Raga̱jma̱ i̱yi̱i̱ʼ rí na̱jkha̱ inún Corintios 3:1-18
3 Lá ndayúlú xó má eʼwíinʼ, i̱yi̱i̱ʼ rí maʼthí dí májánʼ ga̱jma̱á numulú ráʼ. Lá ndayúlú rí magumaraʼmáʼ i̱yi̱i̱ʼ xóo rígi̱ ráʼ.
2 Ikháanʼ ñajuanla i̱yi̱i̱ʼ dí nigumarámáʼ,+ dí nigumarámáʼ náa a̱jkiu̱xu̱ rí najmaʼnuuʼ ma̱ngaa dí nuraxnuu xúgíinʼ xa̱bu̱ numbaaʼ.
3 Numuu rí nakujmaa kaʼwu rí ikháanʼ ñajuanla i̱yi̱i̱ʼ ndrígóo Cristo rí ikháanʼxu̱ niniraʼmáʼ xóo xa̱bi̱i̱ Dios.+ Tágumaraʼmáʼ ga̱jma̱a̱ yatsíínʼ,* nigumarámáʼ ga̱jma̱a̱ espíritu ndrígóo Dios bi̱ ndaʼya. Raʼkháa náa itsí wajpa, nigumarámáʼ+ náa a̱jkiu̱lú.*+
4 Dios naʼni rí makumulú kuʼyáá ga̱jma̱a̱ numuu Cristo.
5 Tséʼtá rí ga̱jma̱a̱ tsiaki̱i̱ ndrígúlú niʼni ratáanʼlú mu mu̱ʼni̱ ñajunʼ rígi̱, mú núma̱a̱ʼ má Dios dí niʼniratáanʼlu mu mu̱ʼni̱ ñajunʼ rígi̱.+
6 Ikhaa bi̱ niʼniratáanʼlú mu manindxu̱lú xa̱bi̱i̱ náa rí nimbánuu nuxi̱ʼ,+ raʼkháa dí kiʼnirámáʼ náa xtángoo,+ nindxu̱u̱ dí rígá náa espíritu santo.* Mú dí kiʼnirámáʼ náa xtángoo naʼthí dí makañúlú,+ mú espíritu santo naʼni rí makuwáanʼ.+
7 Xtángoo rí naʼthí makañúlú ga̱jma̱a̱ rí nigumarámáʼ náa mbá itsí,+ ni̱jkha̱nú nixpíbínʼ wéñuuʼ náa inún xa̱bu̱ Israel rí asndu tséʼngu̱u̱n gúyáá inuu Moisés. Aguʼ rí nixpíbínʼ inu+ maguma gámbáa.
8 Á mu rí xtángoo nixpíbínʼ, náá numuu rí espíritu santo xándoo maxpíbínʼ itháan rá.+
9 Á mu xtángoo rí naʼthí mugíʼníí xa̱bu̱+ naxpíbínʼ,+ ¡itháan gíʼmaa maxpíbínʼ náa ñajunʼ rí nambáñún xa̱bu̱ bi̱ ni̱ndxu̱ún jmbiin!+
10 Xtángoo rí naxpíbínʼ tsémbríguíi nditháan ga̱jma̱a̱ rí naxpíbínʼ dí nambánuu nuxi̱ʼ.+
11 Numuu rí á mu xtángoo dí niguma gámbáa nixpíbínʼ wéñuuʼ índo̱ ni̱ʼkha̱nú,+ ikha jngóo rí nimbánuu nuxi̱ʼ gíʼmaa maxpíbínʼ itháan.+
12 Numuu dí rígá dí kuaʼti̱i̱n,+ ikha jngóo tsímíñúlú dí muʼthá,
13 tséʼni xóo Moisés, bi̱ nirugoo inuu ga̱jma̱a̱ xtíin+ mu xa̱bu̱ Israel xúyáá rí maʼga̱nú mambáa.
14 Mú ku̱ma̱ ndrígu̱ún kúgoo.+ Asndu mbiʼi xúgi̱ índo̱ nagixnuu dí nimbánuu ginii, xóó kúgoo ga̱jma̱a̱ xtíin,+ mú i̱ndó Cristo ma̱ndoo mambáyulú mu murígúu.+
15 Ikha jngóo, asndu mbiʼi xúgi̱ mámbá rí nagixnuu Xtángoo ndrígóo Moisés,+ kúgoo a̱jkiu̱ún ga̱jma̱a̱ xtíin.+
16 Mú, índo̱ mbáa natanga̱a̱ náa Jeobá,* nagajta̱a̱ xtíin.+
17 Mú Jeobá* nindxu̱u̱ Espíritu,+ náa rígá espíritu ndrígóo Jeobá* ndawa̱a̱ tsáa kaxtuʼwájmaa.+
18 Xúgiáanʼlú nirígúu xtíin rí nigiʼma náa inulú, ni̱ndxu̱lú xóo niwanʼ rí naxpíbínʼ náa Jeobá,* nuriʼkumijnáalú mu manindxu̱lú xóo Dios ga̱jma̱a̱ musngajmá rí naxpíbiáanʼ náa Dios, ikháá má kayuuʼ xóo eʼni Jeobá,* bi̱ nindxu̱u̱ Espíritu.+
