Armagedon Ityav Mbi Aôndo Mbi Mbia Bee A Ityav Cii Yô

“Ve nenge iwoo-or ér ka zege kwaghbo u vihin tsung; nahan yô, ityav mbi nôngon ka kwagh u vihin ve ishima je zua ga. Mba a ishember i ityav ken zwa ve ga.”—KA MKAANEM MA OR U KEN TAR U NORWAY U ZENDEN TÔVON AKAA, U I YER UN ÉR FRIDTJOF NANSEN YANGE ÔR SHA KWAGH U IOR I INUIT MBA KEN TAR U GREENLAND KEN INYOM I 1888 JE NE.

KA AN je a doo nan u lun ken tar u ityav mbi nôngon mbi lu “kwagh u vihin ishima” tsung ga? Ka an je a sar nan u lun ken tar u ior vea lu a ishember i ityav mbi nôngon ga sha ci u ve fa kwagh u uitya ga? Alaghga se hen ser imba tar ne ia fatyô u lun ga, hemban je yô aluer se ver ishima ser uumace ve sôr tar u lu nahan yô.

Nahan kpa, Yesaia yange ôr kwaghôron u profeti u Aôndo iyol na a tende zwa ér una sôr tar ua hingir nahan yô. A kaa ér: “Vea gema usanker vev, vea var indyuhar a mi, awange a ve kpaa aa hingir ahô a sôron ikyon a mi; ikyurior igen ia kera tsuwa sanker a ikyurior igen ga, vea kera hen ityav mbi nôngon kpaa ga.”—Yesaia 2:4.

Sha mimi yô, saa a sôr tar u ú lu a ushoja mba nôngon ityav miliôn 20, u í lu nôngon ityav shimi zan a mi ave er ityav 20 nahan ne keng ve ityendezwa ne ia kure sha mi vough ye. Sha nahan yô Yehova, Aôndo u hembanagee una gba teman a tema ga, kpa una mough a er kwagh sha akaa a uumace ve lu eren ne. Kwagh u Yehova una er ne una kure sha ityav mbi Bibilo i yer ér Armagedon la.—Mpase 16:14, 16.

Ior kpishi gema yilan ishember i “Armagedon” ne ayange ne sha u ôron kwagh u ityav mbi a nôngo sha tar sha ubom mba bughur wuan ior yô, nahan kpa dikishenali igen pase inja i ishember ne jighilii ér: “Ka ijiir i a akum a dedoo aa mase nôngon kwagh a akum a bo yô.” A tsa sha won nahan kwagh u dedoo una hemba u bo kpa, shin ityav mbin ka a ka kwaghhir tsô?

Bibilo ôr kwagh u mkur u ifer acin imôngo, nahan ishima i de nyian se ga. Orpasalmi yange tsengaôron wener: “Mbaasorabo [vea] bee shin tar, mbaaferev kpaa [vea] kera lu ga.” (Pasalmi 104:35) Takerada u Anzaakaa kaa ér: “Mbaperapera vea tema sha tar, man mbananjighjigh kpaa vea tema sha u gbem. Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.”—Anzaakaa 2:21, 22.

Bibilo pase wang ér mbaaferev vea lumun ér i ngohol tahav sha ikyev ve ken bem ga; nahan yô Aôndo una mase eren kwagh u una bee a ifer kera gbindigh gbindigh, kua ityav mbi bov kpaa yô. (Pasalmi 2:2) Iti i Armagedon, i Bibilo i yer ityav mbi lun kposo mbin ka iti i dedoo kpen kpen.

Yange i Nôngon Ityav Ikyua a Megido

Inja i ishember i “Armagedon” ér “Uwo u Megido.” Gar u Megido u ngise la kua Pev u Yesereel u kase un la lu ijiir i akumautya kposo kposo  nôngon ityav her sha u fan or u hemban yô. Ortimen sha akaa a mbayiase ugen, mba yer un ér Eric H. Cline, yange nger ken takerada u i yer ér The Battles of Armageddon la wener, “ken mlu u uumace sha tar cii, Megido man Pev u Yesereel lu ijiir i i nôngon ityav mbi tesen er ior vea gema eren kwagh yô.”

Er orvesen Cline a pase nahan, yange i nôngon ityav ikyua a Megido, i cirin i veren ga, yange i fa or u hemban keng. Lu hen Megido i hii hemban akumautya a Mongol, a yange hemba ityav ken Ashia ajiir kposo kposo ken derianyom u sha 13 la ye. Akumautya a Ingila sha ikyev i Kurutya Edmund Allenby kpa yange hemba ior i Turks ityav ikyua a Megido shighe u ityav mbi tar cii mbi sha môm la. Orgen u timen sha ityav mbi mbayiase ôr kwagh u mhembe u Allenby ne ér “ka môm ken ityav mbi yange i hemba fese yô, man er i gbe tar je ka ityav mbi yange i hemba elegh elegh kpaa je ne.”

Ityav mbi i er kwagh u mbi ken Bibilo mbi yange i hemba mbaihyomov la kpa i nôngo mbi ikyua a Megido. Lu heen Orjir Baraki hemba akumautya a Mbakanaan a sha ikyev i Shisera la ye. (Mbaajiriv 4:14-16; 5:19-21) Gidion u lu a ior deri utar tseegh la kpa hemba ikpela i akumautya a Mbamidian hen ijiir ne. (Mbaajiriv 7:19-22) Tor Saulu vea wan na Yonatan yange ve kpe sha Uwo u Gilboa ikyua a Megido zum u akumautya a Mbafiliti hemba Mbaiserael ityav la.—1 Samuel 31:1-7.

Er Megido man pev u a lu ikyua la lu ijiir i akumautya aa fatyô u yeren tan num sha mbaihyomov vev aburabur yô, i nôngo ityav kpishi hen ijiir ne ken anyom a a kar ken ijime 4,000 la. Ortimen sha akaa a mbayiase ugen ôr iyenge i ityav mbi i nenge hen ijiir ne kuma er 34 nahan!

A shi nan kpa, ityav mbi i nôngon hen Megido man mlu u hen ijiir ne bende a gbenda u i yaren tom a ishember i “Armagedon” sha ikyav la. Shin er i ter ishember i Armagedon ne ken Bibilo ijiir i môm tseegh nahan kpa, gbenda u í ôr kwagh u ishember ne ken takerada u Mpase la tese wang ér Armagedon una bende a hanma or shin tar.

Gbenda u Bibilo i Er kwagh u Armagedon La

Er Megido lu ijiir i í hemban mbaihyomov ityav her elegh elegh nahan kpa, ityav mbin fatyô u karen a ifer kera ga. Lu ityav mbi akum a dedoo man akum a bo jighilii ga. U ôron kwagh vough yô, ityav mbi akum a dedoo man a bo la nahan ka Aôndo tseegh una va a mbi ye. Er Yesu ngise ôr nahan, “Or u dedoo ngu ga, saa Aôndo tseegh.” (Luka 18:19) Heela tseegh ga, Bibilo yila Armagedon ér ityav mbi Aôndo.

Takerada u Mpase kaa ér, a kohol “utor mba sha tar sha won cii . . . sha ci u ityav mbi iyange i vesen i Aôndo, Uhembanagee la.” (Mpase 16:14) Kwaghôron u profeti ne shi kaa ér: “Tsô ve kohol ve imôngo hen ijiir i i yer ken zwa u Heberu er Armagedon la.” * (Mpase 16:16) Takerada u Mpase shi kaa ér, “utor mba shin tar man akumautya a ve” vea “kohol sha u nôngon ityav a Un u A tem sha nyinya la man shi akumautya a Na.” (Mpase 19:19) I pase se ér un a tem sha nyinya la ka Yesu Kristu.—1 Timoteu 6:14, 15; Mpase 19:11, 12, 16.

Avur a Bibilo ne cii tese se nyi? A tese ér Armagedon ka ityav mbi Aôndo una nôngo a uumace mba hembanato yô. Er nan ve Yehova man Wan na, Yesu Kristu ve soo u nôngon imba uitya nee? Ityôkyaa i hiihii yô, Armagedon una “tim mba ve lu vihin tar la.” (Mpase 11:18) Heela tseegh ga, mbi a va a tar u bem, “tar u he” u se lu keghen “u perapera una tema ker yô, sha ityendezwa [i Aôndo] la.”—2 Peteru 3:13.

Er Nan Ve Ityav Mbi Armagedon mbi Lu Hange Hangee?

Taver we er Yehova, “Aôndo u dooshima” una tindi wan na, u a lu “Wantor u Bem” la ér a za nôngo ityav yôô? (2 Mbakorinte 13:11; Yesaia 9:6) Aluer u fa awashima ve yô, a hemba wanger we. Takerada u Pasalmi yila Yesu ér orutya. Er nan i gbe u Yesu una nôngo ityava? Orpasalmi kaa ér Kristu ngu zenden “sha ci u kwagh u mimi man u ishima i leghlegh man u perapera.” Yesu ngu nôngon ityav sha ci u perapera doo un ishima, kpa a gema a kôr iferkwagh ihyom.—Pasalmi 45:4, 7.

Bibilo pase er Yehova kpa ishima i lu un ker sha kwagh u aferakaa a a lu zan hemen shin tar nyian la. Profeti Yesaia nger ér, “TER nenge, vihi Un er  kwagh u jighilii a lu ga yô, Una haa perapera iyol er rigautya u iyôô nahan; idyer i myom ia lu Un sha ityou; una haa iyevoron iyol er ka akondo nahan, man una haa gbashima iyol er ka riga u wuhegh nahan sha er una tsaha ior shi una or iyev sha afer a i lu eren ior la yô.”—Yesaia 59:15, 17, Bibilo i i yer ér Today’s English Version la.

Er aferaior a lu hemen tar her yô, mayange a kpe mbaperapera iyol ga cii. (Anzaakaa 29:2; Orpasenkwagh 8:9) Sha mimi yô se fatyô u yangen aferaior u eren ifer ga. Saa a tim aferaior kera cii ve ior vea lu ken bem man mkpeyol gbem sha won ye. Solomon nger ér “Orifer ka ipaa i orperapera.”—Anzaakaa 21:18.

Er Aôndo a lu Orjir yô, se na jighjigh ser er i lu cii kpa una ôr mbaaferev ijir sha mimi. Aberaham ngise pine ér “Orjirigh u tar cii, Una kera er vough gaa?” Mlumun u Aberaham zua a mi yô ér, Yehova eren kwagh u vough hanma shighe cii! (Genese 18:25) Heela tseegh ga, Bibilo kaa a vese ér sar Yehova u timin mbaaferev ga; ka mba ve vende u geman ishima sha apera la tseegh una tim ye.—Esekiel 18:32; 2 Peteru 3:9.

Fa Wer Armagedon Ka Ityav Kpôô Kpôô

Ka an u ta ikyaa a nan ken ityav mbi kwagh u dedoo una nôngo a kwagh u bo nee? Se kpishi aluer i pine se mpin ne yô, se kaa ser ka kwagh u dedoo se ta ikyaa a mi ye. Kpa se er nan ve se fa ser mimi je se ta ikyaa a kwagh u dedoo? Sefania wa se kwagh ér: “Ker nen perapera, ker nen ishima i legh legh.” (Sefania 2:3) Apostoli Paulu kaa ér sar Aôndo u “ior cii ve̱ war ve̱ ar sha mfe u fan mimi la.”—1 Timoteu 2:4.

Kwagh u hiihii u se er ve se zua a myom yô, ka u henen kwagh u Yehova man awashima na u va been a ifer sha tar la. Kwagh u sha uhar yô, ka u eren akaa a perapera; aluer se er nahan yô Aôndo una lumun se shi una kura se kpaa.

Aluer se er akaa a hange hange ne yô, se lu tômon a tôm ser Armagedon a va, gadia ka ityav mbi mbia bee a ityav mbi uumace cii yô. Shighe u a nôngo ityav mbin a bee yô, ior hanma ijiir cii vea nenge ityav ér ka kwaghbo u vihin tsung. Mayange “vea kera hen ityav mbi nôngon . . . ga.”—Yesaia 2:4.

[Footnote]

[Blurb on page 3]

I yila kwagh u Aôndo una er sha u sôron tar la ér Armagedon

[Picture on page 5]

Shighe u a nôngo ityav mbi Armagedon a bee yô, ior hanma ijiir cii vea nenge ityav ér ka kwaghbo u vihin tsung