Ezequiel 19:1-14

  • Ajmúú ngíná ga̱jma̱a̱ numún bi̱ kuya̱ edxu̱u̱ náa Israel (1-14)

19  “Atani̱ mbá ajmúú ngíná ga̱jma̱a̱ numún bi̱ kuya̱ edxu̱u̱ náa Israel. 2  Marata̱: ‹Tsáá ninindxu̱u̱ ru̱dáaʼ* rá. Mbáa leona náa majñu̱únʼ león. Nibóoʼ náa majñu̱únʼ león bi̱ gújkuíinʼ* ga̱jma̱a̱ niʼni mba̱ji̱i̱n e̱ji̱i̱n.  3  Niʼni mbaja̱a̱ mbáa a̱ʼdióo,ga̱jma̱a̱ ikhaa ni̱jkha̱nú ninindxu̱u̱ mbáa león gújkuiiʼ. Ikhaa nijmañuu marujkuri̱gi̱i̱n xujkhúʼ bi̱ naguguin ga̱jma̱a̱ naʼkhu̱u̱n xa̱bu̱.  4  Xa̱bu̱ xuajin nidxawíín ga̱jma̱a̱ numuu, nirugua̱a̱ náa mbá iñáʼ,nigún kuya̱a̱ ga̱jma̱a̱ ajua̱nʼ náa ku̱ba̱ʼ ndrígóo Egipto.  5  Ru̱dúu̱ león nigi̱ʼthu̱u̱n dí matanga̱a̱ asndu índo̱ ndiʼyoo rí nándáa i̱mba̱ dí maʼni. Niguajtuwiin i̱mba̱a̱ a̱ʼdióo ga̱jma̱a̱ niʼni dí mani̱ndxu̱u̱ mbáa león gújkuiiʼ.  6  Bugi̱ ma̱ngaa nijngruigo̱o̱ náa majñu̱únʼ león ga̱jma̱a̱ ni̱jkha̱nú ninindxu̱u̱ mbáa león gújkuiiʼ. Nijmañuu maxkuʼtirigi̱i̱n xujkhúʼ bi̱ naguguin, ga̱jma̱a̱ naʼkhu̱u̱n xa̱bu̱.  7  Nijngruigo̱o̱ náa majñuuʼ torres dí wájun gújkhúʼ ga̱jma̱a̱ naʼni gámbáa xuajin,aʼwá dí nandxa̱ʼwá niwáán náa mbá xúgíʼ ku̱ba̱ʼ rúʼko̱ dí niguanáa.  8  Xa̱bu̱ xuajin bi̱ kúwá mijngii niguwáʼ mu murugua̱a̱ ga̱jma̱a̱ mbá amaʼ,niʼngu̱u̱n nirugua̱a̱ náa mbá iñáʼ.  9  Nixuda̱a̱ʼ ga̱jma̱a̱ ajua̱nʼ náa mbá jaula ga̱jma̱a̱ nigún kuya̱a̱ Babilonia náa xtáa rey. Ikhí niruguaraʼaa mu ni xáwáán itháan dí nandxa̱ʼwá náa kúbá dí rígá náa Israel. 10  Ru̱dáaʼ ninindxu̱u̱ xóo mbá ixu̱u̱ uva náa eʼdiaaʼ,* dí kiʼdu náa rawuunʼ iyaʼ. Numuu dí rígá mba̱ji̱nʼ iyaʼ, ikha jngóo naxná xndúu ga̱jma̱a̱ gíʼdoo mbaʼa ñawúunʼ. 11  Ikhí nigájnuu ñawúunʼ rí gújkhúʼ, dí májánʼ mu maguma ga̱jma̱a̱ ixi̱ ñajunʼ ndrígu̱ún xa̱bu̱ ñajunʼ. Ndi̱ja̱a̱ ga̱jma̱a̱ ndiʼya itháan ki xóo i̱ʼwáʼ ixi̱. Ni̱jkha̱nú nijmaʼnuuʼ ga̱jma̱a̱ numuu rí mbaʼ, ma̱ngaa dí gíʼdoo mba̱ʼu̱ ñawúunʼ. 12  Ga̱jma̱a̱ numuu rí nakásngañu̱únʼ niruburiyaʼ ga̱jma̱a̱ nidatiga̱ náa ku̱ba̱ʼ,ga̱jma̱a̱ mbá giñánʼ dí na̱ʼkha̱ xígií náa nagájnuu a̱jkha̱ʼ* niʼni dí mujndooʼ xndúu. Ñawúunʼ dí gújkhúʼ nixpigari̱gú ga̱jma̱a̱ nijndooʼ ga̱jma̱a̱ mbá aguʼ nitsikhá. 13  Dí xúgi̱ kiʼdu náa mbá ku̱ba̱ʼ mijxooʼ,*náa mbá ku̱ba̱ʼ nijndooʼ náa nándáa iyaʼ. 14  Aguʼ nitsikhá ñawúunʼ, rudiuuʼ ga̱jma̱a̱ xndúu. Nánguá niguanúu nimbá ñawúunʼ dí gújkhúʼ ni má nimbá dí maguma ga̱jma̱a̱ ixi̱ ñajunʼ ndrígu̱ún xa̱bu̱ ñajunʼ. Rígi̱ nindxu̱u̱ mbá ajmúú ngíná ga̱jma̱a̱ maʼga̱nú majmaʼnuuʼ xóo ajmúú dí ngíná›”.

Mbaʼa nota

^ O “nániáaʼ”.
^ O “bi̱ guáʼdáá xtátsiu̱ún náa aphúún”.
^ O mbáa “náa kiʼdu uva ndrígáaʼ”.
^ O “este”.
^ O “desierto”.

Copyrights ndrígóo i̱yi̱i̱ʼ rígi̱