Marcos 9:1-50

  • Ja Jesusi wa xtukbʼi ja splanta (1-13)

  • Wa xya tojbʼuk jun kerem ochel sbʼaj jun pukuj (14-29)

    • «Sbʼaja maʼ ayiʼoj skʼuʼajeli spetsanil wa xchʼak bʼobʼuk» (23)

  • Ja Jesús cha wa xyala sbʼaja xchamelali (30-32)

  • Ja snebʼumanik wa xkʼeye kʼumal sbʼa machunkiluk ja mas niwan (33-37)

  • «Ja maʼ mi kontra ay jmoktiki akuerdoni ay jmoktik» (38-41)

  • Ja jastik wa xyaʼa lok okili (42-48)

  • «Aʼajyuka watsʼmilex» (49, 50)

9  Chomajkil yala yabʼye: «Wa xkalawabʼyex meran lek: jujuntik ja matik tey il, bʼajtantoyuj oj chamuke, oj yil-e ja sGobyerno ja Dyos jakta sok ipal». 2  Wake kʼakʼu tsaʼan, ja Jesús tixa yiʼaj bʼa jun chaʼan wits ja Pedro, ja Santiago sok ja Juani. Ja yeʼnle ti ajyiye stuchʼile soka Jesús. Jaxa Jesusi tukbʼi ja splanta ja bʼa stiʼ sateʼi. 3  Ja skʼuʼi och lijpuk; sakalanixta waji sok mini jun chukʼulanum ja bʼa luʼum wa xbʼobʼ yakan sak jachuk. 4  Ja yeʼnle cha yilawe ja Elías sok ja Moisés wane loʼil soka Jesús. 5  Anto ja Pedro tixa yala yabʼ ja Jesús: «Maestro,* ¡jelni lek ja teytikon il! Oj jkʼuluktikon oxe lejchupat: june bʼa weʼna, june bʼa Moisés sok june bʼa Elías». 6  Ja smeranili, ja Pedro mini snaʼa jas oj skʼuluk, yujni jel xiwel aye. 7  Anto tixa jak jun ason sok musjiyeyuj, sok ja bʼa asoni el jun kʼumal sok yala: «Jaʼ it ja Kunin jel xkʼana. Maklayik». 8  Junta chʼaykʼujol, yajni skʼelawe ja bʼa sjoyanaleʼi, yilawe mixa maʼ teyuksoke, kechani ja Jesús. 9  Yajni koʼumekon ja bʼa witsi, ajiyile mandar yuja Jesús mok maʼ yal-e yabʼ ja jas yilaweʼi masanto ja Yunin ja Winiki* xkʼejan ja bʼa chamwiniki. 10  Ja yeʼnle skʼuʼane ja jas alji yabʼye,* pe wani sjobʼo sbʼaje jasa wa stojolan ja oj kʼejan ja bʼa chamwiniki. 11  Sok och sjobʼeyi ja Jesusi: «¿Jas yuj ja jeʼumanik bʼa ley wa xyalawe tʼilanbʼi oj jakuk bʼajtan ja Eliasi?». 12  Jaxa yeʼn yala: «Meraniʼa, ja Elías ojni jakuk bʼajtan sok oj cha stojbʼes yajkʼachil ekʼele yibʼanal ja jastik junuki. Pe ¿jas yuj kanel tsʼijbʼunubʼal ja Yunin ja Winiki jelni oj yiʼ wokol sok oj ijnajuk? 13  Pe ja keʼn wa xkalawabʼyex meran lek: ja Elías jakta sok skʼulaneyi ja jas skʼanaweʼi, jastalni tsʼijbʼunubʼalkan oj ekʼ sbʼaj». 14  Yajni kʼotye ja bʼaye ja tuk nebʼumaniki, yilawe joybʼanubʼaleyuj jun niwan nole kristyano sok jujuntik jeʼumanik bʼa ley wane kʼeʼel kʼumal soka yeʼnleʼi. 15  Kechan pabor yilawe ja Jesús ja niwan nole kristyano, yibʼanale jel cham yilawe sok ajnelxta waj yaweyi dyos. 16  Jaxa Jesús sjobʼoyile: «¿Jasa wanex kʼeʼelsok kʼumal ja yeʼnleʼi?». 17  June ja bʼa matik tey tiw sjakʼa: «Maestro, kiʼajanawi ja jkeremi yujni ochel sbʼaj jun pukuj* bʼa mi x-aji kʼumanukyuj. 18  Kada ekʼele jawa xyixtalani, wa sjipa luʼum, jaxa jkeremi wa x-el spuʼuxil ja stiʼi, wa skʼuxu ja yeji sok wa xchʼakan juntiro ja yipi. Jkʼanayi jawa nebʼumanik ayawe eluk, pe mini bʼobʼyujile». 19  Tixa sjakʼa ja Jesús: «¡Kesa lame kristyano it mey yiʼoje skʼuʼajel! ¿Janekʼto tyempo mas oj ajyukona mokex? ¿Janekʼto tyempo mas oj tekʼex? Iʼajikjanki». 20  Tixa yiʼajejanyi ja keremi. Jaxa pukuji,* kechan pabor yila ja Jesusi, kʼe ya bʼitbʼunuk ja keremi. Yajni mokʼ ja bʼa luʼumi, och sbʼaltalaʼuk sbʼaj sok och eluk spuʼuxil ja stiʼi. 21  Anto ja Jesús tixa sjobʼoyi ja tatali: «¿Janekʼxa tyempo jach wan ekʼel sbʼaj?». Jaxa yeʼn sjakʼa: «Man yal xchʼinil. 22  Jitsan ekʼele ja pukuji wa sjipa bʼa kʼakʼ ma bʼa yoj jaʼ bʼa oj smile. Pe ta ja weʼn ay jas oj bʼobʼa kʼuluk, naʼa jyajulaltikon sok koltayotikon». 23  Ja Jesús yala yabʼi: «¿Jas yuj waxa wala ‹ta ja weʼn ay jas oj bʼobʼa kʼuluk›...? Sbʼaja maʼ ayiʼoj skʼuʼajeli spetsanil wa xchʼak bʼobʼuk». 24  Ja stat ja keremi wegoxta yala: «¡Ayni kiʼoj skʼuʼajel! ¡Pe koltayon bʼa oj ajyukuj mas skʼuʼajel!». 25  Yajni ja Jesús yila jakum ajnel jun nole kristyano ja bʼayeʼi, yayi mandar ja pukuji.* Yala yabʼi: «Pukuj bʼa mi xwa kʼumanuk ja keremi sok mi xwa yabʼ kʼinal, ¡wa xkawi mandar elan ja bʼa keremi sok mokxa ochan bʼa yeʼna!». 26  Yajni chʼak awanuki sok ya bʼitbʼunukan lek ja keremi, tixa el ja pukuji. Jaxa keremi lajansok chamkani. Sok tʼusan mi yibʼanaluke wa xyalawe. «¡Chamta!». 27  Pe ja Jesusi syamayi ja skʼabʼi sok sjachakʼeni, jaxa keremi kʼe tekʼan. 28  Yajni ja yeʼn soka snebʼumanik ochye bʼa jun naʼits, ja yeʼnle nakʼulxta sjobʼoweyi: «¿Jas yuj mi bʼobʼ katikon eluk ja keʼntikoni?». 29  Tixa sjakʼayile: «Ja tikʼe pukuj it kechan wa xbʼobʼ el sok orasyon». 30  Anto tixa elye ja tiwi sok skʼutsuwe ja Galilea, pe ja Jesús mini skʼana maʼ oj snaʼe 31  yujni wan sjejelyi ja snebʼumaniki. Wa xyala yabʼye: «Ja Yunin ja Winiki oj ajuk bʼa skʼabʼ ja winike* sok oj smil-e. Pe ama smilawe, ojni sakʼwuk* bʼa yoxil kʼakʼu». 32  Ja yeʼnleʼi mi yabʼye stojol ja jas yala sok wa xiwye oj sjobʼeyi. 33  Tixa ochye bʼa Capernaúm. Yajni tixa aye bʼa naʼits, ja yeʼn sjobʼoyile: «¿Jasa wanex kʼeʼeljan kʼumal ja bʼa bʼeji?». 34  Kanye chʼabʼan, yujni ja bʼa bʼeji kʼeyejan kʼumal sbʼa machunkiluk ja mas niwan bʼa yeʼnle. 35  Jaxa yeʼni och kulan, spaya ja 12 jekabʼanumiki sok yala yabʼye: «Ja maʼ wa skʼana bʼajtan oj ajyuki, tʼilani yeʼn tsaʼanxta oj ajyuk sok oj yaʼteltay ja tuki». 36  Anto tixa spaya jun yal kerem, yaʼa bʼa yoj snalane, yaʼa ja skʼabʼ bʼa stejlubʼ ja yal keremi sok yala yabʼye: 37  «Ja maʼ wa skʼulan resibir june ja bʼa yal untik it yuj keʼna wani xcha skʼulanon resibir ja keʼni; jaxa maʼ wa skʼulanon resibir ja keʼni, mini kechan keʼn wa skʼulanon resibir, cha wani skʼulan resibir ja Maʼ sjekawoni». 38  Ja Juani yala yabʼi: «Maestro, kilatikon ay maʼ wa xya el pukuj yajel makunuk jawa bʼiʼili; pe yuja mi teyuk ekʼ jmoktiki, jleʼatikon modo skomjel». 39  Pe ja Jesús sjakʼa: «Moka leʼex modo skomjel, yujni mi maʼ wa xbʼobʼ skʼul jun milagro* yuja jbʼiʼili sok tixta oj kʼe kʼumanuk jbʼaj malo. 40  Yujni ja maʼ mi kontra ay jmoktiki akuerdoni ay jmoktik. 41  Sok wa xkalawabʼyex ja smeranili: ja maʼ wa xyawilex jun baso jaʼ yuja yeʼn sbʼajex ja Kristo ojni ajukyi meran lek ja stsʼakoli. 42  Pe ja maʼ wa xya slok yok* june ja bʼa yal chʼinik it bʼa ayiʼoje skʼuʼajel, masni lek oj ajukyi lokan ja bʼa snukʼ june ja stojnal ja molino ja it wa xya sututuk ja burro sok oj jipjuk koʼ bʼa yoj mar. 43  Ta jun ekʼele jawa kʼabʼ sloko awok,* kʼutsu ele. Masni lek meyuk juna kʼabʼ oja taʼ jawa sakʼanili yuja oj wajan sok xchabʼila kʼabʼ ja bʼa Gehena,* ja bʼa kʼakʼ mi xbʼobʼ tupuki. 44  * 45  Sok ta jawa wok wa sloko awok,* kʼutsu ele. Masni lek meyuk juna wok oja taʼ jawa sakʼanili yuja oj jipjan sok xchabʼila wok ja bʼa Gehena.* 46  * 47  Sok ta jawa sat wa sloko awok,* jipa el najat. Masni lek meyuk juna sat oj ochan ja b’a sGobyerno ja Dyosi yuja oj jipjan sok xchabʼil jawa sat ja b’a Gehena,* 48  b’a mini xcham ja yalja’i sok mi xtup ja k’ak’i. 49  Ojni tikjuke kʼakʼ yibʼanale, jastalni wa xtanjiyi yatsʼmil ja waʼelali. 50  Ja atsʼami jelni lek. Pe ta chʼay ja xchiʼili, ¿jasa oj ajuk chibʼukyuji? Aʼajyuka watsʼmilex sok ajyanik laman».

Notaʼik

^ Jach kanel ja bʼa griego: «Rabí».
^ Kʼela ja bʼa Yaljelik cholubʼal.
^ Ma bʼobʼta «yeʼntani snolowekan ja jas alji yabʼye».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «oj chʼaykʼujolajuk yuja winike».
^ Jach kanel ja bʼa griego: «oj kʼeʼuk».
^ Ma «jas jel chaʼanyabʼalil».
^ Kʼela ja bʼa Yaljelik cholubʼal, Lok okal.
^ Ma «wa xya koʼan mulal».
^ Kʼela ja bʼa Yaljelik cholubʼal.
^ Kʼela ja nota bʼa Marcos 7:16.
^ Ma «wa xya koʼan mulal».
^ Kʼela ja bʼa Yaljelik cholubʼal.
^ Kʼela ja nota bʼa Marcos 7:16.
^ Ma «wa xya koʼan mulal».
^ Kʼela ja bʼa Yaljelik cholubʼal.

Copyright sbʼaja juʼun it