esikwini ra xitlhavelo xa Yehovha ndzi ta nyikela nyingiso eka tihosana, ni le ka vana va hosi, ni le ka hinkwavo lava va ambalaka tinguvu timbe. Ndzi ta nyikela nyingiso eka un’wana ni un’wana loyi a khandziyaka ehenhla ka tshala esikwini rero, lava va tataka yindlu ya vini va vona hi madzolonga ni vuxisi. Kutani esikwini rero,’ ku vula Yehovha, ‘ku ta twala mpfumawulo wa xirilo wu huma eNyangweni ya Tinhlampfi, ni ku kolola ku huma exiphen’wini xa vumbirhi, ni ku wa lokukulu ku huma eswitsungeni. Kololani, n’wina vaaki va Makitexi, hikuva vanhu hinkwavo lava va nga van’wamabindzu va miyetiwile; hinkwavo lava va pimaka silivhere va dlayiwile.’”

12. Xana van’wana va kumeka va ‘ambale tinguvu timbe’ hi ndlela yihi?

¹² Hosi Yosiya a a ta tlhandlamiwa hi Yowohazi, Yoyakimi na Yoyakini. Kutani a ku ta landzela mfumo wa Sedekiyasi, lowu Yerusalema a wu ta lovisiwa loko ku fuma wona. Hambileswi khombo rolero a ri langutane na vona, van’wana handle ko kanakana va lave ku amukeriwa hi matiko ya le kusuhi hi ku ‘ambala tinguvu timbe.’ Hilaha ku fanaka, vo tala namuntlha va swi kombisa hi tindlela to hambana leswaku a hi xiphemu xa nhlengeletano ya Yehovha. Leswi va tikombisaka va ri xiphemu xa nhlengeletano ya Sathana, va ta xupuriwa.

13. Hi ku pfumelelana ni vuprofeta bya Sofaniya, xana a ku ta humelela yini loko Vababilona va hlasela Yerusalema?

¹³ ‘Siku rolero’ ra ku tenga timhaka ta Yuda ri yelana ni siku ra Yehovha ro avanyisa valala va yena, a herisa vuhomboloki a tlhela a kombisa leswaku u ni matimba yo lawula. Loko Vababilona va ri karhi va hlasela Yerusalema, xirilo a xi ta ta xi huma eNyangweni ya Tinhlampfi. Kumbexana yi thyiwe tano hileswi a yi ri kusuhi ni laha ku xavisiwaka kona tinhlampfi. (Nehemiya 13:16) Mavuthu ya le Babilona a ma ta nghena endhawini leyi vuriwaka xiphemu xa vumbirhi, kutani ‘ku wa loku humaka eswitsungeni’ ku nga ha va ku fanekisela huwa ya Vakalidiya lava taka. Vaaki va Makitexi laha kumbexana ku nga exiphen’wini xa le henhla xa Nkova wa Tyropoeon, a va ta “kolola.” A va ta kololela yini? Hikuva ntirho wa bindzu ku katsa ni wa “lava va pimaka silivhere,” a wu ta hela endhawini yoleyo.

14. Xana Xikwembu a xi ta va kambela ku fikela kwihi vanhu lava tivitanaka vagandzeri va xona?

¹⁴ Xana Yehovha a a ta va kambela ku fikela kwihi lava va tivitanaka vagandzeri va yena? Vuprofeta byi ya emahlweni byi ku: “Enkarhini wolowo ndzi ta lava Yerusalema hi vukheta, hi timboni, naswona ndzi ta nyikela nyingiso eka vanhu lava va tshamisekeke ehenhla ka swisese swa vona, lava va vulaka embilwini ya vona va ku, ‘Yehovha a nge endli leswinene naswona a nge endli leswo biha.’ Rifuwo ra vona ri fanele ri phangiwa ni tindlu ta vona ti va rhumbi. Va ta aka tindlu, kambe a va nge tshami eka tona; va ta rima masimu ya vhinya, kambe a va nge yi nwi vhinyo ya wona.”—Sofaniya 1:12, 13.

15. (a) A ku ta humelela yini hi vaprista lava gwineheke va le Yerusalema? (b) Xana vanhu lava nga evukhongerini bya mavunwa namuntlha va yimeriwe hi yini?

¹⁵ Vaprista lava gwineheke va le Yerusalema a va hlanganisa vugandzeri bya Yehovha ni vukhongeri bya mavunwa. Hambileswi a va titwa va sirhelelekile, Xikwembu a xi ta va lava onge hiloko xi va lava hi timboni leti voningaka swinene  leti nga ta voninga munyama wa moya lowu va tumbeleke eka wona. A nga kona ni un’we loyi a a ta pona loko ku huweleriwa ku tlhela ku hetisisiwa ku avanyisa ka Xikwembu. Vagwinehi volavo lava enerisekeke a va tshamiseke ku fana ni swisese endzeni ka khuwana ra vhinyo. A va nga lavi ku kavanyetiwa hi ku huweleriwa kwihi na kwihi ka ku nghenelela ka Xikwembu etimhakeni ta vanhu, kambe a va nga ta ku balekela ku avanyisiwa hi Xikwembu. Ni vanhu lava nga eka vukhongeri bya mavunwa namuntlha lava katsaka swirho swa Vujagana ni lava va gwineheke evugandzerini bya Yehovha, a va nge poni. Hi ku landzula leswaku lawa i ‘masiku yo hetelela,’ etimbilwini ta vona va ri, “Yehovha a nge endli leswinene naswona a nge endli leswo biha.” Va tixise ngopfu!—2 Timotiya 3:1-5; 2 Petro 3:3, 4, 10.

16. A ku ta humelela yini loko ku avanyisa ka Xikwembu ku tisiwa ehenhla ka Yuda, naswona ku tiva sweswo swi fanele swi hi khumba njhani?

¹⁶ Vagwinehi va le Yuda va tsundzuxiwile leswaku Vababilona a va ta teka rifuwo ra vona, va mbundzumuxa tiyindlu ta vona va tlhela va teka mihandzu ya tinsimu ta vona ta vhinya. Swilo leswi vonakaka a swi nga ta pfuna nchumu loko Xikwembu xi tisa ku avanyisa ka xona ehenhla ka Yuda. Swi ta va tano loko siku ra Yehovha ra ku avanyisa ri fika ehenhla ka mafambiselo ya sweswi ya swilo. Hikwalaho, onge hi nga va ni langutelo ra moya ivi hi ‘tihlayisela xuma etilweni’ hi ku rhangisa ntirho wa Yehovha evuton’wini bya hina!—Matewu 6:19-21, 33.

“Siku Lerikulu Ra Yehovha Ri Le Kusuhi”

17. Hi ku ya hi Sofaniya 1:14-16, xana siku ra Yehovha ra ku avanyisa ri tshinele ngopfu?

¹⁷ Xana siku ra Yehovha ra ku avanyisa ri tshinele ngopfu? Hi ku ya hi Sofaniya 1:14-16, Xikwembu xi nyikela xitiyisekiso lexi: “Siku lerikulu ra Yehovha ri le kusuhi. Ri le kusuhi, naswona ra hatlisa swinene. Mpfumawulo wa siku ra Yehovha wa bava. Kwalaho munhu wa matimba wa rila. Siku rero i siku ra ku hlundzuka, siku ra maxangu ni ra ku vaviseka, siku ra xidzedze ni ku onhetela, siku ra munyama ni ku dzwihala, siku ra mapapa ni ra ku dzwihala lokukulu, siku ra nanga ni ra hungwe, ku lwa ni miti leyi tiyisiweke ni ku lwa ni swihondzo swo tlakuka swa le yinhleni.”

18. Ha yini hi nga fanelanga hi gimeta hi leswaku siku ra Yehovha ra ku avanyisa ra ha ri ekule swinene?

¹⁸ Vaprista, tihosana ni vanhu va le Yuda lava dyoheke va lemukisiwile leswaku ‘siku lerikulu ra Yehovha a ri ri kusuhi.’ ‘Siku ra Yehovha a ri tshinele swinene’ eka Yuda. Hilaha ku fanaka ni le nkarhini wa hina, munhu a nga anakanyi leswaku siku ra ku avanyisa ka Yehovha ehenhla ka lavo homboloka ri le kule. Ku ri na sweswo, hilaha Xikwembu xi tekeke goza hi ku hatlisa eYuda, xi ta  ‘hatlisisa’ siku ra xona ra ku avanyisa. (Nhlavutelo 16:14, 16) Wolowo wu ta va nkarhi wo vavisa eka hinkwavo lava honisaka switsundzuxo swa Yehovha leswi nyikeriwaka hi Timbhoni ta yena ni lava va tsandzekaka ku amukela vugandzeri bya ntiyiso!

19, 20. (a) Hi swihi swin’wana swa swivumbeko swa ku avanyisa ka Xikwembu ehenhla ka Yuda na Yerusalema? (b) Hi swihi swivutiso leswi tlakusiwaka malunghana ni ndzoviso lowu hlawulaka lowu nga ta wela mafambiselo lawa ya swilo?

¹⁹ Ku tisiwa ka vukarhi bya Xikwembu ehenhla ka Yuda na Yerusalema a ku ri “siku ra maxangu ni ra ku vaviseka.” Vahlaseri va Vababilona va vangele vaaki va Yuda maxangu yo tala, ku katsa ni ku karhateka emianakanyweni loko va langutane ni rifu ni ku lovisiwa. “Siku ra xidzedze ni ku onhetela” a ri ri siku ra munyama, mapapa ni ku dzwihala lokukulu, kumbexana ku nga ri hi ndlela yo fanekisela ntsena kambe ni hi ndlela ya xiviri, hikuva musi ni ku yayarheriwa ka vanhu a ku ta va kona endhawini hinkwayo. A ku ri “siku ra nanga ni ra hungwe,” kambe ku biwa ka swona a swi nga ta pfuna nchumu.

²⁰ Varindzi va Yerusalema a va nga pfuni nchumu hikuva leswi a swi tirhisiwa ku faya makhumbi swa le Babilona a swi ri ehenhla ka “swihondzo swo tlakuka swa le yinhleni.” Makhokholo ya mafambiselo ya sweswi ya swilo yo biha a ma nge swi koti ku yimelana ni matlhari lama nga evuhlayiselweni bya Xikwembu bya matlhari, lebyi nga etilweni, lama lunghekeleke ku tirha ro sungula eku loviseni ka vanhu lava faneleke. Xana u ni ntshembo wa ku ponisiwa? Xana u yime u tiyile etlhelweni ra Yehovha, ‘loyi a rindzaka hinkwavo lava n’wi rhandzaka, kambe a nga ta lovisa hinkwavo lavo homboloka’?—Pisalema 145:20.

21, 22. Sofaniya 1:17, 18 yi ta hetiseka njhani enkarhini wa hina?

²¹ Ra chavisa hakunene siku ra ku avanyisa leri profetiweke eka Sofaniya 1:17, 18! Yehovha Xikwembu u ri: “Ndzi ta karhata vanhu, kunene va ta famba kukota vanhu lava feke mahlo; hikuva va dyohele Yehovha. Entiyisweni ngati ya vona yi ta chuluriwa ku fana ni ritshuri, ni marhumbu ya vona ku fana ni vulongo. Silivhere ya vona kumbe nsuku wa vona a swi nge swi koti ku va kutsula esikwini ra ku hlundzuka ka Yehovha; kambe misava hinkwayo yi ta herisiwa hi ndzilo wa ku hiseka ka yena, hikuva u ta tisa ndzoviso, lowu nga ni khombo hakunene, eka vaaki hinkwavo va misava.”

 ²² Hilaha a endleke hakona enkarhini wa Sofaniya, Yehovha u ta hatla a tisa ku karhateka ehenhla ka “vaaki hinkwavo va misava,” lava va alaka ku yingisa switsundzuxo swa yena. Hikwalaho ka leswi va dyohelaka Xikwembu, va ta famba-famba kukota vanhu lava feke mahlo, lava nga pfuniki nchumu, ku nga ri na loyi a va ponisaka. Hi siku ra Yehovha ra ku avanyisa, ngati ya vona “yi ta chuluriwa ku fana ni ritshuri,” kukota nchumu lowu nga pfuniki nchumu. Kunene makumu ya vona ma ta va lama nyumisaka, hikuva Xikwembu xi ta hangalasa mintsumbu—ni marhumbu—ya vanhu lava vo homboloka ehenhla ka misava, “ku fana ni vulongo.”

23. Hambileswi vadyohi va nga taka va nga poni “esikwini ra ku hlundzuka ka Yehovha,” hi wihi ntshembo lowu tameriweke hi vuprofeta bya Sofaniya?

²³ A nga kona la nga ta ponisa vanhu lava lwaka ni Xikwembu ni vanhu va xona. Silivhere ni nsuku a yi swi kotanga ku ponisa vadyohi va tiko ra Yuda, ku fana ni leswi rifuwo leri hlengeletiweke ni swifumbarheriso swi nga ta tsandzeka ku sirhelela kumbe ku ponisa Vujagana ni mafambiselo lawa hinkwawo ya swilo “esikwini ra ku hlundzuka ka Yehovha.” Esikwini rolero ro tsema timhaka, “misava hinkwayo yi ta herisiwa” hi ndzilo wa ku hiseka ka Xikwembu loko xi ri karhi xi herisa lavo homboloka. Leswi hi nga ni ripfumelo eritweni ra Xikwembu ra vuprofeta, ha tiyiseka leswaku sweswi se hi le ndzeni-ndzeni ‘ka nkarhi wa makumu.’ (Daniyele 12:4) Siku ra Yehovha ra ku avanyisa ri tshinele, naswona ku nga ri khale u ta tirihisela eka valala va yena. Kambe, vuprofeta bya Sofaniya byi nyikela ntshembo wa ku ponisiwa. Kutani, ku laveka yini leswaku hi tumbetiwa esikwini ra vukarhi bya Yehovha?

A Wu Ta Hlamula Njhani?

• Vuprofeta bya Sofaniya byi hetiseke njhani ehenhla ka Yuda na Yerusalema?

• I yini lexi yimeleke Vujagana ni vanhu hinkwavo lavo homboloka va le nkarhini wa hina?

• Ha yini hi nga fanelanga hi ehleketa leswaku siku ra Yehovha ra ku avanyisa ra ha ri ekule swinene?

[Swivutiso Swa Dyondzo]

[Xifaniso eka tluka 13]

Sofaniya u twarise hi xivindzi leswaku siku ra Yehovha ra ku avanyisa a ri tshinele

[N’wini wa Xifaniso]

Ku suka eka Self-Pronouncing Edition of the Holy Bible, leyi nga ni vuhundzuluxeri bya King James ni lebyi Pfuxetiweke

[Xifaniso eka tluka 15]

Vababilona va hlasele Yuda na Yerusalema hi siku ra Yehovha hi 607 B.C.E.

[Xifaniso eka tluka 16]

Xana u ni ntshembo wa leswaku u ta ponisiwa loko Yehovha a lovisa lavo homboloka?