Raga̱jma̱ i̱yi̱i̱ʼ rí na̱jkha̱ inún Corintios 6:1-18
6 Xóo bi̱ nuñajunʼ gajmiúlú Dios,+ natakháñala rí xánindxu̱u̱ ndíí dí nundrígúla rí májánʼ wéñuuʼ a̱jkiu̱u̱n Dios maski ajndu rakáʼyala.*+
2 Numuu rí Dios naʼthí: “Nidxawaanʼ índo̱ niratákáñuʼ ga̱jma̱a̱ nimbáyaaʼ índo̱ nitando̱ʼo̱ʼ rí ma̱ni̱ kríña̱a̱nʼ”.+ ¡Mbiʼi rúʼko̱ nindxu̱u̱ xúgi̱! ¡Xúgi nindxu̱u̱ mbiʼi rí ma̱ni̱ kríña̱a̱nʼ!
3 Na̱nguá kuwáánʼ ru̱ʼni̱ nimbá dí maʼni majngrádiinʼ eʼwíinʼ, mu xúʼko̱ xáxkamaa dí ra̱májánʼ náa ñajunʼ dí nu̱ʼni̱.+
4 Rí phú nuʼnilú, nusngajmá dí phú ni̱ndxu̱lú xa̱bi̱i̱ Dios náa xúgíʼ dí nuʼnilú:+ Naʼngulú nuraʼníí mbaʼa gamiéjunʼ, tsingíná, mbiʼi rí ndayúlú, xkujndu,+
5 nixnulú, nixuda̱a̱nʼlú guʼwá e̱jua̱nʼ,+ nixujximíjna̱ xa̱bu̱, nitsudáanʼlu mu̱ʼni̱ ñajunʼ gakhi̱i̱, túʼnuʼ, nguáná túpiʼtsu,+
6 kuwáanʼlú kaʼwu, nuʼnilú xó má nijmañulú, naʼngo̱o̱ a̱jkiu̱lú,+ májánʼ a̱jkiu̱lú,+ nuniʼñámíjná rí maxnúlú ikha espíritu santo,* nusngajmá rí kuaʼdáá ngajua dí raʼkháa a̱jma̱ inuu,+
7 nuʼtálú dí gajkhun, nakumulú kuʼyáá tsiaki̱i̱ ndrígóo Dios,+ nurajtuunlú ajua̱nʼ dí nindxu̱u̱ májánʼ+ náa ñawún mújúnlu* ga̱jma̱a̱ náa ñawún xtiyulú,*
8 índo̱ nduyamajkulú o nguáná na̱nguá, nguáná índo̱ nuthi rí májánʼ ga̱jma̱a̱ numulú ga̱jma̱a̱ nguáná nuthi dí xkawiʼ ga̱jma̱a̱ numulú. Nduyulú xóo mbáa bi̱ naʼni nduwaʼ, maski ajndu nuʼthúún rí gajkhun,
9 nuni̱ rí asndu xóo tséniʼniáanʼlú maski ajndu nuniʼniáanʼlú májánʼ, nduyulú xóo mbáa bi̱ nikháñuu* maski ajndu kuwáánʼ mbiʼyulú,+ nduyulú xóo xa̱bu̱ bi̱ niguma ngíníi mú tséradiáanʼlú,+
10 nduyulú rí kuwáánʼ ngíná maski ajndu kuwáanʼlú gagi, nduyulú xóo xa̱bu̱ migínáa, mú nu̱ʼni̱ rí eʼwíinʼ maguaʼdáá, nduyulú xóo rí na̱nguá kuaʼdáá nditháan maski ajndu kuaʼdáá xúgíʼ.+
11 A̱ngui̱nʼ bi̱ kúwá náa Corinto, nitaxu mbájmbu ga̱jma̱a̱ nirmbáʼtáá a̱jkiu̱xu náa ikháanʼla.
12 Ikháanʼxu nusngajmá rí nanduxu ku̱ya̱la wéñuuʼ,+ mú ikháanʼ na̱nguá esngajmá dí nandala kuyuxu.
13 Ikha jngóo na̱tala xóo e̱ji̱nʼ, gusngajmá ikháá má ngajua ga̱jma̱a̱ gurmbáʼtáá a̱jkia̱la.+
14 Xúdala yugo gajmiála mbáa bi̱ tséʼni ñajuunʼ Dios,+ numuu dí rúʼko̱ gáʼni dí mani̱ndxu̱u̱ mixtiʼkhu dí mu̱da. Xú káʼnii gáruwaminaʼ dí májánʼ ga̱jma̱a̱ dí ra̱májánʼ rá.*+ Xú káʼnii gáruwaminaʼ aguʼ ga̱jma̱a̱ dí mikína rá.+
15 Xú káʼnii gándoo gambájxu̱u̱ Cristo ga̱jma̱a̱ Gixa̱a̱* rá.+ O xú káʼnii embríguminaʼ mbáa bi̱ naʼni ñajuunʼ Dios ga̱jma̱a̱ mbáa bi̱ tséʼni ñajuunʼ Dios rá.+
16 Xú káʼnii embríguminaʼ goʼwóo Dios ga̱jma̱a̱ xándú rá.+ Numuu rí ikháanʼ ni̱ndxu̱lú goʼwóo Dios bi̱ ndaʼya.+ Xó má niʼthí Dios: “Ikhúún maxtáá ga̱jma̱á nindxa̱la+ ga̱jma̱a̱ majngruigoʼ náa majñala, mani̱ndxu̱ʼ Dios ndrígala ga̱jma̱a̱ ikháanʼ mani̱ndxa̱la xuajñunʼ”.+
17 Jeobá* naʼthí: “Ikha jngóo gagajnáanʼla náa majñu̱únʼ ikhiin ga̱jma̱a̱ guniwájímíjná, xúrugua̱ nditháan rí mitsaga”,+ “ga̱jma̱a̱ ikhúún magruíguáanʼla”.+
18 “Jeobá* bi̱ gíʼdoo xúgíʼ Tsiaki̱i̱ naʼthí: ‹Ikhúún mani̱ndxu̱ʼ ana̱la+ ga̱jma̱a̱ ikháanʼ mani̱ndxa̱la e̱ji̱nʼ jiámá ga̱jma̱a̱ wa̱ʼxa̱ʼ›”.*+
Mbaʼa nota
^ Mbáa rí muxmíjná ga̱jma̱a̱.
^ Mbáa mu mumbáyumíjná ga̱jma̱a̱.
^ O “xóo rí kaʼyoo dí makañúlú”.
^ Náa ajngáa griego naʼthí, “dí nanújngurámuuʼ xtángoo”, xóo muʼthá bi̱ nawiñu̱u̱nʼ kuyáá xtángoo ndrígóo Dios.
^ Náa ajngáa griego naʼthí, “Belial”, dí nandoo gáʼthúu̱n nda̱a̱ dí ejmaa mbá kayuuʼ.
^ O “i̱jín go̱ʼo̱”.
