Gbenda U Yesu A Tese Ér Perapera U Aôndo Hemba Cii la

“Aôndo vande veren [Kristu] er A̱ lu iwom i sha jighjigh u nan, sha awambe a Na. Lu sha u Aôndo Una tese perapera Na . . . yô.”—ROM. 3:25.

1, 2. (a) Bibilo tese se nyi sha kwagh u mlu u uumacee? (b) Ka mbampin mba nyi kwaghhenen ne una time shamini?

 Í FA kwagh u ihyembeato i ken sule u Eden, i í nger ken Bibilo la tsembelee je. Isholibo i Adam la bende a vese cii, er i pase ken mkaanem man nahan, ér: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.” (Rom. 5:12) Ka se nôngo sha afatyô wase cii ser se er kwagh u vough, kpa se gema se er akaa a doon ga, nahan i gba u Aôndo una de se asorabo ase. Apostoli Paulu je kpa yange vaa iyol ér: “Kwagh u doon u a saren mo la, m eren ga, kpa ka kwagh u bo u a sarem ga la je m gem m eren ye. Kpe ahii, mo or u gban kera nee!”—Rom. 7:19, 24.

² Mlu wase u isholibo la due a mbampin mba hange hange mban, ér: Er nan ve yange i fatyô u maren Yesu u Nasareti a isholibo iyol shio, man yange i er un batisema sha ci u nyi? Ieren i Yesu i tese ér perapera u Yehova hemba cii nena? U hemban cii yô, ku u Kristu la u er nyi?

Satan Puu Perapera u Aôndo

3. Satan yange tsugh Ifa nena?

³ Mbamaren asev mba hiihii, Adam man Ifa, yange ve er kwagh sha ibume, sha ci u ve venda hemen u Aôndo, ve gema ve lumun ér “tseyô . . . u i yer un er Diabolo man shi Satan la” a hemen ve. (Mpa. 12:9) Nenge ase er kwagh ne yange er yô. Satan kaa ér Yehova Aôndo hemen akaa a á gbe a la sha perapera ga. Yange due a ikyaa ne sha u pinen Ifa ér: “Ka mimi je, Aôndo kaa er, né de ye atam a ma kon u ken sule ne gaa?” Ifa gema kimbir tindi u Aôndo wa ve wang ér ve de benden kon ugen ave ga, vea bende yô vea kpe la. Satan maa wa Aôndo kwagh iyol ér a er aie. Diabolo kaa ér: “Né kpe je ga.” Satan za hemen a icugh na sha u Ifa a na jighjigh ér Aôndo ngu yangen un kwagh u dedoo, shi aluer un ya ityamegh ki kon la yô, una hingir er Aôndo nahan, una kera suur sha Aôndo ér a tese un kwagh u una er ga.—Gen. 3:1-5.

4. Uumace yange ve hingir u lun sha ikyev i hemen u Satan, u u hendan a hemen u Aôndo la nena?

⁴ Jighilii yô, Satan yange lu kaan ér aluer uumace kera mba sha ikyev i Aôndo ga yô, a hemba saan ve iyol. U Adam ma sue hemen u Aôndo ú perapera la yô, gema ungwa imo i kwase na, nahan a kohol un ve ya ityamegh ki kon u i ta ve icin sha mi la. Kwagh ne na yô, Adam vihi mlu na u vough, u lu vea Yehova la, gema va se a ican i vihin tsung i isholibo man ku. Shi ieren i Adam la na yô, uumace hingir u lun sha ikyev i hemen u Satan, “aôndo u tar u ainge,” u u hendan a hemen u Aôndo la.—2 Kor. 4:4; Rom. 7:14.

5. (a) Yehova yange tese ér kwaghôron na ka u mimi nena? (b) Aôndo na tsombor u Adam man Ifa ishimaverenkeghen i nyi?

⁵ Yehova ôr Adam man Ifa ijir i kuugh, vough er kaa ér a lu nahan. (Gen. 3:16-19) Kpa kwagh la tese ér Aôndo kanshio u kuren awashima na la ga. Kwagh lu nahan ga cii! Shighe u Yehova lu pasen Adam man Ifa mtsaha ve la,  a na ônov mba vea va mar la ityôkyaa i doon tsung i lun a ishimaverenkeghen. Yehova yange er kwagh ne zum u a pase awashima na u tindin a “vor” u Satan una cagh u ikishinguhar la. Er a cagh Vor u ityendezwa la ikishinguhar nahan kpa, ivav la ia bee, nahan u di ua gema a “cagh [Satan] ityough.” (Gen. 3:15) Bibilo seer tan iwanger sha itinekwagh ne, sha ci u i̱ ôr kwagh u Yesu Kristu ér: “Ka nahan man i pase Wan u Aôndo ye, sha u vihin aeren a diabolo kera.” (1 Yoh. 3:8) Kpa ieren i Yesu man ku na tese ér perapera u Aôndo hemba cii nena?

Inja i Batisema u Yesu Er La

6. Er nan ve se fe ser yange i mar Yesu a isholibo i Adam la ga?

⁶ Shighe u Yesu gande or la, gba u una lu vough er Adam lu a er isholibo ga ve lu vough nahan. (Rom. 5:14; 1 Kor. 15:45) Kwagh ne tese ér yange gba u a mar Yesu una lu a isholibo iyol shio. Lu u a fatyô u maren un a isholibo iyol shio nena? Ortyom Gaberiel pase Maria, ngô u Yesu kwagh ne wang, ér: “Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.” (Luka 1:35) A shi nan kpa, shighe u Yesu lu wanye la, Maria pase un akaa agen sha kwagh u mar na. Sha nahan yô, sha shighe ugen la, Maria man ter-ikyoson u Yesu, Yosev, mba za zough a Yesu ken tempel u Aôndo yô, Yesu u lu wanye hen shighe shon la pine ve ér: “Ne kera fa er i lu u Me lu ken [ya u] Terem keng gaa?” (Luka 2:49) Ikyav tese ér Yesu yange fa ér un ngu Wan u Aôndo shighe u lu iyev la je. Nahan u tesen ér perapera u Aôndo hemba cii la lu un kwagh u vesen kpishi.

7. Yesu lu a akaa a injaa a nyi?

⁷ Yesu yange tese ér akaa a ken jijingi gba un ishima kpishi sha u zan mbamkombo mba civir Aôndo hanma shighe. Er Yesu lu a mhen u vough yô, a shi nan kpa yange una koso hanma kwagh u hen ken Ruamabera u ken Zwa Heberu shi kav la cii ken ishima na. (Luka 4:16) Yesu shi yange lu a kwagh u injaa ugen kpaa, kwagh shon lu iyol i lun a mshi shio, i una fatyô u nan nagh a mi sha ci u uumace yô. Shighe u i er Yesu batisema la, lu eren msen; man alaghga lu henen sha kwaghôron u profeti u i nger ken Pasalmi 40:6-8 la.—Luka 3:21; ôr Mbaheberu 10:5-10. *

8. Er nan ve Yohane u Eren Batisema venda ér Yesu a de eren batisema ga?

⁸ Sha hiihii la, Yohane u Eren  Batisema venda ér Yesu a de eren batisema ga. Sha ci u nyi? Lu sha ci u Yohane lu eren Mbayuda batisema u tesen ér ve gema ishima sha asorabo ve a peren Tindi la. Er Yohane lu anngô u Yesu u ken agbar yô, a shi nan kpa yange fa ér Yesu ngu orisholibo ga, nahan ityôkyaa ngi i una gema ishima ga. Yesu kaa a Yohane ér, doo u Una er batisema. Yesu kaa ér: “Kape i doo u sé kure perapera cii vough je ne.”—Mat. 3:15.

9. Batisema u Yesu er la tese nyi?

⁹ Er Yesu lu orsholibo ga yô, yange ma kure ikyaa ér un ngu sha ian i veren tsombor u lun a isholibo shio, er Adam nahan. Nahan kpa, mayange sar un u eren nahan ga, sha ci u lu kwagh u Yehova wa ishima ér a er la ga. Aôndo yange tindi Yesu shin tar ér a va kure tom u Vor u ityendezwa shin Mesiya la. Kwagh ne yange wa nagh ku lu u Yesu una na sha uma na u vough la ker. (Ôr Yesaia 53:5, 6, 12.) Sha kpôô yô, batisema u Yesu er la ngu inja i môm a u se eren la ga. Er i mar Yesu ken icighanikyurior i Aôndo, Iserael yô, kera gba u una tsegha iyol sha ci u Yehova cii ve una er batisema ga. Kpa, batisema u Yesu er la tese ér yange na iyol na sha u eren ishima i Aôndo, er Ruamabera tese ér Mesiya una er nahan.

10. Tom u yange gba u Mesiya una er sha u kuren awashima u Aôndo la wa nyi kere, man Yesu nenge kwagh ne nena?

¹⁰ Kwagh u Yehova washima ér Yesu a er yô, lu u a pase loho u dedoo u Tartor u Aôndo shi a gema ior ve hingir mbahenen shi a wa ve ago a va eren tom u geman ior hingir mbahenen la. Mne u Yesu na iyol na la wa mtev u sha ican man ku u pilagh u a lumun u wan ishima a mi sha u suen hemen u Yehova Aôndo u perapera la ker. Er Yesu soo Ter na u sha la sha mimi yô, yange doo un u eren ishima i Aôndo shi nenge ér ka kwagh u doon kpishi u nan nagh sha iyol na. (Yoh. 14:31) Shi yange doo Yesu kpishi, sha ci u a fa ér a fatyô u nan Aôndo injar i nagh ku uma na u vough la sha u ku lu nagh ku paan se sha ikyev i isholibo man ku kera. Nahan Aôndo lumun a mne u Yesu na iyol na sha u eren ityom i vesen ne la kpa? Yange lumun yum!

11. Yehova yange lumun Yesu ér ka un a lu Mesiya u ityendezwa shin Kristu ye nena?

¹¹ Mbangeren Ivangeli mba unyiin mbara cii er shiada sha mkaanem ma Yehova Aôndo ôr wanger wanger sha u tesen ér un lumun Yesu shighe u lu duen shin mngerem ma Ifi u Yordan la. Yohane u Eren Batisema pase ér: “M nenge Jijingi lu senen Sha er ka ikyungugh nahan, va tema sha [Yesu] . . . Yô, m nenge, m shi m ngu pasen je mer: Ngun ka Wan u Aôndo je ne.” (Yoh. 1:32-34) Kwagh ugen yô, Yehova yange pase sha shighe la wener: “Ngun ka Wan Wam u ishima ishima, u i doom a Na yum yô.”—Mat. 3:17; Mar. 1:11; Luka 3:22.

Yesu Tile sha Mimi Zan Zan Kar Kpen

12. Yesu yange eren batisema yô, a er nyi zan zan anyom atar man iwer ataratara?

¹² Yesu yange eren batisema yô, a tese ior kwagh u Ter na man mtemtor u Aôndo u perapera la kuma anyom atar man iwer ataratar. Yange er tom ne a uma na jimin cii. Er Yesu lu zenden ken tar u Ityendezwa la cii sha angahar yô, yange a vôr ashighe agen, nahan kpa, ma kwagh môm yange un u pasen ior mimi sha gbashima ga. (Yoh. 4:6, 34; 18:37) Yesu yange pase mbagenev kwagh u Tartor u Aôndo. Yange tese kwagh u Tartor la ua er sha ci u uumace la sha u been ior angev sha ivande shi kôson zegeikpelaior i ijen kôr i la shi nderen mbakpenev shin ku je kpaa.—Mat. 11:4, 5.

13. Yesu yange tese nyi sha kwagh u msen u erene?

¹³ Yesu ver se ikyev i dedoo, gadia yange ngohol icivir sha ityesen na  man uivande mba lu eren la ga, kpa hide a iyol na ijime, gema hanma iwuese cii na Yehova. (Yoh. 5:19; 11:41-44) Yesu shi tese se atôakaa a vesen a i doo u se eren msen sha mi yô. Gba u se sônon ken mbamsen asev ser i “tsegha” iti i Aôndo, ka Yehova je la, shi se sônon ser mtemtor u Aôndo u perapera la a kar a tema sha ityough ki hemen u bo u Satan ne, sha er a er “ishima [Na] shin tar kpaa vough er i eren i Sha nahan” yô. (Mat. 6:9, 10) Shi Yesu taver se ishima ér se eren sha akaa a se sen la sha u ‘vanden keren tartor u Aôndo man perapera Na.’—Mat. 6:33.

14. Er Yesu lu a isholibo iyol shio nahan kpa, er nan ve yange gba u una nôngo kpoghuloo ve una wase u kuren awashima u Aôndo laa?

¹⁴ Er zurum u Yesu una kpe sha u nan nagh la, ishima hii u zan un iyol kpishi, sha ci u zegetom u lu a mi u eren la. Iti i Ter na kua awashima na cii har sha ishimawan i Yesu man ijir i a ôr un sha mimi ga la man ku u pilagh u a wua un la. Ka shin ayange ataan cii Yesu una kpe yô, a er msen ér: “Hegen ishima ngi tan Mo kwe, tsô shi Me kaa nana? Tere, yimam due a Mo hen shighe ne kera! Kpa ka sha ci u kwagh ne je man M ve hen shighe ne ye.” Yesu er mkaanem man sha mhen u orumace yô, a hide a penda ishima na sha kwagh u hemba lun u vesen cii la, nahan a er msen ér: “Tere, na iti You icivir.” Fese je Yehova maa kaa ér: “M vande civir i, Me shi Me civir i kpaa.” (Yoh. 12:27, 28) Sha kpôô yô, Yesu yange lumun u tagher a ikyaren i vesen i karen mtil sha mimi na, man lu ikyaren i ma orumace ugen nan lu a vande tagher a mi ga yô. Er Yesu ungwa mkaanem ma taver ishima ma Ter na u sha la yô, ishima taver un kpishi, nahan lu a vangertiôr ér una fatyô u kenden a iti i Yehova sha shi tesen er hemen u Yehova u hembe cii yô. Man yange er nahan kpaa!

Kwagh u Ku u Yesu u Er Yô

15. Er nan ve Yesu kaa ér: “Bee ve” cii mase kpenee?

¹⁵ Yange ka kom u Yesu una mase ôôn iôôn na i masetyô i nyoon tsung shighe u i mande un sha kon la yô, a kaa ér: “Bee ve.” (Yoh. 19:30) Akaa a vesen a Yesu er batisema ve Aôndo wase un er ken anyom atar man iwer ataratar maa kpe la kpilighyol kpen kpen! Hen shighe u Yesu kpe la, tar tenger cieryol kpishi, nahan torutya u Mbaroma, u hemen mba ve wua Yesu la kaa ér: “Mimi je, Ngun lu Wan u Aôndo.” (Mat. 27:54) A shi nan kpa torutya la nenge er i laha Yesu sha ci u kaa ér un ngu Wan u Aôndo yum yô. Er Yesu ya ican kpishi nahan cii kpa, a tile sha mimi her, nahan a tese er Satan a lu icôr-oraie yô. Satan ôr kwagh u mba ve suen hemen u Aôndo la cii ér: “Hanma kwagh u or nan lu a mi cii, nana na sha [u waren] uma u nan.” (Yobu 2:4) Er Yesu tile sha mimi yô, a tese ér Adam man Ifa yange ma ve fatyô u tilen sha mimi shighe u ve tagher a imeen i taver kpishi ga la. Kwagh u hemban cii yô, uma man ku u Yesu la tese er hemen u Yehova ú perapera la ú hembe cii yô. (Ôr Anzaakaa 27:11.) Ku u Yesu la shi kure ma kwagh ugen je kpa? U kure yum!

16, 17. (a) Lu nyi i na ve Yehova lumun a Mbashiada nav mba sha ayange a tsuaa laa? (b) Yehova yange na Wan na injar sha mtil u a tile sha mimi la nena, man Ter Yesu Kristu ngu eren nyi?

¹⁶ Mbacivir Yehova kpishi lu shin tar ne, mba ve kpe cii Yesu mase van shin tar yô. Aôndo yange lumun a ve shi na ve ishimaverenkeghen i mnder u shin ku. (Yes. 25:8; Dan. 12:13) Kpa icighan Aôndo, Yehova, una ver uumace mbaasorabo mban sha gbenda u kpilighyol u ngura nahan sha ci u nyi? Bibilo pase ér: “Aôndo vande veren [Yesu Kristu] er A̱ lu iwom i sha jighjigh u nan, sha awambe a Na. Lu sha u Aôndo Una tese perapera Na gadia asorabo a i vande eren tsuaa sha shighe u  ishimawan i Aôndo la yô, A kera wa a ikyo ga. Lu sha u Una tese perapera Na hen shighe u ainge ne, sha u Una lu u perapera man shi Una na mba ve lu ken jighjigh u nan ken Yesu la ishô kpaa yô.”—Rom. 3:25, 26. *

¹⁷ Yehova na Yesu injar sha u nderen un shin ku shi veren un sha iantom i hemban i yange vande lun sha mi cii ve va shin tar la. Hegen Yesu hingir or u ken jijingi u lun a iengem, u una kpe mayange ga yô. (Heb. 1:3) Er Ter Yesu Kristu a lu Pristi u Tamen shi a lu Tor yô, ngu wasen mbadondon un sha er vea tese er perapera u Aôndo a hembe cii yô. Nahan se wuese Ter wase u sha, Yehova kpishi, gadia Ne mba ve eren nahan shi ve dondon ikyav i Wan na sha u civir un sha mimi mbara cii injar!—Ôr Pasalmi 34:3; Mbaheberu 11:6.

18. Kanyi se lu timen shami ken ngeren u a dondo nee?

¹⁸ Hii sha Abel je, Yehova lumun a uumace mba perapera cii, sha ci u ve na Vor u ityendezwa la jighjigh shi mba a vangertiôr ken Vor shon. Yehova yange fa dedoo ér Wan na una tile sha mimi shi ku na kpa ua tôô “isholibo i tar kera” elegh elegh. (Yoh. 1:29) Shi uumace mba sha ayange a ase ne kpa zua a mtsera sha ku u Yesu la. (Rom. 3:26) Nahan ka averen a nyi nagh ku ipaan ku Kristu la ku a va u a mini? Se lu timen sha mpin ne ken ngeren u a dondo ne.

[Ngeren mba shin kpe]

Ú Na Mlumun Wer Nyi?

• Satan yange puu perapera u Aôndo nena?

• Batisema u Yesu la yange tese nyi?

• Ku u Yesu la er nyi?

[Mbampin Mba Ngeren u Henen]

[Foto u sha peeji 9]

U fa kwagh u batisema u Yesu la yange tese kpa?