Eka xiviko xa June 2022, muungameri wa Ntlawa Wa Bangi Ya Misava Hinkwayo u te: “Ikhonomi ya misava hinkwayo yi le khombyeni nakambe. Enkarhini wa sweswi, swilo swi ya swi durha swinene naswona vanhu a va na mali leyi ringaneke yo swi xava.”

 Xiviko xa Nhlengeletano ya Timali ya Misava Hinkwayo, xi te: “Nxavo wa petirolo ni swakudya wu tlakuke hi ku tsopeta ka tihlo, leswi endleke leswaku vanhu lava nga ematikweni lama nga ni vusweti va koka exilogweni.”

 Bibele yi hi pfuna leswaku hi twisisa leswi endlaka hi langutana ni swiphiqo leswi swa ikhonomi, yi hi byela ndlela leyi hi nga langutanaka na swona hayona yi tlhela yi hi nyika ntshembo wa leswaku swiphiqo leswi swi ta heriseriwa makumu.

•   Nkarhi lowu hi hanyaka eka wona, Bibele yi wu vitana ‘masiku yo hetelela.’—2 Timotiya 3:1.

•   Yesu u vule leswaku swilo swo “chavisa” kumbe swiendlakalo leswi tsemaka nhlana, a swi ta endleka enkarhini lowu hi hanyaka eka wona. (Luka 21:11) Vanhu va khomiwa hi rhumbyana hikwalaho ka ku durha ka swilo. Nakambe va karhateka hi vumundzuku bya vona niloko va ta swi kota ku hlayisa mindyangu ya vona.

•   Buku ya le Bibeleni ya Nhlavutelo yi profete hi ku durha ka swilo enkarhini lowu hi hanyaka eka wona. “Hiloko ndzi twa rito. . . . Ri ku: ‘Litara ya koroni yi ta xaviwa hi denari ni tilitara tinharhu ta maxalana ti ta xaviwa hi denari.’”—Nhlavutelo 6:6, Bibele Ya Matsalwa Yo Kwetsima Ya Misava Leyintshwa.

 Leswaku u dyondza swo tala mayelana ni ‘masiku yo hetelela’ ni vuprofeta lebyi nga ebukwini ya Nhlavutelo, hlalela vhidiyo leyi nge, Misava Yi Cincile Ku Sukela Hi 1914, u tlhela u hlaya nhlokomhaka leyi nge: “I Vamani Vagadi Va Mune Va Tihanci?”

•   “Va ta aka tiyindlu va tshama eka tona, va ta rima masimu ya madiriva va dya mihandzu ya wona. A va nge he aki kutani ku tshama un’wana, a va nge rimi kutani ku dya un’wana.”—Esaya 65:21, 22.

•   “Ku ta va ni ndzalo ya mavele emisaveni; ma ta va ma tele ni le henhla ka tintshava.”—Pisalema 72:16.

•   “Yehovha u ri: ‘Ndzi ta suka ndzi yima, hikuva lava xanisekaka va tshikileriwa, ni swisiwana swa konya.’”—Pisalema 12:5. a

 Ku nga ri khale Xikwembu xi ta heriswa swiphiqo hinkwaswo swa ikhonomi, ku nga ri etikweni rin’we ntsena kambe emisaveni hinkwayo. Leswaku u vona ku xi ta swi endlisa ku yini, hlaya nhlokomhaka leyi nge: “Xana Hi Ta Kala Hi Va Na Yona Ikhonomi Leyinene?”

 Kambe hambi ku ri enkarhini wa sweswi, Bibele yi nga ku pfuna leswaku u kota ku langutana ni ku durha ka swilo. Yi nga ku pfuna njhani? Yi na switsundzuxo leswi nga ku pfunaka leswaku u tirhisa mali hi vutlhari. (Swivuriso 23:4, 5; Eklesiasta 7:12) Leswaku u dyondza swo tala hi mhaka leyi, hlaya nhlokomhaka leyi nge, “Sirhelela Ntirho Wa Wena” ni leyi nge, “Ndlela yo hanya hi swimalana.”