Marcos 15:1-47
15 Kechan pabor sakbʼi, ja olomalik sacerdote, ja ansyanoʼik sok ja jeʼumanik bʼa ley, wa xkʼan alxuk, yibʼanal ja Sanedrín, stsomo sbʼaje bʼa xchapjel jas oj skʼuluke; sok yajni smochoweta ja Jesús, tixa yiʼaje och sok yaweyi ja Pilato.
2 Jaxa Pilato yayi ja sjobʼjel it: «¿Weʼn maʼ ja srey ja judíoʼiki?». Jaxa Jesús sjakʼayi: «Weʼn wana yaljel».
3 Pe ja olomalik sacerdote wa sleʼaweyi jitsan smul.
4 Anto ja Pilato cha kʼe sjobʼyi. Yala yabʼi: «¿Mi jas oja wale? Abʼan jawa mulik wa xlejiwiʼi».
5 Pe ja yeʼn mixani jas sjakʼayi, jaxa Pilato jel aji ochkan spensar yuja jaw.
6 Pe bʼa kada kʼin, ja Pilato kʼajyel wa sijpan ja presoʼanum wa skʼanawe ja kristyano.
7 Ja bʼa tyempo jaw lutubʼal preso jun winik sbʼiʼil Barrabás. Ja yeʼn soka tuk matik lutubʼalsoki skontraʼanuneje ja gobyerno sok milwanele.
8 Ja yuj ja nole kristyano mojxiyejani sok kʼe skʼaneyi ja Pilato a-skʼuluk ja jas kʼajyel wa xkʼulajiyileʼi.
9 Jaxa yeʼn sjakʼayile: «¿Wan maʼ xa kʼanawex oj sijpuk ja srey ja judíoʼiki?».
10 Yujni ja Pilato wa snaʼa kʼinal ja olomalik sacerdote skʼulane entregar ja Jesús yuj imbidia.
11 Pe ja olomalik sacerdote wanexta yaljel yabʼ ja nole kristyano bʼa a-skʼane asijpajuk ja Barrabás.
12 Yajkʼachil ekʼele ja Pilato ti yala yabʼyeʼa: «Anto, ¿jasa oj jkʼulyi ja winik it ja maʼ waxa wawex sbʼiʼiluk srey ja judíoʼiki?».
13 Jaxa yeʼnleʼi cha awaniye: «¡Akʼeʼuk lokan bʼa poste!».
14 Jaxa Pilato wa xyala yabʼye: «Pe ¿jas yuj? ¿Jasa smul staʼuneji?». Ama jachuk, ja yeʼnleʼi masto tsats awaniye: «¡Akʼeʼuk lokan bʼa poste!».
15 Ja yuj ja Pilato, yuja wa skʼana oj ya gustoʼaxuk ja nole kristyano, sijpanyile ja Barrabás. Sok yajni yaʼata mandar bʼa aʼajukyi tsʼuʼum* ja Jesús, skʼulan entregar bʼa oj yawe kʼe lokan ja bʼa poste.
16 Anto ja soldadoʼiki yiʼaje och ja Jesús bʼa patio, ja it tey bʼa yoj spalacio ja mandaranumi, sok stsomowe yibʼanal ja tropa soldadoʼiki.
17 Yawe slap jun chakal morado* kʼuʼal sok xchʼitawe jun korona kʼiʼix sok yawe slape.
18 Sok kʼe yawaye: «¡Viva ja srey ja judíoʼiki!».
19 Chomajkil, wa smakʼaweyi ja yolom sok jun kʼaʼem sok wa stsujbʼane. Cha wa xkoye sbʼaj mekʼan sok wa xkoye sbʼaj tinan.
20 Yajni chʼak skʼuluke burlari, sopoweyi ja chakal morado kʼuʼali sok cha yawe slapkan ja skʼuʼi. Sok tixa yiʼaje-el bʼa juera bʼa oj stsʼapeyi sklaboʼil ja bʼa poste.
21 Ti ekʼum tiw jun winik julum ja bʼa chonabʼi, jani ja Simón bʼa Cirene, jaʼ state ja Alejandro sok ja Rufo, sok stʼenawe bʼa oj skuch ja poste bʼa yijel wokol.*
22 Sok yiʼaje ja Jesús ja bʼa lugar sbʼiʼil Gólgota, ja sutubʼali wa stojolan «lugar bʼa sbʼakel olomal».
23 Ja tiw sleʼawe modo yajelyi vino sokubʼalsok jun droga sbʼiʼil mirra,* pe ja yeʼn mini skʼana oj yuʼe.
24 Tixa stsʼapaweyi sklaboʼil ja bʼa poste sok tixa yawe-el suerteʼe bʼa oj spil sbʼaje ja skʼuʼi, bʼa yiljel jasa oj yiʼekani.
25 Ja it jaxani ja yoxil ora* yajni stsʼapaweyi sklaboʼil ja bʼa poste.
26 Sok ja letrero bʼa stsʼijbʼane jas yuj milji wa xyala: «Ja srey ja judíoʼiki».
27 Chomajkil, ja bʼa stsʼeʼeli aji kʼe lokan chabʼ elkʼanum, june bʼa stojol skʼabʼ sok june bʼa surda.
28 *
29 Jaxa matik ekʼume tiwi wa xyalawe yabʼ jastik wa xyajbʼesni sok wa snikawe ja yolome, wa xyalawe: «Ja weʼn, ja maʼ oj sjem ajyi ja templo sok oj ya kʼeʼuk bʼa oxe kʼakʼu,
30 koʼan ja bʼa poste bʼa yijel wokol* sok kolta abʼaj».
31 Jaxa olomalik sacerdote soka jeʼumanik bʼa ley cha jachni wa skʼulane burlar. Wa xyala sbʼaje: «¡Skoltay ja tuki, pe ja yeʼn mi xbʼobʼ skoltay sbʼaj!
32 Ja Kristo, ja srey ja Israel, akoʼuk ja wego ja bʼa poste bʼa yijel wokol.* Yajni xkilatiki, oj jkʼuʼuktik». Cha jachni ja matik lokan ja bʼa stsʼeʼeli cha wane skʼenajel.
33 Yajni staʼa ja swakil ora,* kʼikʼbʼi yibʼanal ja luʼumi sok albʼi man sbʼalunil ora.*
34 Sok ja bʼa sbʼalunil ora, ja Jesús awani tsats: «Éli, Éli, ¿láma sabaktáni?», ja sutubʼali wa stojolan «Kala Dyos, kala Dyos, ¿jas yuj ajipawontakani?».
35 Jujuntik ja matik mojan aye ja tiwi, yajni yabʼye, och yal-e: «¡Kʼelawik, wan spayjel ja Elías!».
36 Anto ajnelxta ay maʼ waj suljan jun esponja* bʼa pajal vino, ya och bʼa jun kʼaʼem sok ya mojxukyi bʼa oj yuʼe. Wa xyala: «¡Aktayikani! La kiltik ta oj jak ya koʼuk ja Elíasi».
37 Pe ja Jesús awani tsats lek sok chami.*
38 Sok chʼi ja skortinaʼil ja lugar jel sak ja bʼa templo, chʼikon man kʼeʼel man yibʼel.
39 Pe yajni ja olomal bʼa soldadoʼik ti tekʼan ekʼ bʼa stiʼ sat ja Jesús sok yila ekʼ ja jastik jaw ja yajni chami, ti yalaʼa: «Meran lek, ja winik it Yunini Dyos ajyiʼa».
40 Cha ti wane kʼelwanel najat jujuntik ixuke. Ja bʼa ixuke it tey ja María Magdalena, ja María ja snane ja Ijtsʼinal* Santiago sok ja Josés, sok ja Salomé.
41 Ja ixuke it smojtaye ja Jesús sok skoltaye ja yajni ti ajyi bʼa Galilea. Cha ti ajyiye jitsan ixuke bʼa lajan kʼeyekʼesok ja bʼa Jerusalén.
42 Yuja chʼakumxa ja ochkʼakʼu sok jato skʼakʼujil ja chapjelali,* wa xkʼan alxuk, ja kʼakʼu bʼajtanto bʼa sábado,
43 ti jak ja José bʼa Arimatea, june maʼ jel kisubʼal ja bʼa Sanedrín* sok cha wani smajlajel ja sGobyerno ja Dyosi. Ja yeʼn stsatsankʼujolan sbʼaj, waj staʼ loʼil ja Pilato sok skʼanayi ja skuerpo ja Jesús.
44 Pe ja Pilato wa sjobʼo sbʼaj ta chamta ja Jesusi, ja yuj sjeka spayjel ja olomal bʼa soldadoʼiki sok sjobʼoyi ta chamta.
45 Yajni ja olomal bʼa soldadoʼik jak yalyabʼ chamta, tixa yayi permiso ja José bʼa oj yiʼ ja skuerpo.
46 Jaxa José smana kʼuʼuts bʼa lino jel pino sok ya koʼuk ja skuerpo ja Jesús. Tixa sbʼechʼa soka kʼuʼutsi sok ti yaʼa bʼa jun kʼeʼen jotubʼal ja bʼa toni; anto tixa sbʼaltsunkan jun ton ja bʼa stiʼ kʼeʼeni.
47 Pe ja María Magdalena sok ja María ja snan ja Josés ti kan skʼel-e ja lugar bʼa yaʼawekani.
Notaʼik
^ Kʼela ja bʼa Yaljelik cholubʼal, Yajel tsʼuʼum.
^ Jach kanel ja bʼa griego: «púrpura».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Wa xkʼan alxuk, mojan bʼa las 9 bʼa saʼan sakbʼel.
^ Kʼela ja nota bʼa Marcos 7:16.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Wa xkʼan alxuk, mojan bʼa las 12 bʼa kulan kʼakʼu.
^ Wa xkʼan alxuk, mojan bʼa las 3 bʼa ochkʼakʼu.
^ Ja tikʼe esponja it ti wa x-aji eluk bʼa jun tikʼe yal chante bʼa mar sok wani xyuʼajkan ja jaʼi.
^ Ma «el ja yikʼi».
^ Ma «Kusan».
^ Kʼela ja bʼa Yaljelik cholubʼal, Skʼakʼujil bʼa chapjelal.
^ Kʼela ja bʼa Yaljelik cholubʼal.
