Marcos 8:1-38

  • Ja Jesús yayi swaʼel 4,000 winike (1-9)

  • Skʼanaweyi ayaʼ jun senya (10-13)

  • Ja slevadura ja fariseoʼik sok ja bʼa Herodes (14-21)

  • Wa xya tojbʼuk jun winik mi xyila kʼinal bʼa Betsaida (22-26)

  • Ja Pedro wa xyala ja Jesús yeʼn ja Kristo (27-30)

  • Ja Jesús wa xyala sbʼaja xchamelali (31-33)

  • Ja jas wa xmajlaxi bʼa jun snochuman Jesús (34-38)

8  Ja b’a kʼakʼujik jaw cha stsomo sbʼaj jun niwan nole kristyano. Pe yuja mey yiʼoje jas oj yabʼye, ja Jesús sjeka spayjel ja snebʼumaniki sok yala yabʼi: 2  «Wa syatsʼa sbʼaj ja jkʼujol yiljel ja kristyano jumasaʼ it, yujni ayxa oxe kʼakʼu tey jmoke sok mixa jas yiʼoje bʼa oj yabʼye. 3  Ta jekawe bʼa snaje sok waʼin,* ojni tup yikʼe ja bʼa bʼeji. Jujuntik jelni najat jakele». 4  Jaxa snebʼumaniki yalawe yabʼi: «Ja lugar it jel najat ay, ¿bʼaxa oj taxuk pan bʼa yajel waʼuk ja jitsan kristyano it?». 5  Anto, ja Jesús tixa sjobʼoyile: «¿Janekʼ pan awiʼojex?». Tixa sjakʼaweyi: «Juke». 6  Ja yeʼn tixa yala yabʼ ja nole kristyano akulanuke bʼa luʼum. Tixa yiʼaj ja juke pani, yayi tsʼakatal ja Dyosi, tixa xetʼaʼa sok tixa kʼe yayi ja snebʼumaniki bʼa oj yaweyi ja kristyano jumasaʼ. Jaxa yeʼnleʼi yaweyi ja nole kristyano. 7  Sok cha ayiʼoje jujuntik yal chay, ja yuj yajni chʼak yayi orasyon,* cha tixa yala ayawe ekʼuk. 8  Ja yuj chʼak waʼuke sok bʼutʼel lek kanye. Sok stsomowekan juke niwak moʼoch ja pedasoʼik pan kan sobra. 9  Ajyi junuk 4,000 winike. Tsaʼan tixa jekjiye yuja Jesusi. 10  Wegoxta kʼe ja bʼa chʼin barko soka snebʼumaniki sok tixa och bʼa slujmalil Dalmanuta. 11  Tixa jakye ja fariseoʼiki sok och skʼakʼlaye bʼa tarega aya jun senya bʼa satkʼinal. Jach sleʼawe modo yajel och probar. 12  Ja yeʼn sikʼa skʼujol* sok yala: «¿Jas yuj ja lame kristyano it tolabida wan slejel jun senya? Wa xkalawabʼyex meran lek: ja lame kristyano it mini oj ajukyile jun senya». 13  Tixa ajiyekan yuja Jesusi, tixa cha kʼe ja bʼa chʼin barko sok waj bʼa stiʼ jun lado. 14  Pe ja nebʼumaniki chʼay skʼujole yijel och pan. Pes kechan jun pan yiʼoje ja bʼa chʼin barko. 15  Jaxa Jesús yala yabʼye jaman lek: «Awik ajyuk jaman lek jawa satexi. Talnabʼajik soka slevadura ja fariseoʼik sok ja slevadura ja Herodes». 16  Ja yuj yeʼnxta kʼeye kʼumal yuja mey yiʼoje pani. 17  Yuja snaʼa kʼinal ja Jesusi, tixa yala yabʼyeʼa: «¿Jas yuj wanex kʼeʼel kʼumal yuja mey pani? ¿Yuj maʼ mito xkʼota naʼex ma mito xa wabʼyex stojol ja jas wanon yaljeli? ¿Yuj maʼ jelto lutan jawa pensarex bʼa yabʼjel stojolil? 18  ‹Ama aya satex, ¿mixa wilawex?; ama aya chikinex, ¿mixa wabʼyex kʼinal?›. ¿Yuj maʼ mixa xjula kʼujolex 19  ja yajni jxetʼa ja joʼe pan sbʼaja 5,000 winiki? ¿Janekʼ moʼoch bʼutʼel atsomowex ja sobra?». Ti sjakʼaweyiʼa: «Doce». 20  «Sok yajni jxetʼa ja juke pan sbʼaja 4,000 winiki, ¿janekʼ niwak moʼoch bʼutʼel atsomowex ja sobra?». Ti sjakʼaweyiʼa: «Juke». 21  Tixa sjobʼoyileʼa: «¿Sok mitoni xa wabʼyex stojol?». 22  Tixa kʼotye b’a Betsaida. Jaxa tiw ja kristyano yiʼajejanyi june maʼ mi xyila kʼinal sok spataweyi skʼujol a-syam. 23  Tixa xchecha ela sok ya eluk ja bʼa yoj komoni. Yajni stsujbʼanyi ja sati, tixa yaʼa kajan ja skʼabʼi sok sjobʼoyi: «¿Ay maʼ jas waxa wila?». 24  Ja winiki sjacha ja sati sok yala: «Wa xkila kristyanoʼik, pe lajansok teʼik wan bʼejyel». 25  Ja Jesús cha yaʼa kajan ja skʼabʼ ja bʼa sat ja winiki, jaxa yeʼn yilaxa lek kʼinal. Ja yeʼn tojbʼi ja sati sok ilwanixa lek. 26  Tixa sjeka bʼa snaj sok yala yabʼi: «Mok ochan ja bʼa komoni». 27  Tsaʼan ja Jesús waj soka snebʼumanik ja bʼa komonik bʼa Cesarea bʼa Filipo, jaxa bʼa bʼeji ti kʼe sjobʼyi ja snebʼumaniki: «¿Machunkilukon wa xyalawe ja kristyano?». 28  Ja yeʼnleʼi sjakʼaweyi: «Weʼnbʼi ja Juan ja maʼ wa xya yiʼ jaʼ ja kristyano. Pe ja tuki wa xyalawe weʼnbʼi ja Elías. Jaxa tuki wa xyalawe weʼnbʼi june ja alumaniki». 29  Jaxa yeʼn sjobʼoyile: «Jaxa weʼnlexi, ¿machunkilukon waxa walawex?». Jaxa Pedro sjakʼayi: «Weʼnani ja Kristo». 30  Anto ja Jesús tixa skomo lek ja yeʼnleʼi bʼa mok maʼ yal-e yabʼi. 31  Sok tixa kʼe sjeyi ja snebʼumanik ke ja Yunin ja Winiki tʼilani oj yiʼ jitsan wokol sok oj ijnajuk yuja ansyanoʼik, yuja olomalik sacerdote sok yuja jeʼumanik bʼa ley; cha tʼilani oj miljuk sok oj sakʼwuk* ja bʼa yoxil kʼakʼu. 32  Ja it jamani lek wa xyala. Pe ja Pedro tixa spaya-el jutsʼin sok kʼe stoje. 33  Pe ja yeʼn sutu sbʼaj, skʼela ja snebʼumaniki, sok tixa stojo ja Pedro, yala yabʼ: «¡Kanan bʼa jpatik, Satanás! Yujni mi wanuka spensarajel jastal Dyos, jachni wana spensarajel jastal winik». 34  Anto tixa spaya ja nole kristyano soka snebʼumaniki, sok tixa yala yabʼyeʼa: «Ta ay maʼ wa skʼana oj snochon, mokxa ajyuk sakʼan bʼa yeʼna, ayiʼ ja sposte bʼa yijel wokoli* sok a-snochon. 35  Yujni ja maʼ wa skʼana skoltajel ja sakʼanili ojni xchʼaye, pe ja maʼ wa xchʼaya ja sakʼanil yuj keʼna sok yuja lekil rasoni ojni cha sakʼwuk. 36  Ja smeranili, ¿jas yaʼtelyuj june skʼulajel ganar yibʼanal ja luʼumkʼinali ta wa xchʼaya ja sakʼanili? 37  Pes ¿jasa oj ya’ jun kristyano bʼa slokʼol ja sakʼanili? 38  Sok ta ay maʼ wa xkʼixwi yuj keʼna sok ja bʼa jas wa xkala bʼa yojol ja lame kristyano it mi tojuke soka Dyosi sok mulanume, ja Yunin ja Winiki ojni cha kʼixwukyuj ja yajni xjak soka yip* ja sTat lajan soka anjelik tsaʼubʼali».

Notaʼik

^ Ma «stekʼuneje waʼin».
^ Ma «chʼak skʼan akoʼ slekilal».
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Jach kanel ja bʼa griego: «oj kʼejan».
^ Kʼela ja bʼa Yaljelik cholubʼal, Poste bʼa yijel wokol.
^ Ma «slijpelal».

Copyright sbʼaja juʼun it