Ronaldo, wa le Brazil, a a ri un’wana wa lava humeleriweke hi mhangu ya movha leyi dlayeke swirho swa ndyangu wa ka vona swa ntlhanu, ku katsa ni vatswari vakwe. U ri: “Ndzi hete tin’hweti timbirhi exibedlhele ndzi nga si byeriwa leswaku va file eka mhangu yoleyo ya movha.”

“Eku sunguleni a ndzi nga tshembi leswaku va file. Swi nga endlekisa ku yini leswaku va fa hinkwavo? Endzhaku ka loko ndzi ta va ndzi xiye leswaku mhaka yoleyo i ntiyiso, ndzi tsemeke nhlana. Ndzi twe ku vava swinene. Eka masiku lama landzeleke, a ndzi vona swi nga ha pfuni nchumu ku hanya handle ka vona. A ndzi rila siku ni siku ku ringana n’hweti hinkwayo. A ndzi tisola hi leswi ndzi tshikeke munhu un’wana a chayela movha. Loko a ku chayela mina swi nga ha endleka leswaku a va ta va va nga fanga.

“Se swi endla malembe ya 16 mhaka leyi yi endlekile naswona se ndzi hlakarherile. Hambiswiritano, rifu ra vona ra ha ndzi twisa ku vava ni namuntlha.”

Rila loko u feriwile. Bibele yi vula leswaku ku ni “nkarhi wa ku rila.” (Eklesiasta 3:1, 4) Ronaldo u ri: “Minkarhi hinkwayo loko ndzi titwa ndzi lava ku rila, a ndzi rila. A ndzi nga swi koti ku tikhoma naswona a ndzi titwa ndzi antswa loko ndzi heta ku rila.” I ntiyiso leswaku vanhu a va rili hi ndlela leyi fanaka. A swi vuli swona leswaku loko u nga tikombisi loko u ri ni gome u lwisana ni mintlhaveko ya wena kumbe leswaku u fanele u tisindzisa ku rila.

Papalata ku tihambanisa ni vanhu van’wana. (Swivuriso 18:1) Ronaldo u ri: “Ndzi ringete hi matimba leswaku ndzi nga tihambanisi ni vanhu van’wana, vanhu a va ndzi endzela naswona a ndzi va amukela. Nakambe a ndzi phofulela nkatanga ni vanghana va mina lavakulu ndlela leyi a ndzi titwa ha yona.”

U nga hlundzuki loko munhu un’wana a vula marito lama tlhavaka. Marito ya kona ma nga ha katsa yo tanihi lama nge: “U wisile.” Ronaldo u ri: “Marito man’wana lawa vanhu a va ndzi chavelela ha wona, a ma ndzi twisa ku vava.” Ematshan’weni yo dzikisa mianakanyo ya wena eka marito lama tlhavaka, yingisa xitsundzuxo xa le Bibeleni lexi nge: “U nga nyikeli mbilu ya wena emaritweni hinkwawo lawa vanhu va ma vulavulaka.”—Eklesiasta 7:21.

Dyondza ntiyiso malunghana ni xiyimo xa vafi. Ronaldo u ri: “Eka Eklesiasta 9:5, Bibele yi kombisa leswaku vafi a va le ku xanisekeni naswona sweswo swi ndzi endle ndzi va ni ku rhula ka mianakanyo. Bibele yi tlhela yi dyondzisa leswaku ku ta va ni ku pfuxiwa ka vafi kutani lava feke va ta tlhela va hanya. Xisweswo, ndzi teka varhandziwa va mina lava feke tanihi loko va ye eriendzweni.”—Mintirho 24:15.

Xana a wu swi tiva? Bibele yi hi tshembisa hi nkarhi lowu Xikwembu xi nga “ta mita rifu hi masiku.” *—Esaya 25:8.