Hemba Kan Hegen Torough Torough U Se Kuran Cii
Hemba Kan Hegen Torough Torough U Se Kuran Cii
“Yô, kuran nen, gadia ne fa iyange i Ter wen Una va la ga.”—Mateu 24:42.
1, 2. Ka akaa a nyi nahan a tese ér se mba ken mkur u tar nee?
ORNGEREN akaa Bill Emmott kaa wener: “I nôngo ityav sha derianyom u sha ikyundu la je kera doo ato ga.” Á lumun wener i gbe je tsô uumace ndera tagher ishigh a bocan u ityav mbi nôngon man ipila i ve a mi la. Á seer wener: “I nôngo ityav ken derianyom u sha ikyundu la er ken uderimbaanyomov mba ve kar la nahan, kpa ityav mbin hemba vihin cii. Er i gbe je ka derianyom u sha ikyundu la i hii nôngon ityav mbi tar cii ye . . . U tesen ér ka ken derianyom la i hembe nôngon ityav cii yô, i nôngo ityav mbi tar cii la kwa môm tseegh ga, kpa i nôngo mbi kwa har.”
2 Yesu Kristu tsengaôron tsuaa je wener, “ikurior igen ia mough ityav a ikurior igen; tartor ugen kpaa ua mough ityav a tartor ugen.” Nahan kpa, kwagh ne ka di kwagh môm u tesen ‘ikyav i mve u Kristu man i mkurtar’ tsô. Yesu shi ôr ken kwaghôron u profeti u vesen la wener ijen ia gba man ubombauangev vea due, shi ityartenger ia lu. (Mateu 24:3, 7, 8; Luka 21:6, 7, 10, 11) Mbamzeyol mban mba hemban ngeen a ngee shi mba hemban taver a taver sha igbenda kposo kposo. Aeren a vihin tsung a ior ve eren sha shigh ki Aôndo shi ve eren a ior mbagenev se nengen la tese ér ifer i orumace gba ave. Aeren a dedoo nga gban a gba ijime, ifer man ipila i eren ngi san a sa kwan yemen aôndo, akaa ne cii nga myer hen avese ga. Ior kpishi inyaregh hemba doon ve ishima a Aôndo, shi ve uve ityough ken iemberyolough. Akaa ne cii tese ér se mba ken “ashighe a ican.”—2 Timoteu 3:1-5.
3. Gba u “uivande mba ve [lu] tesen mlu u ashighe” ne vea bende a vese nena?
3 Ú nenge mbamzeyol mba ve lu zan uumace iyol ne nena? Ior kpishi kwagh gbe ve sha akaa a vihin tsung a a lu eren ne ga, ishima i te ve kwe cuku tsô kpaa ga. Ashagbaior a ken tar ne kua mbafankwagh tsor tsor kpaa kav ikyav i “uivande mba ve [lu] tesen mlu u ashighe” ne ga; mbahemenev mba kwaghaôndo je kpa kanshio u pasen vough er i hii ve akaa ne a lu eren yô. (Mateu 16:1-3) Kpa Yesu wa mbadondon nav kwagh ér: “Yô, kuran nen, gadia ne fa iyange i Ter wen Una va la ga.” (Mateu 24:42) Yesu wa se kwagh ér se kura di icin i môm tsô se de ga, kpa ka u se ‘kuran gbem.’ U se kuran gbem yô, gba kpee u se lu per shi se lu geng ge geng. U eren nahan ne hemba di u se fan tsô ser se mba ken ayange a masejime ne, shi ka u se fan ser ayange ne ka a ican tseegh tsô ga. Gba kpee u se lu a jighjigh u nan dông ser “mkur u akaa cii mgbôghom.” (1 Peteru 4:7) Ka sha imba jighjigh u nan dông la ve se lu kuran fan ser shighe kera shi vese ga ye. Nahan, mpin u i gbe u se hen sha mi keng yô ka un ne: ‘Kanyi ia wase se ve se seer taver jighjigh wase u nan ser mkur mgbôghomô?’
4, 5. (a) Ka nyi ia na ve se taver jighjigh wase u nan ser mkur u bo tar ne mgbôghom, man ka sha ci u nyi? (b) Ka kwagh môm u nyi yange er sha ayange a Noa la shi sha shighe u mve u Wan u or ne kpa a lu erene?
4 Hen ase sha akaa a yange er cii man kwagh u vesen u yange i gba tar je lu a vande eren ga la va mase eren yô—kwagh u vesen ne lu Mngerem ma Deemee ma sha ayange a Noa la. Ior yange ve er afer ngee gande yô ishima ‘vihi Yehova ker.’ Nahan á kaa wener: ‘Me tim or sha tar kera.’ (Genese 6:6, 7) Man Yehova er di nahan vough. Yesu tôô mlu u tar lu sha ayange a Noa la kar sha ayange ase ne nahan á kaa wener: “Er lu sha ayange a Noa nahan, kape mve u Wan u or kpaa una lu la.”—Mateu 24:37.
5 Ka shami u kaan ér, ishima ngi Yehova ker a tar ungun ne er yange i lu un ker a tar u ú lu cii man Mngerem ma Demee la nahan. Er á tim tar u sha ayange a Noa u ú fa Aôndo ga la nahan, kape bo tar u sha ayange ne kpaa una tim ú kpee a bunde ga je la. U se kaven vindi vindi ser akaa a yange er sha ayange a Noa la nga eren hegen kpaa la a̱ taver jighjigh wase u nan ser mkur u tar ne mgbôghom. Ka akaa a nyi nahan yange er sha ayange la, shi hegen kpa a lu erene? Nga je kuma er ataan nahan. Kwagh u hiihii yô, í ôr ior kwagh u mtim la jighilii.
I Wa Ior Kwagh sha “Akaa A I Lu A Nenge A Mi Ga” La
6. Yehova yange wa ishima u eren nyi sha ayange a Noa la?
6 Yehova lu yôô sha ayange a Noa la ér: “Jijingi Wam Una kera tema ken or gbem ga, gadia nan kpaa nan ngu inyam tsô, nahan kpaa ayange a uma u nan yô, aa lu anyom deri man ikundu.” (Genese 6:3) Kwagh u Aôndo ôr ken inyom i 2490 C.S.W. la lu ikyav i tesen mhii u mkur u tar u ú fa Aôndo ga la. Nenge er kwaghôron na ne yange una lu ior mba ve lu sha ayange la a inja sha wono! Anyom yange mase shin 120 tseegh tsô Yehova una “va a mngerem sha tar deemee, sha u timin hanma kwagh u uma cii, u a lu a iôôn i uma ken a na, sha won, kera.”—Genese 6:17.
7. (a) Noa yange er nena sha kwaghwan u i wa un sha kwagh u Mngerem ma Deemee laa? (b) Doo u se er sha akaawan a i we se sha kwagh u mkur u tar ne la nena?
7 Noa ungwa kwaghwan u i wa un ér zege mtim ngu van la upuembaanyomov kar imôngo, nahan er kwagh sha kwaghfan sha shighe la sha u wan ago a una va war yô. Apostoli Paulu kaa wener: “Zum u Aôndo wa [Noa] kwagh sha akaa a i lu a nenge a mi ga la yô, a wa iko a gba tso sha u yiman ya na.” (Mbaheberu 11:7) Se di ye? Hii shighe u ayange a masejime a mkur u tar ungun ne hii ken inyom i 1914 la je anyom kar hegen kuma er 90 nahan. Sha kpôô yô, se mba ken “shighe u mkur.” (Daniel 12:4) Se nenge ser doo u se er sha akaawan a i we se la nena? Bibilo kaa ér, ‘or u nan eren ishima i Aôndo yô, nan ngu lun gbem sha won.’ (1 Yohane 2:17) Hegen ka shighe u se er ishima i Yehova torough torough je ne.
8, 9. Ka icintan i nyi Yehova a lu tan ior sha ayange nee, man mba yôôn icintan ne nena?
8 Ior mba ve lu henen Bibilo sha mimi yô, ve zua a mfe ken Ruamabera u jijingi u Aôndo a ne i nger la ér tar ne ua tim kpee je a bunde ga. Ú na jighjigh wer tar ne ua tim kpa? Ungwa ase kwagh u Yesu Kristu a ôr wanger wanger ne, wener: “Zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.” (Mateu 24:21) Yesu shi kaa wener Aôndo na un Orjir nahan una va pav ior una ver ve kposo er orkuran ilev ka nan pav iyôngo nan ver kposo a ivo nahan. Ior mba a na ve ibo la yô, “vea kar vea yem ken mtsaha u tsôron; kpa mbaperapera yô, vea nyôr ken uma u tsôron.”—Mateu 25:31-33, 46.
9 Yehova ngu umbur ior nav icintan ne sha u nan ve kwaghyan u ken jijingi sha shighe vough sha ikyev i “wanakiriki u jighjigh man u fan kwagh” la. (Mateu 24:45-47) Heela tseegh ga, i lôhô hanma ikyurior man hanma nongoior man hanma zwa cii ér ve ‘cia Aôndo, ve na Un icivir gadia shighe Na u ôron ijir kuma.’ (Mpase 14:6, 7) Kwagh u vesen u loho u Tartor u Mbashiada mba Yehova ve pasen tar sha won cii yô, ka kwaghwan u ka ve shi wan ior ér kera shi ca ga tsô Tartor u Aôndo ua va kar a hemen u orumace kera la. (Daniel 2:44) De tee kwaghwan ne wer ka beerkwagh ga. Kwagh u Aôndo uhembanagee ka una kende a ôr cii yô ka a er sha mi vough. (Yesaia 55:10, 11) Er yange er sha kwaghôron na sha ayange a Noa nahan kape sha ayange ase ne kpa una er vough je la.—2 Peteru 3:3-7.
Aeren a Ijimbagh Dumbur
10. Yange i er ijimba sha ayange a Noa la je kighir nena?
10 Kwagh ugen kpa ngu u a tese ér ayange ase ne nga kwagh môm a ayange a Noa la yô. Yehova wa mbamaren mba hiihii mbara kwagh ér ve yar tom a tahav mbu yaven a or mbu Aôndo na ve la sha icivir ken ivese nahan ve mar ônov ve ‘iv tar.’ (Genese 1:28) Mbatyomov mba hembanato yange ve hôngor a tsombor u uumace sha idya i eren sha ayange a Noa la. Ve gema ayol a ve ve hingir uumace, ve va nyôr kasev mbadoonashe tsung, ve mar ônov mba ve lu uumace shi ve lu azôv kpaa, ve lu Akôraior. (Genese 6:2, 4) I kar isholibo i mbatyomov mba ve wa idya tsung ne sha ijimba i ior mba ken Sodom man Gomora ve eren la. (Yuda 6, 7) Sha mimi yô, yange ijimba i eren dumbur sha ayange a Noa la.
11. Ka aeren a nyi ior ve lu eren hegen a a ne ve ayange ase ne a kaha kposo a ayange a Noa la ga?
11 Aeren a ior nyian di ye? Ken ayange a masejime ne, ior kpishi har uuma vev sha idya i eren kurum. Paulu pase kwagh u ambaaior la wang nahan ér, “asema a ve wa akpema”; ve mban kpishi ve na ayol a ve “sha ijimba i eren sha u keren hanma kwagh u hôngorough sha hua.” (Mbaefese 4:19) Ufoto mba ijimbagh man myav u nomso man kasev mba ve lu a vôso ayol a ve ga yaven a ayol a ve la man myav u yaven a mbayev mbakiriki shi nomso yaven a ayol a ve la dumbur hegen. Ior mbagenev hii u “ngohol injar i i kom sha mtsum ve” la kera kpaa, mbá zuan a iangev mbi tsaren sha myav u yaven a kwase shin nomsoor, man ivaa paven man mbamzeyol mbagenev.—Mbaromanu 1:26, 27.
12. Er nan ve i doo u se kôr kwagh u bo ihyomo?
12 Sha ayange a Noa la, Yehova va a Mngerem ma Deemee va tim tar u ú er idya kondo ato kpulo kpulo la kera. Mayange je i de hungur se ga, ayange ase ne nga di vough er ayange a Noa la nahan. “Zegecan” u a lu van la una tim ‘mbadyarev man mbasôronakombo man mbavihin ivaa sha idya man nomso mba ve yaven a ayol a ve’ cii kera. (Mateu 24:21; 1 Mbakorinte 6:9, 10; Mpase 21:8) Nahan gba torough torough u se kôr kwagh u bo ihyom shi se palegh akaa a a na ve se nyôr iyol ken ijimba yô!—Pasalmi 97:10; 1 Mbakorinte 6:18.
Tar ‘Mgbough a Ipila’
13. Er nan ve “tar mgbough a apera” sha ayange a Noa la?
13 Bibilo shi ôr ieren igen i yange i lu sha ayange a Noa la, i̱ kaa ér: “Tar vihi sha ishigh ki Aôndo, man tar mgbough a apera kpaa.” (Genese 6:11) Ipila lu ior kwagh u he ga. Kain wan u Adam wua anmgbian na u lu orperapera la. (Genese 4:8) Lameki er kwagh sha ipila e̱r i eren sha ayange a na la nahan, a wua wanyekwaor ugen, maa á dugh icam sha iyol gengese wener un wua or sha ci u una kura iyol na. (Genese 4:23, 24) Kpa gema sha ayange a Noa la yô ipila i eren dumbur je gande. Er mbatyomov mbahembanato mba ve lu ônov mba Aôndo mbara va er kasev shin tar ne shi ve mar mbayev mba ve lu—akôraior yô—ipila maa sa kwan hemba ave a tse. Bibilo i̱ New World Translation la tese ér ikyav i ishember i ken zwa Heberu i i gem ér akôraior a vihin tu ne yô ka “mbaageev”—“mba yange ve zôhô ior ve gbihi inya” yô. (Genese 6:4) Sha ci u ieren ne yô, Bibilo kaa ér tar “iv a apera.” (Genese 6:13) Nenge ican i Noa ya u yesen tsombor na ken imba tar la sha wono! Nahan kpa Noa ‘lu orperapera sha ishigh ki Yehova ken kov la’ cii.—Genese 7:1.
14. Tar u ainge ne “mgbough a apera” nena?
14 Uumace zer tagher a ipila sha ikyov ikyov. Sha ayange ase ne kpaa se mba tagher a ipila sha gbenda u hemban vihin tsung er sha ayange a Noa kpa lu vough nahan. Ka se zer ungwan agwa u ipila i eren hen tsombor man aeren a pilagh a mba wan tswam man agwa u tim-ikyuior man mwoo u ior wuan ikpelaior a ityôkyaa shio la. Heela tseegh ga, ityav mbí wuan ior kpishi. Tar ne shi mgbough a ipila. Er nan ve kwagh a lu nahan? Kanyi jim i ne ve akaa ne a lu seer a seere? Mlumun u sha mbampin mban tese kwagh ugen u yange er sha ayange a Noa shi a lu eren hegen kpaa yô.
15. (a) Kanyi i ne ve ipila i lu seer a seer ken ayange a masejime nee? (b) Man se mba a vangertiôr ser kanyi ia ere?
15 Zum u i ver Tartor u Mesiya u Aôndo sha ken inyom i 1914 yô, Yesu Kristu u i na un tôgh ku Tor la er kwagh u kpilighyol ne. Á daa Satan Diabolo man azôv a na sha cii á gbihi ve shin tar. (Mpase 12:9-12) Cii man Mngerem ma Deemee mara ma va yô, mbatyomov mbahembanato mbara undu ijiir ve sha va shin tar ne sha asema a ve; nahan kpa sha ayange ase ne di yô, i daa ve a daa sha, sha ageegh i gbihi ve shin tar ne. Nahan kera mba a tahav mbu vea gema ayol a ve a jijingi la vea hingir uumace shin tar ne vea er idya ga. Nahan ve ya kunya shi ishima vihi ve ker, shi ijirôron i i lu van la cier ve iyol kpishi, nahan mba tuur ior man mbamzough ken ijime ér ve nzughul a ior sha ifer shi ve er ipila i̱ hemban vihin a i̱ sha ayange a Noa la. Zum u mbatyomov mba hembanato mbara man tsombor ve iv tar u ú lu cii man Mngerem ma Deemee mara a ifer yô, Yehova tim ú kera gburuu gburuu. Fa di tsô wer er Aôndo tim tar sha ayange a Noa la nahan kape una er sha ayange ase ne vough je la! (Pasalmi 37:10) Nahan kpa, nyian ne ior mba ve lu kuran yô, fa ér myom ngu ikyua ikyua.
I Pase Loho
16, 17. Ka kwagh ugen u nyi yange i er sha ayange a Noa la shi i lu eren hegen kpaa?
16 Kwagh u sha unyiin u yange er ken tar u ú lu cii man Mngerem ma Deemee mara va, shi hegen kpa a lu eren yô, ka tom u i na Noa ér a er la. Noa gba zege tso. Shi lu ‘or u yôôn kwagh u perapera.’ (2 Peteru 2:5) Lu pasen loho u nyi? A shi nan kpa, lu pasen ior ér ve gema asema, shi lu tan ior icin sha mtim u a lu van la. Yesu kaa ér ior mba sha ayange a Noa la ‘fa ga zan zan mngerem ma deemee va, va kuwa ve cii’ kera.—Mateu 24:38, 39.
17 Sha ayange ne kpaa Mbashiada mba Yehova mba eren tom u pasen kwagh ne sha gbashima, nahan loho u Tartor u Aôndo ne ngu samber tar sha won cii. Ken hanma vegher tar cii ior nôngo u ôron loho u Tartor ne ken zwa ve. Hanma mgber u magazin u Iyoukura u yôôn Tartor u Yehova ne ka a lu ken ijô i hemba 140, shi ka i samber a mi i hemba ukôpi 25,000,000. Sha kpôô yô, mbá pasen loho u dedoo u Tartor ne ngu ‘tseren tar, sha u u̱ lu mpase hen akuraior cii’ yô. Shighe u i er tom ne i kur sha ishima i Aôndo vough yô, mkur una va kpee a bunde ga.—Mateu 24:14.
18. Ieren i ior kpishi nyian ve eren sha tom u pasen kwagh ne zua sha ieren i ior kpishi er sha ayange a Noa la nena?
18 Aluer se hide se hen er yange kwagh gba ior sha akaa a ken jijingi cuku tsô kpaa ga shi aeren a dedoo ban sha ayange a a lu cii man Mngerem ma Deemee mara va la yô, se fa er yange i hii ve ior mbananjighjighga mba ve wanndor a tsombor u Noa la ve náhán tsombor u Noa tar, ve dughun ve asôngo shi ve heen ve kpaa yô. Er ve lumun a Noa ga nahan kpa mtim va kpee. Ken ayange a masejime ne kpaa, ‘mbanahantar due a tarnahan,’ mba hemban náhán tar cii. Kpa Bibilo kaa ér “iyange i Ter ia va er ormbaiv nahan.” (2 Peteru 3:3, 4, 10) Ia va sha shighe u i gbe u ia va la vough. Ia ngôôr ga. (Habaku 2:3) Nenge er i doo u se kuran sha wono!
Lu Ior Kpuaa Tseegh War Ye
19, 20. Kanyi igen se hen sha kwagh u yange er sha shighe u Mngerem ma Deemee la shi una va er sha shighe u mkur u tar nee?
19 Ayange a Noa la nga kwagh môm a ayange ase ne sha gbar u akaabo a ior eren la man mtim ve la tseegh ga. Er ior war Mngerem ma Deemee mara nahan, kape ior vea war mkur u tar ungun kpaa je la. Mba ve war Mngerem ma Deemee mara lu mbaasemaleghlegh mba uma ve kaha kposo a ishamior igen la cii. Yange mbaasemaleghlegh mbara wa icintan i Aôndo ikyo, nahan ve lu paleghaa a bo tar u sha ayange la la. Bibilo kaa ér “gema doo TER a Noa.” “[Noa] lu a acôghol iyol ga, ken ikov na cii.” (Genese 6, 8, 9) Ken icombor i i lu sha shighe la cii, lu tsombor môm tseegh, lu “ior kpeghee, ka uuma mba iorov anigheni tsô ve war sha mnger ye.” (1 Peteru 3:20) Yehova Aôndo wa ve tindi ér: “Maren nen, seer nen a seer, man shi iv nen tar.”—Genese 9:1.
20 Mkaanem ma Aôndo ma na se ibumun ér “zegeikpelaior” ia ‘war zegecan’ u a lu van la. (Mpase 7:9, 14) Zegeikpelaior la ia lu ingyegh nena? Yesu iyolna kaa wener: “Hunda hoghor, gbenda kpaa imbishi u u ze sha uma la, mbazuan a mi mba kpeghee tsô.” (Mateu 7:13, 14) Ken atô u ior ubiliôn imôngo mba ve lu shin tar hegen ne kpaa ka ior kpeghee tseegh vea war zegecan ua lu van la ye. Ve kpaa vea lu a ian icivirigh vough er mba ve war Mngerem ma Deemee mara kpa lu a mi nahan. A va na mba vea war la ian kpuaa sha u ve mar ônov mba ve kpa vea lu ityô i tar u he la yô.—Yesaia 65:23.
“Kuran Nen”
21, 22. (a) Kwagh u ú hen sha kwagh u Mngerem ma Deemee ne tese ú nyi? (b) Ivur i sha inyom i ken inyom i 2004 ne ér nyi, man er nan ve i gbe u se er sha kwaghwan u ivur ne i we se laa?
21 Er i lu inja er Mngerem ma Deemee mara er ica gba hegen nahan kpa, ma a kwaghwan u mayange je se gema ijime a mi ga yô. (Mbaromanu 15:4) Akaa a yange er sha ayange a Noa shi a lu eren sha ayange ase ne kpaa la a̱ na se seer zuan a mfe er i hii ve a lu eren yô, shi a̱ na se lu tsevaa sha mve u Yesu una va abu una va ôr mbaaferev ijir la.
22 Yesu Kristu ngu hemen zegetom u kohol ior ken jijingi nyian ne. Paradiso u ken jijingi u a lu er ka tso nahan la ngu u una na mbacivir Aôndo mba mimi mkor shi una war ve yô. (2 Mbakorinte 12:3, 4) Gba kpee u se lu ken paradiso la ve se va war zegecan la ye. Tar u Satan wa ikyasen u paradiso u ken jijingi la atô, ngu keghen a kegh u menan nyityô or u nan lu meer mnyam ken jijingi cii. Nahan gba hange hange u se “kuran” shi se kohol iyol sha ci u iyange i Yehova la.—Mateu 24:42, 44.
Baver We Kpa?
• Ka kwaghwan u nyi Yesu wa sha kwagh u mve na la?
• Yesu kar mve na la sha nyi?
• Ayange ase ne nga kwagh môm a ayange a Noa la nena?
• U se henen sha akaa a yange er sha ayange a Noa shi ayange ne kpaa a lu eren ne bende a m-er u sè eren kwagh torough torough la nena?
[Study Questions]
[Blurb on page 10]
Ivur i sha inyom i ken inyom i 2004 ne ér: “Kuran nen, . . . kohol nen iyol.”—Mateu 24:42, 44.
[Picture on page 7]
Noa er sha icintan i Aôndo ta un la. Se mba eren nyian nahan kpa?
[Pictures on pages 8, 9]
“Er lu sha ayange a Noa nahan, kape mve u Wan u or kpaa una lu la.”