Ezequiel 9:1-11
9 Ikhú nidxawuun mbá aʼwá gakhi̱i̱ dí niʼthúnʼ: “¡Atagímbíin bi̱ muni̱ rí mamínuuʼ xuajin, mámbáa gáyá náa ñawúunʼ ajua̱nʼ rí muni̱ gámbáa ga̱jma̱a̱!”.
2 Ndi̱yo̱o̱ dí naguwáʼ mbá majuiin xa̱bekha náa níjniúu xkrugua dí mba̱a̱+ dí naguanúu xígií náa norte, mámbáa kayá aju̱u̱nʼ náa ñawúunʼ rí muxujmbi̱i̱n ga̱jma̱a̱. Náa majñu̱únʼ ikhiin na̱ʼkha̱ mbáa xa̱biya̱ bi̱ kagíʼ xtíin lino, bi̱ kayá náa smídúu estuche* dí najmuu secretario. Ikhiin nitu̱ʼu̱u̱n ga̱jma̱a̱ niguájun náa níjniúu dí nuxnajxi̱ tsigijñaʼ dí niguma ga̱jma̱a̱ cobre.+
3 Agiuuʼ Dios ndrígóo Israel+ dí naxpíbínʼ nigi̱jxi̱ asndu náa rígá, náa tsu̱du̱ún querubines, ga̱jma̱a̱ ni̱jkha̱ náa riejuun guʼwá.+ Ga̱jma̱a̱ ikhaa* nigíʼdu̱u̱ nindxa̱ʼóo xa̱biya̱ bi̱ kagíʼ xtíin lino, bi̱ kayá náa smídúu estuche dí najmuu secretario.
4 Jeobá niʼthúu̱n: “Ayuʼ náa mbá xúgíʼ xuajin Jerusalén, atagíʼma mbá tsinaʼ náa xkídúnʼ mbá xúgíinʼ bi̱ nutsiná ga̱jma̱a̱ bi̱ nagáwíinʼ a̱jkiu̱ún+ eʼni mbá xúgíʼ dí tsaga dí xtáa raguma náa xuajin”.+
5 Ga̱jma̱a̱ náa inuʼ niʼthún eʼwíinʼ: “Aʼguala náa xuajin, aʼguala náa kidxuuʼ, guradíinla xa̱bu̱. Xáxmiéjuanla gúni̱ ni má xágáwíinʼ a̱jkia̱la ku̱ñu̱u̱n.+
6 Guradíinla mbá xúgíinʼ, xabuanii, jiámá, wa̱ʼxa̱ʼ* bi̱ xóó tsébúnʼ gajmiún xa̱bu̱, e̱ji̱n ga̱jma̱a̱ gu̱ʼu̱.+ Mú xúradíinla bi̱ guáʼdáá tsinaʼ.+ Gugíʼdi̱i̱la náa goʼwóʼ”.+ Ikha jngóo nigi̱ʼdi̱i̱ ginii niradíin bi̱ kuya̱ edxu̱u̱ bi̱ kúwá náa inuu guʼwá rí nduyamajkuíí Dios.+
7 Ikhú niʼthún: “Gu̱ni̱ gachííla guʼwá náa rí nduyamajkhuʼ ga̱jma̱a̱ gu̱ni̱ majthíinʼla náa rexo̱o̱ goʼwóʼ bi̱ nikháñún.+ ¡Aʼguala!”. Ikhú nigún ga̱jma̱a̱ niradíin xa̱bu̱ bi̱ kúwá náa xuajin.
8 Índo̱ kúwá ruradíin xa̱bu̱, niguanúʼ mbáwún, nismbatígo̱ʼ mbayííʼ ga̱jma̱a̱ nindxa̱ʼwa̱: “¡Tátá Jeobá bi̱ itháán Mba̱a̱! Lá maradíin mbá xúgíinʼ bi̱ xóó naguanún náa Israel ga̱jma̱a̱ numuu dí nataxídirámáánʼ dí nakásngaña̱a̱nʼ náa Jerusalén ráʼ.”+
9 Ikhú ikhaa niriʼñuʼ: “Dí nikiéʼkhúún bi̱ kúwá náa goʼwóo Israel ga̱jma̱a̱ náa Judá ra̱ʼkhá tháán mba̱a̱ nindxu̱u̱.+ Náa mbá xúgíʼ xuajin kajnííʼ eʼdi,+ náa xuajin kajnííʼ dí ra̱májánʼ.+ Numuu rí ikhiin nuthi ‹Jeobá niniñuuʼ xuajin, Jeobá tséʼyoo nimbá›.+
10 Mú xígi̱ kaʼnii gáni̱ ikhúún, xáxmiéjunʼ gúni̱ ni má xágáwíinʼ a̱jkiu̱nʼ ka̱ñu̱u̱n.+ Ma̱ni̱ rí mumíniiʼ ga̱jma̱a̱ numuu xúgíʼ rí nini̱”.
11 Ikhú ndi̱yo̱o̱ xa̱biya̱ bi̱ kagíʼ xtíin lino, bi̱ kayá náa smídúu estuche nitanga̱a̱ gáʼthí rí niʼni. Niʼthí: “Ni̱ni̱ xó má ikháán nitaxúʼmún ma̱ni̱”.
