1, 2. Б. э. 33-нҗи йылында нәхили улы өзгеришик болды ве Ехованың тәзе халкының агзаларына кимлер дегишлиди? (Макаланың башындакы сурата середиң).

Б. Э. 33-нҗи йылында Ехованың халкының тарыхында өрән әхмиетли вака болды. Шол гүн Ехова улы өзгеришик эдип, мукаддес рухы аркалы «Худайың Ысрайылы» болан тәзе халкы дөретди (Гал. 6:16). Бу халкың агзаларына Ыбрайымың несиллери ялы сүннетленмек герек дәлди. Павлус ресул оларың «йүрегиниң рухдакы сүннетлилигиниң» бардыгыны айтды (Рим. 2:29).

² Иерусалимде бир җайың ёкаркы отагына йыгнанан Исаның ресуллары ве башга-да йүзден говрак шәгиртлер Худайың тәзе халкының илкинҗи агзаларыды (Рес. иш. 1:12—15). Олар мукаддес рух аркалы Худайың огуллары хөкмүнде месх эдилдилер (Рим. 8:15, 16; 2 Кор. 1:21). Бу төвеллачы Иса Месихиң ганы аркалы беркидилен тәзе әхтиң гүйҗе гирендигини гөркезйәрди (Лука 22:20; Еврейлер 9:15-и окаң). Шейлеликде, бу шәгиртлер Ехованың тәзе халкының агзалары болдулар. Шол гүн шәгиртлериң үстүне мукаддес рух инип, олар Иерусалимде Пентикост байрамыны беллемек үчин Рим империясының әхли күнҗегинден гелен ехудылара ве ехуды динине геченлере дүрли диллерде вагыз этдилер. Шонда адамлар «Худайың улы ишлери» барада өз эне дилинде эшидип, говы дүшүндилер (Рес. иш. 2:1—11).

3—5. a) Пентикост гүнүнде Петрус ресул ехудылара нәме дийди? б) I асырда Ехованың тәзе халкының агзалары нәдип көпелйәрди?

³ Ехова Петрус ресул аркалы ехудылара ве ехуды динине геченлере тәзе халкының, ягны месихчилер йыгнагының агзалары болмага мүмкинчилик берди. Пентикост гүнүнде Петрус батыргайлык билен вагыз эдип, ехудыларың пүрсе чүйлән Иса Месихини «Реб хем-де Месих» хөкмүнде кабул этмелидиклерини айтды (Рес. иш. 2:22, 23, 36—38). Шол гүн такмынан үч мүңе голай адам рухы Ысрайыл халкына гошулды (Рес. иш. 2:41). Шондан соң ресулларың ыхласлы вагыз этмеги бол хасыл берди (Рес. иш. 6:7). Шейлеликде, тәзе халкың агзалары барха көпелйәрди.

⁴ Соңра вагыз иши Самария ченли яйрап, говы нетиҗелери берди. Көп адамлар хош хабарчы Филипус аркалы сувда чокундырылды. Эмма олара деррев мукаддес рух берилмеди. Шол себәпли Иерусалимдәки ёлбашчылык маслахаты Петрус билен Яхя ресулы Самария ибердилер. «Ресуллар эллерини оларың үстүнде гоянларында, олар хем Мукаддес Рухы алдылар» (Рес. иш. 8:5, 6, 14—17). Шейдип, бу самариялылар хем месх эдилип, рухы Ысрайылың агзалары болдулар.

⁵ Б. э. 36-нҗы йылында Худай башга адамлара хем тәзе халкына гошулмага көмек этмек үчин ене-де Петрус ресулы уланды. Шонда Петрус ресул Рим йүзбашысы Корнелиуса ве онуң доган-гарындашларына хем-де дост-ярларына вагыз этмәге иберилди (Рес. иш. 10:22, 24, 34, 35). Мукаддес Язгыларда шейле дийилйәр: «Петрус бу сөзлери айдып дурка, сөзи эшиденлериң барының үстүне Мукаддес Рух инди. Петрус билен гелен сүннетли иманлылар Мукаддес Рух сылагының башга миллетлериң үстүне-де дөкүленине геңиргендилер» (Рес. иш. 10:44, 45). Бу вакадан соң өзге миллетли адамлар хем Худайың тәзе халкына гошулмага чагырылып башланды.

6, 7. Тәзе халкың агзалары Ехованың адыны гөтерйән халк хөкмүнде нәме этдилер?

⁶ Б. э. 49-нҗы йылында ёлбашчылык маслахатының йыгнагында Якуп шәгирт шейле дийди: «Өзге миллетлерден Өз адына бир халк алмак үчин Худайың илки билен олара нәхили идег эденини Симон (Петрус) айдып берди» (Рес. иш. 15:14). Ехованың адыны гөтерйән бу халка ехудылар хем, өзге миллетлилер хем дегишлиди (Рим. 11:25, 27б). Соңра Петрус ресул: «Сиз бир вагтлар халк дәлдиңиз, йөне шинди Худайың халкысыңыз» дийип язды. Шейле-де ол бу тәзе халкың нәхили борҗуның бардыгыны дүшүндирип шейле дийди: «Эмма сиз өзүңизи түмлүкден аҗайып нуруна чагыран Худайың шөхратлы ишлерини ыглан этмәге сайланан несил, Патышаның руханылары, мукаддес миллет, Худая дегишли халксыңыз; рехиме говушмандыңыз, йөне шинди говушдыңыз» (1 Пет. 2:9, 10). Тәзе халкың агзалары  мундан бейләк-де әхли адамлара Худайың адыны танадып, оны шөхратландырмалыдылар. Шейле-де олар Әлемиң Хөкүмдары Ехова барада батыргайлык билен шаятлык этмелидилер.

⁷ Ехова гечмишдәки ысрайыл халкына айдан сөзлерини рухы Ысрайыла дегишли эдип: «Маңа алкыш айтсынлар дийип, Өзүм үчин яратдым бу халкы» дийди (Иш. 43:21). Бу тәзе халкың агзалары ялан таңрылардан йүз өврүп, Ехованың хак Худайдыгы барада адамлара батыргайлык билен вагыз этдилер (1 Сел. 1:9). Олар «Иерусалимде, бүтин Яхудада, Самарияда, Ериң тә соңуна ченли» Ехова ве Иса барада шаятлык этдилер (Рес. иш. 1:8; Кол. 1:23).

8. Павлус ресул I асырдакы Худайың халкына нәхили дуйдурыш берди?

⁸ Павлус ресул I асырдакы Ехованың адыны гөтерйән халкың батыргай агзасыды. Ол ынсан философиясыны өңе сүрйән адамлара гаршы чыкып, «дүнйәни, онуң ичинде болан бүтин затлары ярадан Худайың Ериң-гөгүң Реббидиги» барада батыргайлык билен вагыз эдип, Ехованың хөкүмдарлыгыны голдады (Рес. иш. 17:18, 23—25). Павлус ресул Худайың халкына шейле дуйдурыш берди: «Мен гиденимден соң, азгын гуртларың араңыза гирҗегини билйәрин, олар сүрини аямаз. Араңыздан шәгиртлери ызларына эертҗек болуп, хакыкаты ёйҗак адамлар чыкар» (Рес. иш. 20:29, 30). Бу өңүнден айдылан имандан дәнмеклик I асырың ахырында хас-да айдың болуп башлады (1 Яхя 2:18, 19).

9. Ресуллар өленден соң Худайың халкына нәме болды?

⁹ Ресуллар өленден соң, имандан дәнмеклик гиңден яйрап, нетиҗеде, христиан дүнйәсиниң бутханалары дөреди. Бу имандан дәнен месихчилер Ехованың адыны гөтерйән халк болмагың дерегине, Мукаддес Язгыларың көп терҗимелеринден Худайың адыны айырдылар. Шейле-де олар ынсан дәп-дессурларына эерип, Худайың Сөзүне гаршы гелйән таглыматлары билен Ехованың адына ыснат гетирдилер. Шол себәпли бирнәче асырың довамында Ехова санлыҗа адам вепалы гуллук этди ве олар Худайың адыны гөтерйән гурамачылыклы халк болуп билмедилер.

10, 11. a) Иса бугдай ве хашал от тымсалында нәмәни өңүнден айтды? б) 1914-нҗи йылдан соң, Исаның тымсалындакы сөзлер нәдип ерине етди ве нетиҗеси нәхили болды?

¹⁰ Иса бугдай ве хашал от тымсалында имандан дәнмеклик себәпли хакыкы дини тапавутландырмагың кын болҗакдыгыны өңүнден айтды. Ол «хер кес ятырка», Ынсан Оглуның экен бугдайларының арасына Иблисиң хашал оты экип гитҗекдигини айтды. «Дөврүң соңуна» ченли оларың икиси-де биле өсмелиди. Иса «оңат тохумың» «Худайың Патышалыгының огулларыны», «хашал отуң» болса, «Иблисиң огулларыны» аңладяндыгыны дүшүндирди. Дөврүң соңунда Ынсан Оглы «оракчылары», ягны перишделери иберип, гөчме маныдакы бугдайы хашал отдан айырмалыды. Шейлеликде, Худайың Патышалыгының огуллары йыгналмалыды (Мат. 13:24—30, 36—43). Бу сөзлер нәдип ерине етмелиди ве Ехованың адыны гөтерйән халкың тәзеден дикелмегине нәдип ярдам этмелиди?

¹¹ 1914-нҗи йылда «дөврүң соңы» башланды. Шол дөвүрде ер йүзүнде бары-ёгы бәш мүңе голай месх эдилен месихчилер барды. I Җахан уршы дөврүнде «Патышалыгың огуллары» Бейик Бабылың есирлигиндедилер. 1919-нҗы йылда Ехова олары азат эдип, «хашал отлардан», ягны христианлардан айырды. Ол «Патышалыгың огулларыны» йыгнап, олардан бир халк дөретди. Шейлеликде, Ишаяның пыгамберлигинде айдылан шу  сөзлер ерине етди: «Шейле зады эшиден бармы? Гөрен бармы шейле зады? Юрт бир гүнде доглармы? Бир демде дүнйә инерми миллет? Эмма Сион бургусы тутан дессине огулларыны догурды» (Иш. 66:8). Бу ерде агзалян «Сион» Ехованың рухы шахсыетлерден ыбарат гурамасыны, онуң «огул догурмагы» болса, месх эдилен месихчилериң халк хөкмүнде тәзеден дикелендигини аңладяр.

12. Шу гүнлер месх эдилен месихчилер Ехованың адыны гөтерйән халкдыгыны нәдип гөркезйәрлер?

¹² I асырдакы месихчилер ялы, шу гүнлерем «Патышалыгың» месх эдилен огуллары Ехова барада шаятлык эдйәрлер (Ишая 43:1, 10, 11-нҗи аятлары окаң) *. Шейле-де олар өзүни алып баршы ве «Патышалык барадакы бу Хош Хабары хемме миллетлере» вагыз этмеги билен башгалардан тапавутланярлар (Мат. 24:14; Флп. 2:15). Шейдип, олар миллионларча адамлара Ехованың догры ёлундан йөремәге көмек эдйәрлер (Даныел 12:3-и окаң) *.

13, 14. Рухы Ысрайылың агзасы болмадык адамлар Ехова эдйән сеждеси кабул болар ялы нәме этмели ве бу барада нәхили пыгамберликлер бар?

¹³ Биз өңки макалада гадымы Ысрайылдакы гелмишеклериң Ехова эдйән сеждеси кабул болар ялы, оларың Худайың халкы билен хызматдашлык этмелидигини билдик (1 Пат. 8:41—43). Шонуң ялы-да, шу гүнлер рухы Ысрайылың агзасы болмадык адамлар Ехованың халкы, ягны «Патышалыгың огуллары» болан месх эдилен месихчилер билен хызматдашлык этмели.

 ¹⁴ Дөврүң соңунда көп адамларың Ехованың халкы билен сежде этҗекдиги барада Худайың ики пыгамбери өңүнден айдыпды. Ишая шейле пыгамберлик этди: «Ахыркы гүнлерде Реббиң өйи дагларың иң бейиги дей беркарар эдилер, депелерден белент болар ол, әхли миллетлер оңа тарап эңерлер. Көп халклар гелип, шейле диерлер: „Гелиң, Реббиң дагына — Якубың Худайының өйүне чыкалың; ёдаларындан йөрәр ялы, Ол бизе Өз ёлларыны өвредер“. Чүнки канун Сиондан, Реббиң сөзи Иерусалимден чыкар» (Иш. 2:2, 3). Шонуң ялы Закаря пыгамбер хем «энчеме халкларың, гүйчли миллетлериң Хөкмүрован Ребби гөзлемәге ве Реббе ялбармага Иерусалиме гелҗекдиклерини» айтды. Ол олары «дүрли диллерде геплейән әхли миллетлерден» гелен адамлар хөкмүнде суратландырды. Шейле-де пыгамберликде бу адамларың Худайың рухы Ысрайылы билен сежде эдип: «Өзүң билен гитмәге бизе ыгтыяр эт, себәби Худайың сениң билендигини эшитдик» дийҗекдиги айдыляр (Зак. 8:20—23).

15. «Башга гоюнлар» рухы Ысрайыл халкы билен нәме эдйәр?

¹⁵ «Башга гоюнлар» рухы Ысрайыл халкы билен Худайың Патышалыгы барада хош хабары вагыз эдйәр (Мар. 13:10). Олар Худайың халкына гошулып, месх эдиленлер билен «бир сүри» боляр. Иса Месих болса оларың «говы чопаныдыр» (Яхя 10:14—16-нҗы аятлары окаң).

16. Ехова Армагеддоның башланмагы үчин нәме эдер?

¹⁶ Бейик Бабыл ёк эдиленден соң, Ехованың халкына әхли тарапдан хүҗүм эдилер. Шонда биз халас болмак үчин Ехованың горагына мәтәч боларыс. Худайың халкына эдилҗек хүҗүм улы мушакгатың соңкы тапгыры болан Армагеддон уршы билен тамамланар. Бу Ехованың беллән вагтында болар. Худай ер йүзүнде болҗак вакаларың әхлисине гөзегчилик эдер (Мат. 24:21; Эзек. 38:2—4). Гог Худайың халкына хүҗүм эдер (Эзек. 38:10—12). Шонда Ехова дессине гошулып, халкыны халас этмек үчин Гога ве онуң тарапдарларына гаршы сөвешер. Шейдип, Худай хөкүмдарлыгыны бейгелдер ве адыны мукаддес эдер. Ехова: «Көп миллетлериң гөзлериниң алнында Өзүми аян этҗекдирин; шонда олар Мениң Ребдигими билерлер» диййәр (Эзек. 38:18—23).

17, 18. a) Гог Ехованың халкына хүҗүм эденде, олара нәхили гөркезме берлер? б) Ехованың бизи халас этмеги үчин нәме этмели?

¹⁷ Гог хүҗүм эдип башланда, Ехова гуллукчыларына шейле диер: «Гелиң, эй, халкым, отагларыңыза гириң-де, ичинден япың гапылары! Газап гечйәнчә, аз салым гизлениң» (Иш. 26:20). Шол кын дөвүрде Ехова бизи халас этмек үчин гөркезме берер. Белки-де, бизиң гизленмели «отагларымыз» йыгнак душушыкларымыз билен багланышыклы болар.

¹⁸ Биз улы мушакгатда халас болмак үчин, Ехованың ер йүзүнде халкының бардыгына ве олара йыгнак душушыклары аркалы гөркезме берйәндигине дүшүнмели. Шол себәпли Ехованың халкының тарапында болуп, йыгнагымыздакы доган-уялар билен якындан хызматдашлык этмели. Гелиң, әхлимиз мезмурчы ялы йүрекден: «Гутарыш Реббиңкидир; берекедиң Өз халкың үстүнде болсун» диелиң (Зеб. 3:8).