Marcos 2:1-28
2 Pe jujuntik kʼakʼu tsaʼan, ja Jesús cha ochkʼot ja bʼa Capernaúm sok wego pukxi yabʼalil tey bʼa naʼits.
2 Ja yuj jel jitsan stsomo sbʼaje sok mixa ay lugar bʼa oj ajyuke, mixani ja bʼa stiʼ puerta. Jaxa yeʼni k’e xchol yabʼye ja lekil rasoni.
3 Anto tixa yiʼajejanyi jun winik mi xbʼobʼ snik sbʼaj. Ja yeʼn ikʼubʼaljan yuj chane winike.
4 Pe yuja jel jitsan ja kristyano, ja yuj mini bʼobʼ yiʼe och man bʼay ja Jesús. Ja yuj, yawe-el jun parte ja yolom naʼits ja bʼa mero bʼay ja Jesús, sok ja bʼa sjotoweʼi ti yawe koʼuk ja swaynubʼ bʼa bʼaʼan ekʼ ja winik mi xbʼobʼ snik sbʼaji.
5 Yajni yila ja skʼuʼajel yiʼojeʼi, ja Jesús yala yabʼ ja winik mi xbʼobʼ snik sbʼaji: «Kala kerem, kaʼata perdon jawa muli».
6 Pe ti kulane tiw jujuntik jeʼumanik bʼa ley sok jach wan kʼumanel skʼujole:
7 «¿Jas yuj jach wan kʼumal ja winik it? Wan kʼumanel kistal. ¿Mi maʼ kechan yeʼnuk ja Dyos ja maʼ wa xbʼobʼ ya perdon ja mulali?».
8 Ja Jesús wegoxta yaʼa sbʼaj kuenta* bʼa jach wane yaljel sbʼaje, sok tixa yala yabʼye: «¿Jas yuj jach wan kʼumanel jawa kʼujolexi?
9 ¿Bʼaya mas pasili? ¿Yaljel yabʼ ja winik mi xbʼobʼ snik sbʼaji ‹kaʼata perdon jawa muli›, ma yaljel yabʼ ‹kʼeʼan, iʼaj jawa waynubʼi sok bʼejyan›?
10 Pe bʼa oja wil-ex ja Yunin ja Winiki* ayni yiʼoj ja cholal ja bʼa luʼumi bʼa yajel perdon ja mulali...». Anto, tixa yala yabʼ ja winik mi xbʼobʼ snik sbʼaji:
11 «Ja keʼn wa xkalawabʼi: kʼeʼan, tulu jawa waynubʼi sok kaʼax bʼa wa naj».
12 Jaxa yeʼn, wegoxta stulu sbʼaj bʼa stiʼ sat ja tuki, yiʼaj ja swaynubʼi sok bʼejyelxa eli. Yibʼanale jelni ochkan spensare sok stoyowe ja Dyosi. Ja yeʼnle yalawe: «Mini bʼa kilunejtikon jachuka».
13 Jaxa Jesusi cha waj bʼa stiʼ mar. Yibʼanal ja kristyano wa xjak yil-e, jaxa yeʼn kʼe sjeyile.
14 Jaxa yajni wajum och bʼejyeli, ti yila ja Leví* ja yunin ja Alfeo. Ja yeʼn ti kulan ekʼ ja bʼa lugar wa stsomxi kontribusyon sok yala yabʼ: «Laʼ, nochowon». Jaxa Leví wegoxta kʼeʼi sok snocho.
15 Mas tsaʼan, ja Jesús soka snebʼumaniki ti waʼye* bʼa snaj. Cha ti ajyisoke ja bʼa waʼel* jitsan tsoma kontribusyon sok mulanumik. Pes jitsan bʼa yeʼnle wa snochowe ja Jesús.
16 Pe ja jeʼumanik bʼa ley bʼa kʼotele fariseoʼik,* yajni yilawe ja Jesús wa xwaʼ soka mulanumik sok ja tsoma kontribusyonik, ti kʼe yale yabʼ ja snebʼumanik ja Jesús: «¿Ja yeʼn wa xwaʼ soka tsoma kontribusyonik sok ja mulanumiki?».
17 Yajni yabʼ ja Jesusi, ti yala yabʼ ja yeʼnleʼi: «Ja maʼ yij ayeʼi mi xmakuniyujile jun loktor, pe ja matik maloʼayi waniʼa. Ja keʼn mi jaʼuk jakyon yuja matik toji, jani yuja mulanumiki».
18 Pe ja snebʼumanik ja Juan sok ja fariseoʼiki ayiʼoje ja kostumbre bʼa stekʼjel waʼin. Ja yuj ja yeʼnle jakye sok sjobʼoweyi: «¿Jas yuj ja snebʼumanik ja Juan sok ja snebʼumanik ja fariseoʼik ayiʼoje ja kostumbre bʼa stekʼjel waʼin pe miyuk jawa nebʼumaniki?».
19 Jaxa Jesús sjakʼayile: «Yajni tito ay soka yamigoʼik ja nobioʼali, mini yajnaluk oj stekʼe waʼin ja yeʼnleʼi, ¿anke meran? Mini sbʼejuk oj stekʼe waʼin yajni tito aysoke ja nobioʼali.
20 Pe ojni kʼotuk ja kʼakʼu oj japjukyile ja nobioʼali, jaxa bʼa kʼakʼu jaw ojni stekʼe waʼin.
21 Mini maʼ xya makunuk yajkʼachil kʼuʼuts bʼa smaktontajel jun poko kʼuʼuts. Yujkʼa ay maʼ skʼulan, yajni stsumu sbʼaj ja yajkʼachil kʼuʼutsi, ojni stim ja poko kʼuʼutsi sok masto oj chʼi ele.
22 Cha mini maʼ wa xya ochuk yajkʼachil vino bʼa poko yeʼtalik. Yujkʼa ay maʼ skʼulan, ja vino oj xchʼi ja tsʼuʼumi sok oj chʼayuk ja vino, sok mixa oj makunuk ja yeʼtaliki. Ja yuj ja yajkʼachil vino tini wa x-axi ochuk bʼa yajkʼachil yeʼtalik».
23 Jun sabadoʼil, yajni ja Jesús ti ekʼum ja bʼa yalajilik trigo, ja snebʼumaniki kʼe stul-e jujuntik xchiwanal trigo ja yajni wane bʼejyeli.
24 Ja yuj ja fariseoʼiki yalawe yabʼ ja Jesús: «¡Kʼelawil! ¿Jas yuj wane skʼulajel ja jas mi xbʼobʼ kʼulaxuk ja bʼa sábado?».
25 Jaxa yeʼn sjakʼayile: «¿Yuj maʼ mi bʼa akʼumunejex ja jas skʼulan ja David yajni ja yeʼn soka swiniki ochyujile waʼin?
26 ¿Yuj maʼ mi bʼa akʼumanex ja loʼil sbʼaja olomal sacerdote Abiatar sbʼaja jas skʼulan ja David ja yajni och ja bʼa snaj ja Dyosi? Ja yeʼn sweʼa ja pan wa x-axi bʼa stiʼ sat ja Dyosi sok cha yayi ja swiniki. Sok mini ay tuk maʼ wa xbʼobʼ yabʼ ja pan jaw, kechani ja sacerdoteʼiki».
27 Anto ja Jesús tixa yala yabʼye: «Ja sábado kʼulaji bʼa slekilal ja kristyano, pe ja kristyano mi kʼulajiye bʼa stalnajel ja sábado.
28 Ja yuj ja Yunin ja Winiki cha Yajwalilni ja sábado».
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Kʼela ja bʼa Yaljelik cholubʼal.
^ Cha wa sbʼiʼilan Mateo.
^ Ma «ti tsʼelaniye bʼa mesa».
^ Ma «tsʼelan ja bʼa mesa».
^ Kʼela ja bʼa Yaljelik cholubʼal.
