Raga̱jma̱ i̱yi̱i̱ʼ rí na̱jkha̱ inún Corintios 12:1-21
12 Maski ajndu nda̱a̱ numuu dí manimbamínáʼ, mú nandoʼ ma̱tala rí ndi̱yo̱o̱+ ga̱jma̱a̱ rí nisngájmuʼ Tátá.+
2 Naʼni má 14 tsiguʼ rí nanuʼwíinʼ mbáa xa̱bu̱ bi̱ na̱jkha̱ kidxuuʼ Cristo, ni̱jkha̱ kiʼyáa náa ragajtsú mekhu. Na̱nguá e̱yo̱o̱ á mu ni̱jkha̱ ga̱jma̱a̱ xuyuuʼ o na̱nguá, i̱ndó Dios ndaʼyoo rúʼko̱.
3 Xúʼko̱, naniʼníinʼ xa̱bu̱ buʼko̱, na̱nguá e̱yo̱o̱ á mu ni̱jkha̱ ga̱jma̱a̱ xuyuuʼ o na̱nguá, i̱ndó Dios ndaʼyoo rúʼko̱.
4 Ni̱jkha̱ kiʼyáa náa ku̱ba̱ʼ mitsaanʼ* ga̱jma̱a̱ niʼdxawuun ajngáa rí xándoo miʼtá ma̱ngaa rí nimbáa xa̱bu̱ xándoo maʼthí.
5 Manimbamínáʼ ga̱jma̱a̱ numuu xa̱bu̱ buʼko̱, mú ikhúún i̱ndó manimbamínáʼ ga̱jma̱a̱ numuu rí guabúúnʼ.
6 Á mu nanimbamínáʼ xáni̱ndxu̱ʼ skágunʼ numuu rí ma̱ta̱ rí gajkhun, mú tsíyóʼ manimbamínáʼ mu xúʼko̱ nimbáa xáʼthí itháan ga̱jma̱a̱ numuu rí ndiʼyoo náa ikhúún o rí naʼdxawuun rí na̱tha̱
7 i̱ndó ga̱jma̱a̱ numuu rí nijuasngájmuʼ rí mitsaanʼ.*
Mu xánimbamínáʼ. Ni̱ʼkha̱nú mbá ga̱ʼkhu̱ náa ikhúún rí asndu xóo mbá tsuwanʼ nifraʼa náa xuyuʼ,+ mbáa ángel ndrígóo Gixa̱a̱* naxnúu má xúʼko̱ inuʼ mu xánimbamínáʼ wéñuuʼ.
8 Nitakáñuu ajtsú nuthu Tátá mu maríya̱a̱ʼ tsuwanʼ.
9 Mú ikhaa niʼthúnʼ: “Rí májánʼ wéñuuʼ a̱jkiu̱nʼ maski ajndu rakáʼyaaʼ* rígá má xúgíʼ náa ikháán, numuu rí tsiaki̱i̱ ndrígóʼ nakujmaa káxi̱ índo̱ guabáánʼ”.+ Ikha jngóo asndu nadxuʼ rí manimbamínáʼ náa rí guabúnʼ mu xúʼko̱ tsiaki̱i̱ ndrígóo Cristo marigá má xúʼko̱ náa ikhúún xóo mbá guʼwá xtíin.
10 Ikha jngóo nadxuʼ rí guabúnʼ índo̱ nutha wéñúʼ, índo̱ na̱nguá gúʼdoo rí ndayóʼ, índo̱ nuxkoʼ, índo̱ nagúʼdoo gamiéjunʼ ga̱jma̱a̱ numuu Cristo numuu rí índo̱ guabúnʼ ikhú gúʼdoo tsiaki̱i̱.+
11 Ninindxu̱ʼ xa̱bu̱ skágunʼ numuu dí ikháanʼ nitsudúúnʼla, ikháanʼ ndiyóoʼ mu̱tha̱ rí májánʼ ga̱jma̱a̱ numuʼ, numuu dí ikhúún nisngajmá rí na̱nguá ni̱ndxu̱ʼ chíʼgiúnʼ náa apóstoles ndrígiala bi̱ najmañún maski ajndu nda̱a̱ rí ni̱ndxu̱ʼ.+
12 Ikhúún nisngajmála rí ni̱ndxu̱ʼ apóstol+ índo̱ ni̱ni̱ milagros dí itháan mba̱ʼu̱ ga̱jma̱a̱ rí niʼngo̱o̱ a̱jkiu̱nʼ.+
13 Ikha jngóo, xú káʼnii lá kujmaa rí ikháanʼ na̱nguá kuaʼdáá numala náa eʼwíinʼ bi̱ nagimbíin rá. Lá ga̱jma̱a̱ numuu rí na̱nguá ninigajmála ráʼ.+ Gu̱ni̱ mba̱a̱ a̱jkia̱la á mu ni̱ni̱ gawánla ga̱jma̱a̱ numuu rúʼko̱.
14 Gu̱ya̱a̱, rígi̱ rí maʼni ajtsú aʼphu̱ rí xtáá xawii mu maʼgá gáyala. Mú xáni gajmála numuu rí na̱nguá xtáá raʼyáʼ rí kuaʼdáá,+ ndaʼñáanʼ ikháanʼla. Raʼkháa rí e̱ji̱n+ gúyejxi̱i̱ mu muxnúún anu̱ún, numuu rí anu̱ún nuyejxi̱i̱ mu muxnún e̱jñu̱ún.
15 Ikha jngóo asndu maʼdxuʼ rí majmuʼ xúgíʼ dí gúʼdoo ma̱ngaa rí ma̱ni̱ asndu xó má eʼngoʼ mu mambáyala.+ Á mu ikhúún nandoʼ ka̱ya̱la wéñuuʼ, lá xáʼyóoʼ maʼndala ku̱yo̱ʼ xó má ikhúún eyoʼ kaya̱la ráʼ.
16 Tséʼniuu má xú káʼnii, ikháanʼ ndu̱ya̱a̱ májánʼ rí táni gajmála.+ Mú ikháanʼla nuta̱la rí “nijmañuʼ” xóo ma̱ni̱ nduwáanʼla “ga̱jma̱a̱ tsáʼkhá”.
17 Lá naku̱ma̱la rí ni̱ni̱ nduwáanʼla índo̱ nikuʼmíin tikhuun náa ikháanʼla ráʼ.
18 Nitakáñiixu Tito rí maʼga gáʼyala, nikuʼnguáanʼ i̱mba̱a̱ ndxájulú mu maʼga ga̱jma̱a̱. Lá niʼni nduwáanʼla Tito ráʼ.+ Lá raʼkháa mbóó rí endxaʼwamíjna̱xu ráʼ. Lá raʼkháa mbóó xóo e̱nixu̱ ráʼ.
19 Lá nakumala rí ikháanʼxu kuwáanʼ ru̱tala rígi̱ mu mumbáyumíjnáxu ráʼ. Náa Dios kuwáanʼxu ru̱tha̱ xóo xa̱bi̱i̱ Cristo. Maski ajndu xúʼko̱ a̱ngui̱nʼ bi̱ nandoʼ ka̱ñu̱u̱n, xúgíʼ rí nu̱nixu̱ nindxu̱u̱ mu maʼni gújkhúʼ fe ndrígala.
20 Numuu rí namíñúʼ rí índo̱ gáʼgá xáxkamáanʼ xó má nanigu̱ʼ ikhúún ga̱jma̱a̱ ikháanʼ xúyoʼ xó má ikháanʼ nandala, maxkamáanʼla rí nagiʼdala, naxíguala kuyamíjna̱, nu̱ni̱ wajimíjnála, nu̱ni̱ xtujtaa, nuta̱númamijnála, nusngajmá rí nu̱ni̱ mba̱ʼu̱mijnala ga̱jma̱a̱ nu̱ni̱ rí marigá xkujndu.
21 Índo̱ gáʼgá mbu̱júu̱ mbáa Dios ndrígóʼ maʼni májtiuunʼ náa inala ikháanʼ ga̱jma̱a̱ ikhúún mambi̱ya̱ʼ wéñuuʼ ga̱jma̱a̱ numala mbaʼáanʼ rí ikháanʼ, aʼkhá rí ni̱ni̱ nákha ginii ga̱jma̱a̱ tátanga̱a̱ a̱jkia̱la rí nibala xkawiʼ kayuuʼ gajmiála eʼwíinʼ* ga̱jma̱a̱ rí ni̱ni̱ xúgíʼ enii rí xkawiʼ.*
