Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 Tese Ônov ou

Rahab Yange Ungwa Ababer

Rahab Yange Ungwa Ababer

DE SE tôô ser se mba ken gar u Yeriko, ken tar u Kanaan, er anyom 3,500 nahan ken ijime. Wankwase ugen, iti na ér Rahabi ngu ken gar la. Mose yange due a Mbaiserael ken Igipiti kera, ve kera lu ikpan ga, shi ve per Zegemnger u Nyian la sha tareghnyaagh, anyom nga kar kpuaa yô i mar Rahabi. Uredio man televishen shin Intanet lu hen shighe la ga, kpa Rahabi fa kwagh u ivande ne, shin er ivande ne er ijiir igen ica a gar u i mar un her la nahan kpaa. U fa er yange hii ve Rahabi hingir u fan kwagh u ivande ne kpa? *

A shi nan kpa, mbazendev ôr ior kwagh u uivande mba Aôndo ne. Nahan shighe u Rahabi hia kwase la, á umbur kwagh u Yehova er sha ci u ior nav la. Shi Rahabi ungwa akaa agen a kpilighyol sha kwagh u Mbaiserael. Mbaiserael tsa ken taaikyôngo anyom nga kar 40 yô, ve nyôr ken tar u Kanaan. Aôndo lu wasen ve u hemban hanma ikyurior i hendan kwagh a ve cii ityav. Lu hen shighe ne Rahabi ungwa ér Mbaiserael haa afo Ifi u Yordan yande la, ikyua a Yeriko ye!

Iyange igen yô, mbavannya uhar va due hen Rahabi aikighe, sha ci u ve fa ér Rahabi eren tom hen ijiir i mbavannya vea fatyô u tsan her yô. Nahan Rahabi ngohol ve. Tugh mbula, tor u Yeriko ungwa ér mbamkerev mba Iserael nyôr ken gar u Yeriko, man mba hen ya u Rahabi eren tom her la. Tsô tor la tindi ér i ôr Rahabi yô, a due a nomsombaiorov mba ve ve her a na la. U fa kwagh u Rahabi yange kav sha kwagh u mbavannya mban kpa, man u fa kwagh u yange er kpa?—

Cii man mbatomov mba tor tindi hen Rahabi la va nyôr hen a na yô, Rahabi fa er mbavannya nav mbara lu mbamkerev mba Iserael yô. Tsô a yer ve sha haav mbu iyou, kpa a gema a kaa a mbatomov mba tor ér: “Een, nomsombaiorov mbara va her a mo, . . . man shighe u wuhen hunda, shighe u ime i we la, nomso mbara due.” Rahabi taver ve ishima ér: “Zenda nen ve ijime fefa.”

U hen wer, lu nyi i na ve Rahabi yer mbamkerev mbara?— A pase mbamkerev mbara ityôkyaa wener: “M fa TER na ne tar ne, . . . Gadia se ungwa er TER tôndo Zegemnger u Nyian sha ishigh yenegh, zum u ne due ken Igipiti la.” Shi yange ungwa er Aôndo wase Mbaiserael ve hemba mbaihyomov mbagenev ityav yô.

 Bibilo ôr se kwagh ken Mbaheberu 11:31 u a tese ér, kwagh u Rahabi er sha u yeren mbamkerev mbara la doo Yehova a na kpishi yô. Shi yange doo un a Rahabi zum u a zamber a mbamkerev mbara ér: ‘M er a ven dedoo, yô, tôndo nen zwa a mo ner zum u ne tim Yeriko yô, ne de terem uma man ngôm kua anngôôv av mba nomso man mba kasev’ kpaa. Mbamkerev mbara tôndo zwa a na ér aluer á dondo kwaghwan ve yô vea er a na nahan. U fa kwaghwan shon kpa?

Mbamkerev mbara yange ve kaa a na ér, ‘ngohol kor u mou u nyian ne zer ken ihura i u dugh a vese ne, man shi kohol ior ou cii ken ya wou. Aluer u er nahan yô, hanma or u nan kohol hen ya wou la cii nana war.’ Rahabi er kwagh u mbamkerev mbara ôr un la vough. U fa kwagh u yange za hemen hen shighe la kpa?

Mbaiserael yange ve va nôôr hen girgar u Yeriko. Ve ningir gar la ving ving, kwa môm hanma iyange, zan zan ayange ataratar. Sha iyange i sha utaankaruhar la, ve ningir gar la kwa taankaruhar, maa ve genger amo taver taver. Tsô girgar la yôhôr cica cii, saa ape i zer mou u nyian sha windou la tseegh! Nahan i war Rahabi man tsombor na.Yosua 2:1-24; 6:1-5, 14, 15, 20-25.

Kwagh u Rahabi er la tese se nyi?— Yange ungwa abaver a akaa a Aôndo lu eren sha u yiman ior nav la, shi wase ve zum u ian due i una wase ve yô. Sha kpôô yô, Rahabi yange nenge wener hemba doon u una civir Yehova vea ior nav imôngo! We u er nahan kpa?— Se mba sônon ser we kpa ma u er nahan.

^ par. 3 Aluer u ngu ôron ngeren ne vea wan wou yô, anhwange u i kper heen tiônôô ne ka u umbur we ér gba u ú mem sha er wan wou una na mlumun yô.