Jesu wakaza aanyika kuti azookambawuke makani mabotu aBwaami bwaLeza. Jehova wakapa Jesu muuya uusalala kuti achite zigambyo, zitondeezya nzyayoochita kali Mwaami. Wakali kuponia malwazi asiyene-siyene. Kufumbwa nkwaakabede bantu bachiswa bakali kusika kulinguwe alubo wakali kubaponia boonse. Boofu bakali kubona, basinke matwi bakali kumvwa, bakatali kweenda bakali kweenda alubo wakali kutanda madimoni. Bamwi bakali kuponesegwa kuti bajata mupeto wachigogo chakwe. Bantu bakali kutobela Jesu kufumbwa nkwaakabede. Nikuba chiindi naakali kuyanda kuba alikke, Jesu taakali kubatanda pe bantu.

Chimwi chiindi, bantu bakeeta umwi mwaalumi wakatali kweenda mumuunzi Jesu mwaakali kukkala. Pesi mung’anda kwakali bantu biingi zyakuti bakakachilwa kumunjizya. Mpawo bakavumbula kaluli kang’anda akumunjizizya kukaluli. Jesu wakabuzya mwaalumi ooyo kuti: ‘Buka weende.’ Naakakonzya kweenda bantu bakagamba.

Limwi zuba Jesu naakali kunjila mumuunzi, wakamvwa baalumi basizipele bali kkumi kaboompolola kuti: ‘Jesu kotugwasya!’ Kuchiindi eecho, basizipele teebakali kuzumizigwa kuswena afwiifwi abantu. Jesu wakabuzya baalumi aabo kuti biinke kutempele nkaambo Mulawu waJehova wakali kwaamba kuti basizipele bakeelede kuchita oobo kuti basilikwa.  Nibakali munzila bakasilikwa. Umwi wabasizipele naakabona kuti wasilikwa, wakabweeda kuyoolumba Jesu akulumbayizya Leza. Akati kabasizipele bali kkumi, uumwi luzutu nguwe wakalumba Jesu.

Umwi mwanakazi wakali kuchiswa kaminyaka iili 12 alubo taakali kuyeeyela pe kuti uzoopona. Wakeendela musule lyaJesu akujata mupeto wachigogo chaJesu. Achiindi eecho wakapona. Nizyakachitika eezyo, Jesu wakabuzya kuti: “Ngwani wandijata?” Mwanakazi ooyo wakayoowa pesi wakaza kunembo akumubuzya kasimpe. Jesu wakamuumbulizya kati: ‘Mwanaangu, koya ube aluumuno.’

Mupati wachikombelo utegwa Jayirosi wakakumbila Jesu kuti: ‘Koboola kumuunzi wangu. Kana kangu kasimbi kaamba kufwa.’ Pesi Jesu kachili munzila, kasimbi kakafwa. Jesu naakasika wakajana bantu biingi kudilwe. Jesu wakababuzya kuti: ‘Mutalili, nkaambo ulikoona.’ Wakajata kuboko kwakasimbi mpawo wakati: ‘Kasimbi, buka!’ Kakabuka kakkala alubo Jesu wakabuzya bazyali bakasimbi kuti bakape chakulya. Ubonaanga bazyali bakwe bakamvwa biyeni?