Raga̱jma̱ i̱yi̱i̱ʼ rí na̱jkha̱ inún Corintios 13:1-14

  • Iwáá consejo ma̱ngaa naʼthún rí gáʼni (1-14)

    • “Guyajmamijná má xúʼko̱ mu mbu̱ya̱a̱ á mu kuaʼdáá mbá fe gújkhúʼ” (5)

    • Guxprígúmíjná ga̱jma̱a̱ mbóó rí gundxaʼwamíjna̱la (11)

13  Rígi̱ dí maʼni ajtsú nuthu dí nanirataminaʼ mu maʼgá gáyala. “Xúgíʼ xkujndu ma̱ndoo mambanúu ga̱jma̱a̱ numún* a̱jmi̱i̱n o ajtsíin xa̱bu̱”.+ 2  Maski ajndu xúgi̱ na̱nguá xtáá ikhí, mú asndu xóo xtáá má ga̱jma̱á nindxa̱la dí maʼni raga̱jma̱ aʼphu̱. Ikha jngóo na̱tala wapháá bi̱ nini̱ aʼkhá nákha ginii ga̱jma̱a̱ xúgíinʼ eʼwíinʼ, á mu natangu̱ún xákáwáanʼla, maxpríguala má tsiaki̱i̱. 3  Numuu dí ikháanʼla kúwáanʼ ruʼyáʼ mbu̱ya̱a̱ á mu dí Cristo naʼthí náa majñuʼ ikhúún, ikhaa na̱nguá wabaaʼ náa ikháanʼla, ikhaa nasngájma tsiaki̱i̱ ndrígóo náa ikháanʼla. 4  Gajkhun má dí ikhaa ninindxu̱u̱ wabaaʼ nákha nijuiʼdujmaa náa ixi̱,* mú xúgi̱ xtáa ndaʼya ga̱jma̱a̱ numuu tsiaki̱i̱ ndrígóo Dios.+ Gajkhun má dí mangáanʼ guabáanʼ xó má ikhaa, mú makuwa̱a̱nʼlu gajmiúlú ikhaa+ ga̱jma̱a̱ tsiaki̱i̱ ndrígóo Dios dí rígá náa ikháanʼla.+ 5  Guyajmamijná má xúʼko̱ mu mbu̱ya̱a̱ á mu kuaʼdáá mbá fe gújkhúʼ. Gusngajmá má xúʼko̱ mu mbu̱ya̱a̱ xóo nindxa̱la.+ O lá tséya̱a̱la dí Jesucristo xtáa mbóó ga̱jma̱á nindxa̱la ráʼ. Xúyáa á mu ikhaa tségruiguáanʼla. 6  Gajkhun dí nagúʼthu̱u̱n mbu̱ya̱a̱la dí Dios nigruiguáanʼxu. 7  Nunda̱ʼa̱a̱xu Dios mu ikháanʼla xúni̱ nimbá dí ra̱májánʼ. Tsénda̱ʼa̱a̱xu mu ikháanʼxu makujmaa dí nagruiguáanʼxu, nunda̱ʼa̱a̱xu mu ikháanʼla mu̱ni̱ rí májánʼ, maski ajndu ikháanʼxu nakujmaa dí tágruiguáanʼxu. 8  Numuu rí xáʼnguxu nditháan gúguajún jthi̱i̱n rí gajkhun, i̱ndó rí mumbáyixu rí gajkhun. 9  Phú gajkhun dí nadxuxu índo̱ ikháanʼ nindxu̱xu guabáanʼ ga̱jma̱a̱ ikháanʼla kuaʼdáála tsiaki̱i̱. Rígi̱ dí nunda̱ʼa̱xu índo̱ nutajkháan: Dí ikháanʼla muriʼkumijnáaʼ. 10  Ikha jngóo naniraʼmáʼ rígi̱ nákha xóó ndawu̱u̱n ikhí. Mu índo̱ gáxtáá ikhí, xáriyála mbaʼ maríyala ga̱jma̱a̱ numuu ñajunʼ dí nixnúʼ Tátá,+ ma̱ndoo majmuʼ mu maʼni gújkhúʼ fe ndrígala, raʼkháa dí ma̱ni̱ gámbáa. 11  Ikha jngóo a̱ngui̱nʼ, gaʼdxala má xúʼko̱, guniʼñámijná dí muxpriguálaʼ, rí muni̱i̱ a̱jkia̱la,+ rí mundxa̱ʼwa̱míjna mbóó,+ dí makuwáanʼ tsímáá+ ga̱jma̱a̱ Dios bi̱ nandoo kaʼyala bi̱ gíʼdoo rí tsímáá+ gaxtáa náa ikháanʼla. 12  Guraximijnáaʼ ga̱jma̱a̱ beso.* 13  Xúgíinʼ bi̱ kaxtaʼwíin* nurajxáanʼla. 14  Rí májánʼ wéñuuʼ a̱jkiu̱u̱n Tátá Jesucristo, maski ajndu rakáʼyala* ga̱jma̱a̱ ngajua ndrígóo Dios ga̱jma̱a̱ espíritu santo* rí nambáyalaʼ ikháanʼ xúgíʼ rígi̱ garigá náa ikháanʼla.

Mbaʼa nota

^ Náa ajngáa griego naʼthí, “rí gúthi”.
^ Atayáá glosario, ixi̱ náa makhañúu.
^ Náa ajngáa griego naʼthí, “beso rí kaʼwu”. Beso rígi̱ nuxnamijná a̱ngiu̱lú bi̱ ndiʼkhún eniʼnumijná.
^ Náa ajngáa griego naʼthí, “bi̱ kaʼwiin”.
^ Atayáá glosario, rí májánʼ wéñuuʼ a̱jkiu̱u̱n.
^ O “xi̱ʼ kaʼwu”, “tsiaki̱i̱ ndrígóo Dios”. Atayáá glosario, espíritu santo.

Copyrights ndrígóo i̱yi̱i̱ʼ rígi̱