U Ngu Dondon Kristu A Ishima I Môm Kpa?

“Kape ne lu zenden kpaa la shi yemen nen hemen sha mi kpaa.”—1 TES. 4:1.

1, 2. (a) Ka ityom i ageegh i nyi ior kpishi mba sha ayange a Yesu la nenge a mini? (b) Shighe wase ne kpa ka shighe u injaa sha ci u nyi?

 MASE zan u tema u hen er yange wea lu uma shighe u Yesu lu shin tar la ve ma saan we iyol kpa? Hen ase er alaghga Yesu ma bee u angev mbugenegh, nahan ma war u sha ikyev i ican i yan shin mnyoon ugen u ma u nyôr ker la. Shin alaghga u hen er wea ongo ityesen i Yesu sha ato ou shi wea hen kwagh sha ikyev na gayô wea nenge un u eren ivande ve ma saan we iyol la. (Mar. 4:1, 2; Luka 5:3-9; 9:11) Ma i lu kwagh u civirigh kpishi u lun hen ape Yesu er ityom ne la! (Luka 19:37) Hii hen shighe la je kov môm kpa kera shi nenge a ityom i ageegh er ingila nahan ga, shi kwagh u Yesu yange kure sha tar “sha nagh ku sha iyol Na la” kpa, una kera kimbir eren ga.—Heb. 9:26; Yoh. 14:19.

² Shighe wase ne kpa, ka shighe u injaa kpe kpe. Sha ci u nyi? Se mba ken shighe u Ruamabera tsengaôron ér ka “shighe u mkur” man “ayange a masejime” yô. (Dan. 12:1-4, 9; 2 Tim. 3:1) Ka ken shighe ne kpa yange i zenda Satan sha kera ye. Ica a gba ga tsô, a kange un a kende shin “ihungwa i i ze kweng” la. (Mpa. 12:7-9, 12; 20:1-3) Shi ka ken shighe ne kpa se lu a ian i civirigh i pasen “Loho u Dedoo u tartor” sha tar cii, ôron ior kwagh u  ishimaverenkeghen i paradiso u a lu van la ye; ka tom u mayange a kera kimbir eren u ga yô.—Mat. 24:14.

3. Cii man Yesu kôndo yem sha yô, yange kaa a mbadondon un ér ve er nyi, man gba u vea er kwagh shon nena?

³ Cii man Yesu kôndo yem sha yô, a kaa a mbadondon un ér: “Né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.” (Aer.1:8) Tom la lu u tesen ior sha tar cii. Yange gba u vea lu a awashima u nyi sha tom laa? Lu u vea gema ior vea hingir mbahenen, inja na yô, vea zua a mbadondon Yesu vea seer cii ve mkur una va ye. (Mat. 28:19, 20) Aluer se soo u kuren tom u Kristu ne yô, a gba u se er nyi?

4. (a) Mkaanem ma Peteru ma i nger ken 2 Peteru 3:11, 12 la tese ér ka hange hange u eren nyi? (b) Doo u se wa ikyo sha ci u nyi?

⁴ Nenge ase kwagh u apostoli Peteru yange ôr ne, ér: “Doo u né lu ken icighanmlu man né lu civir Aôndo nana? Er ne keghen mve u iyange i Aôndo.” (2 Pet. 3:11, 12) Mkaanem ma Peteru man tese er i lu hange hange u kuran ken ayange a masejime ne shi veren ishima sha mciviraôndo yô. Mciviraôndo ne kua u pasen loho u dedoo kpaa. Sha nahan yô, saan se iyol kpishi u nengen er anmgbianev asev sha tar cii ve lu eren tom u Kristu ne sha gbashima nahan! Nahan kpa, se kav ser doo u se wa ikyo sha er mbamkighir mba se tagher a mi ken tar u Satan ayange ayange la man asaren a ase a sha myen la aa tule gbashima u se lu a mi sha tom u Aôndo ne ga yô. Nahan yô, de se time nen sha igbenda i se kar ve se za hemen u dondon Kristu yô.

Lumun Ityom i Aôndo a Ne U La

5, 6. (a) Paulu yange wuese mbananjighjigh a na imôngo sha nyi, kpa gema ta ve icin sha nyi kwagha? (b) Doo u se er ityom i Aôndo a ne se la sha uhwe ga sha ci u nyi?

⁵ Ken Washika u Paulu nger hen Mbakristu mba ken Yerusalem la, a wuese ve sha jighjigh ve u nan man ishima ve i wan shighe u i lu tôvon ve a ican la. A kaa wener: “Umbur nen ayange a karen la zum u kwagh va wanger ne la, ne nôngo ngegh sha atsan a a tser ne la.” Sha mimi yô, Yehova umbur tom ve u sha jighjigh la. (Heb. 6:10; 10:32-34) A shi nan kpa mkaanem ma Paulu ma kundu kundu man yange ma a taver Mbakristu mba ve lu Mbayuda mbara asema kpishi. Nahan kpa, ken washika shon môm, Paulu ta icin sha ieren i orumace igen i aluer se kighir i ga yô, ia fatyô, u tulen gbashima wase ken tom u Aôndo yô. A kaa ér Mbakristu ve de “vende” shin luun a atimbirakaa sha er vea palegh u dondon mkaanem ma Aôndo ga.—Heb. 12:25.

⁶ Icintan i sha ieren i ‘vendan’ u eren ityom i Aôndo la, ngi sha ci u Mbakristu nyian kpaa. Se kav ser gba u se kange ishima ser se er ityom yase i Mbakristu la sha uhwe shin se de ser gbashima wase ken tom u Aôndo la a ndôhôr kpaa ga. (Heb. 10:39) Kera ga je kpa u civir Aôndo ka kwagh u uma man ku.—1 Tim. 4:16.

7, 8. (a) Kanyi ia wase se u zan hemen u eren tom u Aôndo sha gbashima? (b) Aluer gbashima wase ndôhôr yô, kanyi i doo u se umbur sha kwagh u Yehova man Yesuu?

⁷ Kanyi ia wase se ve se palegh u kemen iyol sha u eren ityom i Aôndo i i gbe u se er laa? Gbenda môm u injaa u se er kwagh ne yô, ka u timen sha inja i iceghzwa i yange se er shighe u se tsegha ayol a ase sha ci u Aôndo la hanma shighe cii. Jighilii yô, se lu tôndon zwa a Yehova ser se ver u eren ishima na la hiihii ken uuma asev, man se soo u kuren ityendezwa la. (Ôr Mateu 16:24.) Sha nahan yô, doo u ashighe agen se tile se pine ayol a ase ser: ‘M kange ishima u eren kwagh u tesen mer m tsegha iyol yam sha ci u Aôndo er shighe u i erem Batisema la nahan kpa? Shin anyom a á kar ne na yô, gbashima la ndôhôrô?

 ⁸ Aluer se tôv ayol a ase sha mimi man se kav ser gbashima u yange se lu a mi la wa ndôhôr yô, doo u se umbur mkaanem ma taver or ishima ma profeti Sefania ôr man. Ma kaa ér: “Ave ou a̱ de shirin livaa ga. TER, Aôndo wou, ngu ken atô wou, Orutaha u Una yima yô; Una ember we a iember.” (Sef. 3:16, 17) Mkaanem ma taver or ishima man yange ma hii lun sha ci u Mbaiserael mba tsuaa, mba ve due ken uikyangen ken Babilon ve hide ken Yerusalem mbara. Nahan kpa, ishimataver ne ngi sha ci u ior mba Aôndo nyian kpaa. Er tom u se lu eren ne u lu tom u Yehova yô, doo u se umbur ser Yehova man Wan na mba suen se ken tom ne sha er se er ityom yase i Aôndo a ne se la se kure i vough yô. (Mat. 28:20; Fil. 4:13) Aluer se mba nôngon sha afatyô wase cii ser se za hemen u eren tom u Aôndo sha gbashima yô, una ver se doo doo shi una wase se se za hemen u vesen ken jijingi.

U ‘Vanden Keren Tartor U Aôndo’ sha Gbashima

9, 10. Injakwagh i Yesu ôr sha kwagh u zegeiniongo la pase kwagh u vesen u nyi, man se fatyô u henen nyi ken injakwagh laa?

⁹ Zum u Yesu lu yan iwer hen ya u orhemen u Mbafarishi ugen la, a ôr injakwagh sha kwagh u zegeiniongo. Ken injakwagh la, Yesu ôr kwagh u ian i civirigh i va nyôron Tartor u sha, i yange i na ior kposo kposo yô. Shi yange pase inja i u ‘vendan’ u eren Aôndo tom la kpaa. (Ôr Luka 14:16-21.) Mba i lôhô ve ken injakwagh i Yesu ôr la lu a atimbirakaa a ve kôr a ve sha mi ve ve venda u van iniongo la yô. U môm yange kaa ér gba u una za nenge sule u un sember yamen yô. Ugen di kaa ér un yam ibua, nahan u soo u za karen i. Ugen gema kaa ér: “M sember eren kwase, ka nahan man me fatyô u van ga ye.” Atôakyaa a ve na ne cii lu agbilinakaa a yange ve kôr ave sha mi yô. Or ka nan vande nengen sule shin ilev cii ve nan mase yamen ye, nahan ka i kera hingir torough torough u shi za nengen akaa ne zum u i yam a kera ga. Man a er nan ve or a sember vôson kwase tsô maa kwagh la una yange nan u vengese mlehe u iniongo i injaa nee? Kape i lu je ve ishima yange vihi or u lôhôn iniongo u ken injakwagh ne kondo la!

¹⁰ Ior mba Aôndo cii vea fatyô u henen kwagh ken injakwagh i Yesu ne. Vea hen nyi? Mayange se de ser mbamgbe asev, amba er mba i ter ken injakwagh i Yesu la nahan, ve hingir se akaa a vesen a hemban mcivir u Aôndo wase la ga. Aluer Orkristu ngu eren akaa a nan sha ian ga yô, gbashima u nan lu a mi sha tom u pasen kwagh la una pande. (Ôr Luka 8:14.) U kwagh la a de eren se ga yô, gba u se dondon kwaghwan u Yesu wa ér: “Vande keren nen tartor Na man perapera Na” la. (Mat. 6:33) Ka kwagh u taver se ishima kpen kpen u nengen er mbatomov mba Aôndo, mbayev man mbaganden cii, ve lu dondon kwaghwan u injaa la nahan! Sha kpôô yô, ior kpishi sôr uuma vev hingir akuma akuma sha er vea hemba nan ishima sha tom u pasen kwagh la yô. Averen a ve zough a mi la wase ve u fan ér u vanden keren Tartor u Aôndo la ne or msaanyol u mimi man mkom u vesen kpaa.

11. Ka kwagh u i nger ken Bibilo u nyi a tese ér ka hange hange u lun a gbashima shi civir Yehova a ishima i mômô?

¹¹ U tesen ikyav er i lu hange hange u or a lu a gbashima ken tom u Aôndo yô, nenge ase kwagh u yange er ken uma u Yoashi, u lu tor u Iserael la. Er ishima za un iyol ér alaghga Shiria una va hemba Iserael ityav yô, a za vaa a Elisha. Profeti Elisha kaa a na ér a ker ivaan sha windou vegher u tar u Shiria la, u tesen ér a hemba tar la ityav sha uwegh ku Yehova. Kwagh ne yange una taver tor la ishima je ka u henen a hen ga. Elisha shi kaa a Yoashi ér a tôô avaan a na a gbidye inya. Kpa Yoashi gbidye a inya kwa tar tseegh. Ishima vihi Elisha ker sha kwagh ne, sha ci u u̱ gbidyen avaan la inya kwa taan shin kwagh teratar la  yange ma tese ér una ‘hemba Shiria purututu.’ Kpa Yoashi eren nahan yô, lu u una hemba acin atar di tsô. Er Yoashi er kwagh sha gbashima ga yô, a kera hemba cii ga. (2 Utor 13:14-19) Kanyi se fatyô u henen sha kwagh nee? Saa se er tom u Yehova sha gbashima man a ishima i môm ve una na se iveren mgbeghaa ye.

12. (a) Kanyi ia wase se u lun a gbashima ken mcivir u Yehova shin er se tagher a mbamtaver nahan kpaa? (b) Pase iwasen i u lu zuan a mi sha u pasen kwagh kpoghuloo la.

¹² Mbamtaver mba ken uma ka ve kar gbashima wase man mciviraôndo wase kpaa. Anmgbianev mba nomso man mbakasev mba wan ishima a mbamtaver mba sha kwagh u inyar. Asema nga a vihi mbagenev sha ci u icôron i uange kôr ve, nahan mba kera fetyô u eren tom kpishi ken mcivir u Yehova ga. Nahan cii kpa, hanmô wase yô, nana fatyô u nôngon u wan ikyo sha er se lu a gbashima wase her shi se za hemen u dondon Kristu a ishima i môm yô. Nenge mbamhen mbagenev kua avur a Bibilo a á lu ken ngeren u kiriki u a lu a itinekwagh ér “Kanyi Ia Wase U Ú Za Hemen u Dondon Kristuu?” la. Hen er u fatyô u yaren tom sha mbamhen man avur a Bibilo la sha afatyô wou cii yô. U er nahan yô, u zua a averen jim jim. U pasen kwagh kpoghuloo la ka a wase se u veren ishima sha mcivir u Yehova shi ka a na uma wase a hemba lun a inja shi ka a va se a bem man msaanyol u hemban cii. (1 Kor. 15:58) Heela tseegh ga, u civir Aôndo a ishima i môm la ka a wase se u “keghen mve u iyange i Aôndo” la.—2 Pet. 3:12.

Time sha Mbamlu Ou sha Mimi

13. Se er nan ve se fa aluer se asange asange se mba civir Aôndo a ishima i môm yôô?

¹³ Doo u se umbur ser, u civir Aôndo a ishima i môm la ka di u vihin shighe ken kwaghpasen kpishi tsô ga. Mbamlu asev mba kposo kposo. Alaghga or u nan ne ihwa i môm shin ahwa ahar nahan tseegh hanma uwer sha u pasen kwagh yô, nana doo Yehova ishima kpishi je, aluer ka kwagh u mlu u nan a ne nan ian u eren jim jim la yô. (Nenge Marku 12:41-44.) Nahan u se fa kwagh u a lu u civir Aôndo a ishima i môm yô, gba u se time sha tahav asev man mbamlu asev sha mimi. Er se lu mbadondon Kristu yô, se soo ser se nengen akaa er un kpa a nengen a la. (Ôr Mbaromanu  15:5; 1 Kor. 2:16) Kanyi yange i hemba gban Yesu kwagh ken uma? Yange kaa a ikpelaior ken Kapernahum ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:43; Yoh. 18:37) Er u lu a gbashima u Yesu lu a mi sha tom u pasen kwagh la ken ishima yô, time sha mbamlu ou nenge aluer ka u ú fatyô u eren tom ne hemban er u lu vanden eren la yô.—1 Kor. 11:1.

14. Se fatyô u seer eren tom wase u pasen kwagh la nena?

¹⁴ Aluer se time sha mbamlu asev vighe vighe yô, alaghga se kure ikyaa ser se fatyô u seer shighe u se vihin ken tom u pasen kwagh la. (Mat. 9:37, 38) U tesen ikyav yô, agumaior ase udubu udubu mba ve sember been makeranta yô, seer shighe ve u pasen kwagh la, nahan mba zuan a msaanyol u a ve ken u eren tom u pania sha gbashima la. We kpa u soo u zuan a msaanyol laa? Anmgbianev mba nomso man mbakasev mbagenev time sha mbamlu vev yô, ve tsua u yemen hen ijiir igen ken tar ve shin ken tar ugen je kpaa, hen ape kwagh a hembe gban sha mbapasenkwagh mba Tartor yô. Mbagenev di yô, gema hen zwa ugen sha er vea wase ior mba ve lamen zwa u ken tar ugen yô. U seer shighe wou la a fatyô u lun kwagh u taver, nahan kpa, kwagh ne ve a averen mgbeghaa, man adooga kwagh ne una wase mbagenev vea “ar sha mfe u fan mimi la.” —1 Tim. 2:3, 4; 2 Kor. 9:6.

Akav a ken Bibilo a Se Dondo Yô

15, 16. Ka akav a unô se fatyô u dondon sha u lun mba dondon Kristu sha gbashima?

¹⁵ Mbagenev mba ve hingir mbaapostoli la ve er nena zum u Kristu yila ve ér ve lu mbadondon un laa? I ôr kwagh u Mateu ér: “Un kpaa a undu akaa cii, a mough, a dondo sha a Na.” (Luka 5:27, 28) Se ôr kwagh u Peteru man Anderia mba ve lu kôron ishu la ér: “Nahan ve undu ukper vev fese, ve dondo sha a Na.” Yesu maa shi zua a Yohane man Yakobu, ve lu cingen ukper vev vea ter ve. Ve di ve er nena shighe u Yesu lôhô ve ér ve va dondo sha a na laa? Yange “ve undu tso kua ter ve fese, ve dondo sha a Na.”—Mat. 4:18-22.

¹⁶ Ikyav i dedoo igen ka i Saulu, u va hingir apostoli Paulu la. Shin er vande lun a ityoron ishima, tôvon Mbakristu a ican nahan kpa, shighe kar yô, va gema uma na hingir “ikyagh ki i tsegh ki” sha u pasen iti i Kristu yô. “Maa [Paulu] gba pasen ken ushinagoge ér Yesu ka Wan u Aôndo.” (Aer. 9:3-22) Shin er gba u Paulu una wa ishima a mtaver man mtev u sha ican nahan kpa, mayange a undu gbashima na ga.—2 Kor. 11:23-29; 12:15.

17. (a) Ka nyi i lu isharen you sha kwagh u dondon Kristuu? (b) Ka averen a nyi se zough a mi sha ci u se mba eren ishima i Yehova a ishima yase cii man a agee ase ciilii?

¹⁷ Se kpa se soo u dondon akav a dedoo a mbahenen mbara, nahan vengese sha gbashima man a akperan shio sha myer u i yer se ér se va lu mbadondon Yesu la. (Heb. 6:11, 12) Ka averen a nyi se zough a mi er se lu zan hemen u dondon Kristu sha gbashima man a ishima i môm nee? Maa se iyol u eren ishima i Aôndo shi se zua a mkom er se seer lun a aan a tom ken tiônnongo yô. (Ps. 40:8; Ôr 1 Mbatesalonika 4:1.) Sha kpôô yô, er se lu nôngon kpoghuloo u dondon Kristu yô, se mba zuan a averen a tsôron anza er mmemshima man mkom man mlumun u Aôndo kua awashima u va zuan a uma u tsôron la nahan.—1 Tim. 4:10.

U Umbur Kpa?

• Ka tom u injaa u nyi i ne se, man doo u se nenge u nena?

• Ka ieren i orumace i nyi i gbe u se palegha, man ka sha ci u nyi?

• Doo u se tôv ayol a ase sha mimi nena?

• Kanyi ia wase se se za hemen u dondon Kristuu?

[Mbampin Mba Ngeren u Henen]

[Ngeren u kiriki/Foto u sha peeji 27 la]

Kanyi Ia Wase U Ú Za Hemen u Dondon Kristuu?

▪ Ôron mkaanem ma Aôndo ayange ayange shi gbidyen kwar sha kwagh u ú er la.—Ps. 1:1-3; 1 Tim. 4:15.

▪ Sônon iwasen man gbendatesen u jijingi u Aôndo.—Sek. 4:6; Luka 11:9, 13.

▪ Luun imôngo vea ior mba ve lu a gbashima sha tom u pasen kwagh yô.—Anz. 13:20; Heb. 10:24, 25.

▪ Umbur wer ayange a se lu ker ne ka a masejime.—Ef. 5:15, 16.

▪ Fa wer kwaghbo ngu ken u lun a atimbirakaa la.—Luka 9:59-62.

▪ Gbidyen kwar sha iceghzwa i yange u er shighe u ú tsegha iyol you sha ci u Aôndo la kua averen a or nana fatyô u zuan a mi mgbeghaa sha u civir Yehova shi dondon Kristu a ishima i môm la.—Ps. 116:12-14; 133:3; Anz. 10:22.