Aôndo kua mbawanndor doo Mbashiada mba Yehova ishima tsung. Ka nahan ve ka i doo ve u pasen ior cii kua mba ve vande kaan a ve ér “M soo u ungwan ga” la kpaa, loho u Bibilo ye. (Mateu 22:37-39) Er Aôndo a doo se ishima yô, kwagh la ka a na se er kwagh u Wan na a kaa ér “se̱ pase” ior cii kwagh na la. (Aerenakaa 10:42; 1 Yohane 5:3) Se mba eren kwagh ne sha u pasen ior loho u Aôndo kwa môm tseegh ga, er uprofeti mba Aôndo mba tsuaa mbara eren nahan. (Yeremia 25:4) Shi er mbawanndor ve doo se ishima yô, ka se nôngon ser se pase ior cii, kua mba ve vande tesen isharen i ungwan ga la kpaa, “Loho u Dedoo u tartor” u waren uuma vev ne.—Mateu 24:14.

 Ashighe kpishi ka sea hide sea za hen ya u yange se za sha kwa u hiihii ve or tese isharen her ga la yô, se zua a or u i sar nan u ungwan yô. Nenge atôakyaa a atar ne:

•   Ior mba moughon shi mba ve hen ijiir sha ashighe ashighe.

•   Mbagenev hen ya ka vea soo u ungwan ga kpa, mbagenev hen ya la ve soo.

•   Ior mba gem anza. Akaa aa a lu zan hemen sha tar nyian ne kua mbamlu mba mbagenev ve nyôr ker yô, ka ve wase ve u umbur er i gbe u vea civir Aôndo yô, nahan i gba ve ishima u ungwan loho u Bibilo. (Mateu 5:3) Mba ve vendan u la je kpa vea fatyô u geman ishima, er apostoli Paulu nahan.—1 Timoteu 1:13.

 Nahan cii kpa, se mba kighir or ser nana ungwa loho wase ga. (1 Peteru 3:15) Se na jighjigh ser gba u hanma or nana tsua a ishima i nan u civir Aôndo.—Duteronomi 30:19, 20.