Marcos 10:1-52
-
Ja nupanel sok ja skʼutsjel ja nupanel (1-12)
-
Ja Jesús ya koʼyi slekilale ja yal untiki (13-16)
-
Ja sjobʼjel yaʼa jun riko (17-25)
-
Ja jastik wa x-axikan yuja sGobyerno ja Dyosi (26-31)
-
Ja Jesús cha wa xyala sbʼaja xchamelali (32-34)
-
Ja jas skʼanawe ja Santiago soka Juan (35-45)
-
Ja Jesusi jun slokʼol bʼa yajel el libre jitsan kristyano (45)
-
-
Wa xya tojbʼuk jun winik mi xyila kʼinal sbʼiʼil Bartimeo (46-52)
10 Tsaʼan tixa el ja tiwi sok kʼot ja bʼa stsʼajkanil ja Judea, ja bʼa stiʼ jun lado ja Jordán. Yajkʼachil ekʼele stsomo sbʼaj jitsan kristyano ja bʼa sjoyanali. Sok jastalni kʼajyel wa skʼulan, och sjeʼyile.
2 Anto tixa mojxiye soka Jesús jujuntik fariseoʼik bʼa wa skʼanawe oj yawe och probar sok sjobʼoweyi ta wa xbʼobʼ skʼuts ja snupanel jun winik soka xcheʼumi.
3 Jaxa yeʼn sjakʼayile: «¿Jas mandar yawilex ja Moisés?».
4 Ja yeʼnle yalawe: «Ja Moisés yaʼakan atsʼijbʼaxuk jun sjuʼunil bʼa skʼutsjel nupanel sok tixa xyaʼakan awajuk».
5 Anto ja Jesús tixa yala yabʼyeʼa: «Ja Moisés stsʼijbʼanawilex ja mandar jaw yuja jel chʼuʼuy jawa kʼujolexi.
6 Pe ja bʼa skʼeʼulabʼil ja kʼulbʼeniki ja Dyos* ‹skʼulan winik sok ixuk›
7 sok ‹ja yuj ja winiki ojni yakan ja stat soka snani
8 sok june ita oj kʼotuke xchawanile›, ja yuj mixani chawaneʼuke, kechanxtani june kʼotele.
9 Ja yujil, ja jas yaʼunej staʼ sbʼaj ja Dyosi, mokni spil mini jun winik».
10 Yajni cha tixa aye bʼa naʼitsi, ja nebʼumaniki och sjobʼeyi sbʼaja it.
11 Ja yeʼn tixa yala yabʼye: «Spetsanil ja maʼ wa skʼutsu ja snupanel soka xcheʼumi sok xnupanisok pilan wani xchʼaykʼujolan ja snupanel soka bʼajtan ixuki.
12 Sok ta jun ekʼele jun ixuk skʼutsu ja snupanel soka statami sok xnupanisok pilan, ja yeʼn cha wani xchʼaykʼujolan ja nupaneli».
13 Anto ja kristyano tixa k’e yiʼejanyi yal untik bʼa oj ya kajan ja skʼabʼ* bʼa yeʼnle, pe utjiye yuja nebʼumaniki.
14 Yajni yila ja it ja Jesusi, tajki sok tixa alji yabʼye: «Aʼawikan amojxuke jmok ja yal untiki. Moka leʼex modo stimjel, yujni ja sGobyerno ja Dyos yeʼn sbʼaje ja matik jachuke jastal yeʼnle.
15 Wa xkalawabʼyex meran lek: ta ay maʼ mi skʼulan resibir ja sGobyerno ja Dyosi, jastal jun yal untik wa skʼulan resibir ja jastiki, mini nunka oj ochuk ja tiwi».
16 Ti stela ja yal untiki sok yayi kajan ja skʼabʼ bʼa yajel koʼuk slekilale.
17 Yajni ti wajum bʼa bʼeji, ajnelxta jak jun winik, koʼ mekʼan bʼa stiʼ sat sok sjobʼoyi: «Lekil Maestro, ¿jasa tʼilan oj jkʼuluk bʼa oj jtaʼ ja sakʼanil bʼa tolabida?».
18 Jaxa Jesús yala yabʼi: «¿Jas yuj waxa walakabʼ lekil Maestro? Mini maʼ lek, kechani june, jaʼitani ja Dyosi.
19 Ja weʼn waxa naʼa ja mandariki: mok milwanan, moka chʼaykʼujoluk ja nupanel, mok elkʼanan, moka leyi lom smul ja tuki, moka loʼlay ja tuki b’a yijelkanyi ja jastik sbʼaji, kisa jawa tat sok jawa nani».
20 Jaxa winiki yala: «Maestro, ja keʼn jkʼuʼunej yibʼanal ja jastik jaw man jchʼinil».
21 Ja Jesús skʼela ja winiki sok jak syajulal skʼujol bʼa yeʼna, tixa yala yabʼa: «Wa skʼulanawuj palta jun jasunuk, kax chono ja jasa wiʼoji sok ayi ja takʼin ja matik pobre; jachuk oj ajyukawuj jastik junuk jel chaʼanyabʼal ja bʼa satkʼinali. Ti la jaka sok kʼotan jnochuman».
22 Yajni yabʼ ja jas aljiyabʼi, ja winiki el sgana sok jel triste waji, yujni jel yiʼoj jitsan jastik sbʼaj.
23 Yajni chʼak skʼel ja bʼa sjoyanali, ja Jesús yala yabʼ ja snebʼumaniki: «¡Jelni wokol oj yabʼye ochel ja bʼa sGobyerno ja Dyos ja matik jel yiʼoje takʼini!».
24 Pe ja snebʼumaniki chamto yabʼye ja jas yala. Anto ja Jesús tixa yala yabʼyeʼa: «Kala kuntikil, ¡jelni wokol ochel ja b’a sGobyerno ja Dyosi!
25 Masni pasil oj ekʼuk jun camello bʼa sjotol jun tsʼistakʼin ke yuj jun riko oj ochuk ja bʼa sGobyerno ja Dyosi».
26 Ja jawi mastoni jel cham yabʼye sok yalawe yabʼi:* «Anto, ¿machunkiluk oj bʼobʼ staʼ sakʼanil?».
27 Ti kan kʼeljuke lek yuja Jesús sok alji yabʼye: «Sbʼaja kristyano mini tʼun oj bʼobʼuka, pe mini jachukuk sbʼaja Dyosi, yujni sbʼaja Dyosi yibʼanal wa xchʼak bʼobʼuk».
28 Jaxa Pedro tixa kʼe yalyabʼa: «Pe kʼela, ja keʼntikoni kaʼunejtikonkan spetsanil bʼa oj jnochatikon».
29 Ja Jesús yala yabʼye: «Wa xkalawabʼyex meran lek: spetsanil ja maʼ yaʼunejkan snaj, yermanoʼik, yermanaʼik, snan, stat, yuntikil ma yalaje yuj keʼna sok yuja lekil rasoniki
30 ojni ajyukyujile ja bʼa tyempo it 100 ekʼele mas ja snaje, yermanoʼik, yermanaʼik, snan, yuntikil ma yalaje, ama wan ijel spatike, jaxa bʼa tyempo* jakumi, sakʼanile bʼa tolabida.
31 Pe jitsan ja matik bʼajtane oj kanuke tsaʼan, sok jitsan ja matik tsaʼane oj ekʼuke bʼajtan».
32 Jaxa wego ti wajumekʼe bʼa sbʼejlal Jerusalén. Ja Jesusi yeʼn wajum bʼajtan, jaxa snebʼumaniki jelni x-och spensare, sok ja matik jakum patikajeli jel xiwye. Sok yajkʼachil ekʼele yiʼaj el pilan ja 12 jekabʼanumiki sok ochni ya julskʼujole ja jastik ojxta ekʼ sbʼaji.
33 Ti yalaʼa: «Kʼelawik, ti wajumotikʼe bʼa Jerusalén, jaxa tiw ja Yunin ja Winiki oj ajuk bʼa skʼabʼ ja olomalik sacerdote sok ja jeʼumanik bʼa leyi. Ja yeʼnleʼi ojni yal-e amiljuk sok oj yaʼe bʼa skʼabʼ ja matik mi judíoʼuki.
34 Ja yeʼnleʼi oj skʼuluke burlar, oj stsujbʼuke, oj yaweyi tsʼuʼum* sok oj smil-e, pe ja bʼa yoxil kʼakʼu oj sakʼwuk».*
35 Ja yuntikil ja Zebedeo, ja Santiago soka Juani, tixa mojxiye soka Jesús sok ti yalawe yabʼa: «Maestro, wa xkʼanatikon oja wakitikon keʼntikon ja jas oj jkʼantikonawiʼi».
36 Ja Jesús sjobʼoyile: «¿Jasa waxa kʼana oj kawilexi?».
37 Ja yeʼnle yalawe: «Aʼakan oj kulanukotikona mok ja yajni tixa aya bʼa wa Gobyerno, june bʼa stojola kʼabʼ sok june bʼa wa surda».
38 Pe ja Jesús yala yabʼye: «Ja weʼnlexi mixa naʼawex ja jas wanex skʼanjeli. ¿Yuj maʼ oj bʼobʼa wuʼex ja bʼa copa wanon yujel ja keʼni? Ma ja tik’e yijel ja’ wan ajelki ja keʼni, ¿oj maʼ cha bʼobʼa wiʼex ja weʼnlexi?».
39 Ja yeʼnle sjakʼawe: «Ojniʼa». Anto ja Jesús tixa yala yabʼyeʼa: «Ja weʼnlexi ojni awuʼex ja bʼa copa wanon yujeli sok oja wiʼex ja tikʼe yijel jaʼ jastalni wan ajelki ja keʼni.
40 Pe mi keʼnuk wa xkala matik oj kulanuke ja bʼa stojol jkʼabʼi ma ja bʼa jsurda. Ja lugarik jaw yeʼnani sbʼaje ja matik chapubʼalyileʼi».
41 Yajni yabʼye ja tuk lajune sbʼaja it, jel tajkiye soka Santiago soka Juani.
42 Pe tixa tsomjiye yuja Jesús sok aljiyabʼye: «Ja weʼnlexi wani xa naʼawex ja matik wa xnaji sbʼaje jastal mandaranumik ja bʼa chonabʼiki mandar ayuj ja chonabʼi sok jaxa winike bʼa ay chaʼan xchole wa skʼulane mandar ja kristyano.
43 Pe mini jach oja kʼulukex ja weʼnlexi. Pes ja maʼ wa skʼana oj kʼotuk mas niwan bʼa weʼnlex tʼilan oj yaʼteltay ja tuki
44 sok ja maʼ wa skʼana bʼajtan oj ajyuk bʼa weʼnlex tʼilan oj kʼot mosoʼal sbʼaja tuki.
45 Sok asta ja Yunin ja Winiki* mini jak bʼa oj aʼteltajuk, jakni bʼa oj yaʼteltay ja tuki sok bʼa yajel ja sakʼanil jastal slokʼol* bʼa yajel el libre jitsan kristyano».
46 Anto tixa ochye ja bʼa Jericó. Yajni ja Jesús soka snebʼumanik elume ja bʼa Jericó sok jun niwan nole kristyano, ja Bartimeo (yunin ja Timeo), ti kulan ekʼ bʼa stiʼ bʼej, jun winik pobre mi xyila kʼinal.
47 Yajni yabʼ yeʼn ja Jesús ja Nazareno ja maʼ ti ekʼum tiw, och awanuk: «¡Jesús, Yunin ja David!* ¡Naʼa jyajulal!».
48 Yuja jaw, jitsan kʼe yut-e sok wa xyalawe yabʼ achʼajbʼajuk, pe ja yeʼn masto och awanuk: «¡Yunin ja David,* naʼa jyajulal!».
49 Ja yuj ja Jesús kʼot tekʼan sok yala yabʼye: «Payawik, ajakuk ili». Jaxa yeʼnle yalawe yabʼ ja maʼ mi xyila kʼinali: «¡Tsatsankʼujolanabʼaj! Kʼeʼan, wa spayawa».
50 Wegoxta sopokan ja spal kʼuʼi, wegoxta kʼe tekʼan sok waj ja bʼay ja Jesusi.
51 Anto ja Jesús tixa sjobʼoyiʼa: «¿Jasa waxa kʼana oj jkʼulukawiʼi?». Ja maʼ mi xyila kʼinali sjakʼa: «Maestro,* ajamxuk ja jsati».
52 Jaxa Jesús ti yala yabʼa: «Kaʼax, tojbʼiyata yuja waxa kʼuʼani». Jaxa winiki wegoxta cha kʼe yil kʼinal sok tixa kʼe snocha.
Notaʼik
^ Jach kanel ja bʼa griego: «ja yeʼn».
^ Wa xkʼan alxuk, bʼa oj ya koʼyi slekilale.
^ Ma bʼobʼta «yeʼnta yala sbʼaje».
^ Kʼela ja bʼa Yaljelik cholubʼal, Ja jastal wa xtax ja tyempo.
^ Kʼela ja bʼa Yaljelik cholubʼal, Yajel tsʼuʼum.
^ Jach kanel ja bʼa griego: «oj kʼeʼuk».
^ Kʼela ja bʼa Yaljelik cholubʼal.
^ Ma «stsʼakol». Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Jach kanel ja bʼa griego: «Rabbóni».
