ITINEKWAGH I TAMEN: KWAGH U SE HEN HEN MOSE YÔ
Ka An Yange Nan Lu Mose?
Ka wea ungwa iti i Mose nahan, ka nyi ngi i va u ken ishima? Ka u hen wer yange lu . . .
-
ankyundan u ngô na yer un shi ikyese shin Ifi u Nil yôô?
-
wanyenomso u wantor Farao yese un ken mlu u yôughyôugh ken Igipiti, kpa hungur un er un lu Oriserael ga yôô?
-
orkuranilev u er tom ne ken tar u Midian anyom 40 yôô?
-
or u lam vea Yehova * hen ageva u yeghen usu laa?
-
or u yange za sha ishigh ki tor u Igipiti, za pine un sha ishimataver ér a de Mbaiserael ve due ken kpan kera yôô?
-
or u er sha imo i Aôndo, nahan a yôô Atsan a Pue sha Igipiti zum u tor u tar la venda u ungwan imo i Aôndo u mimi laa?
-
or u due a Mbaiserael ken Igipiti kera sha gbenda u kpilighyol yôô?
-
or u Yehova pav Zegemnger u Nyian sha ikyev na yôô?
-
or u na Mbaiserael Atindi a Pue a Aôndo na un yôô?
MOSE yange er akaa ne cica cii, kua agen kpaa. Ka nahan ve Mbakristu man Mbayuda kua Mbamusulumi cii ve ne un icivir ye!
Mose lu profeti u er “akaacieryol” je ka u tunan ga. (Duteronomi 34:10-12) Yange lumun ér Aôndo a er tom a na sha gbenda u vesen. Nahan cii kpa, Mose lu orumace er se nahan. Mose lu or “inja i môm a vese tsô,” di vough er Eliya u lu vea Mose imôngo ken mpase u sha mnenge u Yesu, shighe u lu eren tom na shin tar la nahan. (Yakobu 5:17; Mateu 17:1-9) Mose kpa yange tagher a mbamzeyol kpishi mba se tagher a mi nyian ne, shi hemba ve kpaa.
U soo u fan er yange er kwagh ne yôô? Yô, time ase sha aeren a dedoo atar a Mose lu a mi la, man kwagh u se hen ken ikyav na la kpaa.
^ Ikyum. 7 Yehova ka iti i Aôndo, er i pase ken Bibilo nahan.
