1, 2. I sai-sai nakoạ hapị i Yehuwa?

I KAU mapulu mědal᷊ahapị dingangi sai? Tantu ringangu taumata nẹ̌tatahino si kau. I sie masau dumal᷊eng dingangu, masatia si kau, kụ kakanoạ dingangu sipate ikẹ̌kapulunu.

² Mawu Yehuwa měmẹ̌mile i sai botonge makoạ hapị’E. Contone, Abraham nakoạ hapị i Yehuwa. (Yesaya 41:8; Yakobus 2:23) Yehuwa lai mapulu mědal᷊ahapị dingangi Daud. I Sie naul᷊ị Daud kai, ’taumata mětẹ̌tatahino su naung’E’. (Munara’m Manga Rarolohang 13:22) Kụ Yehuwa lai ”kụkěndag’i” nabi Daniel.​—Daniel 9:23.

3. Kawe nụe i Abraham, Daud, dingangi Daniel nakoạ hapị i Yehuwa?

³ Kerea i Abraham, Daud, dingangi Daniel nakoạ hapị i Yehuwa? Yehuwa naul᷊ị si Abraham, ”I kau seng timuhụ laoro-Ku.” (Pěndariadi 22:18) Mawu Yehuwa mapulu mědal᷊ahapị dingangu taumata matuhụ si Sie. Sěmbaụ bangsa lai botonge makoạ hapị i Yehuwa. I Sie naul᷊ị su tau Israel, ’Daringihẹ̌ si Siạ, kụ Iạ e makoạ Duatang [kamene], ringangu [i kamene] makoạ umatẹ̌-Ku.’ (Yeremia 7:23) Hakị u ene, i kau harusẹ̌ tumuhụ  parentang i Yehuwa mạeng kahěngang-hěngang mapulu makoạ hapị’E.

4, 5. Kerea Yehuwa měndiagạ manga hapị’E?

⁴ Alkitapẹ̌ naul᷊ị Yehuwa mědẹ̌deạ tempo ”waugu měngonggọu katoghas’E waugu taumata apan satia si Sie”. (2 Kararatuang 16:9) Su Mazmurẹ̌ 32:8, Yehuwa nẹ̌diandi su manga hapị’E, ”Iạ e sarung měnodeu ral᷊eng kụ hinon dal᷊engangu, i kau e sarung Takụ ahakeng dingangu Takụ sasaěng.”

⁵ Piạ sědụ matoghasẹ̌, kụ i sie madiri i kitẹ mědal᷊ahapị dingangu Mawu. Katewe, Mawu Yehuwa mapulu měndiagạ si kitẹ. (Basa Mazmurẹ̌ 55:23.) Ual᷊ingu i kitẹ kai hapị i Yehuwa, i kitẹ měkoạ kapulu-Ne dingangu kaguwạu naung. I kitẹ tatapẹ̌ masatia si Sie maning piạ lawọ sasal᷊ukạ. Hakị u ene i kitẹ sarung piạ pěndang mẹ̌sul᷊ungi pemazmur. I sie naul᷊ị, ”[Yehuwa] ene su sěndihangku, tangu iạ e taghumingge arau tawe matakụ.” (Mazmurẹ̌ 16:8; 63:8) Kerea Setang měnahaghe si kitẹ tadeạu tawe makoạ hapị i Yehuwa?

6. Kerea Setang něnoke taumata?

⁶ Su Pasalẹ̌ 11 i kitẹ seng něngěndung Setang limawang si Yehuwa kụ i sie naul᷊ị Yehuwa ene makonti dingangu tawẹ adile, ual᷊ingu tawe němala si Adam dingangi Hawa měmutusẹ̌ hala sude nihino  dingangu nẹ̌sal᷊a. Su bukẹ̌ Ayub niwěke Setang lai něnoke taumata apang mapulu makoạ hapị u Mawu. Setang naul᷊ị, taumata tumuhụ su Mawu ual᷊ingu mapulu makaěbạ al᷊amatẹ̌ bal᷊inẹ ual᷊ingu makěndagẹ̌ su Mawu. Setang lai naul᷊ị i sie botonge makakoạ kěbị taumata tawe tumuhụ su Mawu. Mahịe i kitẹ měngěndung apa nariadi si Ayub kụ kerea Mawu Yehuwa něndiagạ si sie.

7, 8. (a) Apa niul᷊ị i Yehuwa soal i Ayub? (b) Apa niul᷊ị u Setang soal i Ayub?

⁷ I sai Ayub? I sie sěngkatau esẹ mapia kụ měbẹ̌biahẹ̌ ěndịu 3.600 su taunge tamai. Yehuwa naul᷊ị su tempo ene tawẹ apa taumata kere i Ayub su dunia. Ayub měngẹ̌ngadatẹ̌ su Mawu, dingangu mawěnsing barang dal᷊akị. (Ayub 1:8) Ayub kai kahěngang-hěngang hapị i Yehuwa

⁸ Setang něnoke i Ayub tụtuhụ su Mawu ual᷊ingu piạ untunge si sie. Setang naul᷊ị si Yehuwa, ”I sie ringangu patikụ darotonge sěntiniạ lẹ̌ěllungangu. Hal᷊ẹ̌ e lẹ̌al᷊amatengu ringangu i sie gẹ̌gělirangu binatang mal᷊awọ botonge mẹ̌tiudẹ̌ su kasěllahu wanua. Arawe andene kal᷊awọu kakakalạ e ene al᷊akengu, ute nal᷊ahẹu i sie kai apidu měngane si Kau!”​—Ayub 1:10, 11.

9. Yehuwa něgělị tempo su Setang gunang měkoạ apa?

⁹ Setang něnoke i Ayub někoạ kapulung Yehuwa tadeạu makaěbạ al᷊amatẹ̌. Setang lai naul᷊ị i sie botonge makakoạ si Ayub tawe tumuhụ si Yehuwa. Tiněnang Yehuwa nẹ̌tatěntang dingangu  tiněnang Setang, katewe Yehuwa něgělị tempo su Setang gunang měnal᷊ukạ si Ayub, ini sarung makal᷊ahẹ apa i Ayub tụtuhụ si Yehuwa ual᷊ingu kụkěndagẹ̌ si Sie arau tala.

10. Kerea Setang něnal᷊ukạ si Ayub, kụ apa nikoạ i Ayub?

¹⁰ Humotong, kěbị manga binatang i Ayub nitako arau niwinasang Setang. Bọu ene Setang němate lawọ ělangi Ayub. Ayub kinailangengu kěbị arětạ e. Pěngěnsuenge Setang němate mapul᷊ong katau anạ i Ayub. Katewe, Ayub tatapẹ̌ masatia si Yehuwa. ”Kụ manilaing i Ayub nihombangengu kal᷊awọu silakạ ene, kai i sie tawe nẹ̌koạ dosa ringangu tawe napẹ̌sal᷊ang Mawu Ruata.”​—Ayub 1:12-19, 22.

11. (a) Apa saụ nikoạ u Setang si Ayub? (b) Kerea i Ayub timatěngo sasal᷊ukạ ene?

¹¹ Setang tawe něngědo. I sie něnal᷊ukạ su Mawu, kụ naul᷊ị, ”Manga andene wadange kawe tědụkangu e, ute nal᷊ahẹ u i sie apidu měngane si Kau!” Hakị u ene, Setang naparěntang sakị makạtatakụ si Ayub. (Ayub 2:5, 7) Katewe, i Ayub tatapẹ̌ masatia si Yehuwa. I sie naul᷊ị, ”Saral᷊aing mate e iạ mang mẹ̌tahutěndạ u iạ e tawẹ turạ e.”​—Ayub 27:5.

12. Kerea i Ayub něnodẹ Setang kai kontiang?

¹² Ayub běgawue Setang něnoke si sie arau kawe nụe i sie nasigěsạ. Su pěndangi Ayub, Yehuwa nakakoạ si sie nasigěsạ. (Ayub 6:4; 16:11-14)  Maning kerene, Ayub tatapẹ̌ masatia si Yehuwa. Hakị u ene nal᷊ahẹ i Ayub tawe mědeạ untung gunang watangenge hala. I sie nakoạ hapị u Mawu ual᷊ingu i sie makěndagẹ̌ su Mawu. Kěbị bawerang Setang ene kai konti!

13. Apa nikaěbạ i Ayub ual᷊ingu i sie masatia?

¹³ Maning i Ayub běga apa nariadi su sorga, i sie tatapẹ̌ masatia su Mawu dingangu něnodẹ Setang ene matingkaị. Ual᷊ingu i Ayub masatia, Yehuwa něngal᷊amatẹ̌ si sie.​—Ayub 42:12-17.

14, 15. Setang něnoke apa su kěbị taumata?

¹⁴ I kau botonge měngěndung bọu apa nariadi si Ayub. Orasẹ̌ ini, Setang něnoke i kitẹ měkẹ̌koạ kapulung Yehuwa tadeạu makaěbạ al᷊amatẹ̌. Su Ayub 2:4, Setang naul᷊ị, ”Taumata e mal᷊uasẹ̌ měnarakangu kal᷊awọu aretạ e asal᷊u i sie měngkate těbe wiahẹ̌.” Hakị u ene, Setang bal᷊inẹ kětạeng něnoke si Ayub. Setang lai něnoke kěbị taumata měkẹ̌koạ kapulung Yehuwa ual᷊ingu piạ untunge si sire. Hasụe su taunge bọu papateng i Ayub, Setang tatapẹ̌ mělẹ̌hinakang si Yehuwa dingangu měnẹ̌noke manga ělang’E. Contone, su Baweran Salomo 27:11 niul᷊ị, ”Anạku, i kau e pakapelesa wue, tadeạu iạ e mal᷊uasẹ̌ dingangu wotongewe makasimbang mạengu heghesang [arau, hinakaneng].”

¹⁵ I kau botonge měmile tumuhụ si Yehuwa  dingangu makoạ hapị’E masatia tadeạu makatodẹ Setang ene kai kontiang. Mạeng i kau měmal᷊ui kakanoạ tadeạu makoạ hapị u Mawu, ene kai putusang kapaelange! Setang naul᷊ị i kau tawe masatia si Yehuwa mạeng piạ kasasigěsạ. Setang něpakẹ haghing cara tadeạu i kitẹ tawe masatia su Mawu. Kerea carane?

16. (a) Apa cara nipakẹ u Setang tadeạu i kitẹ tawe makoạ hapị i Yehuwa? (b) Ěndịu apa nikoạ u Setang tadeạu i kau měngědo měkoạ kapulung Yehuwa?

¹⁶ Setang ”kai mẹ̌sul᷊ungu singa mědẹ̌daral᷊eng tamai ramahi kạpẹ̌munggal᷊ọe mẹ̌dẹ̌deạ měnsang i saị e ikakinạe”. (1 Petrus 5:8) Hakị u ene, abe kahěkosẹ̌ mạeng hapị, keluarga, arau taumata wal᷊inẹ mẹ̌sěding si kau měngěndung Alkitapẹ̌ dingangu měkoạ barang nihino. I kau tantu nakapěndang sẹ̌sal᷊ukateng. * (Yohanes 15:19, 20) Setang lai nẹ̌těngkakoạ kere ”malaekatu tualagẹ̌”. Hakị u ene i sie měngẹ̌ngakal᷊ẹ̌ taumata tadeạu tawe tumuhụ si Yehuwa. (2 Korintus 11:14) Cara wal᷊inẹ lai nipakẹ u Setang ute měkoạ tadeạu i kitẹ mẹ̌pěndang i kitẹ kai taumata marosa, kụ tawe makal᷊uasẹ̌ naungu Mawu.​—Baweran Salomo 24:10.

17. Kawe nụe i kitẹ matuhụ si Yehuwa?

¹⁷ Su tempong i kitẹ tụtuhụ si Yehuwa, i kitẹ něnodẹ Setang kontiang. Apa makatul᷊ung si kitẹ tadeạu matuhụ si Yehuwa? Alkitapẹ̌ naul᷊ị, ”I kau harusẹ̌ kuměndagẹ̌ si Yehuwa, Mawunu, dingangu kaguwạu naungu dingangu pěbawiahu, dingangu kaguwạu toghasu.” (Pangangonggọ u Toratẹ̌ Kapia 6:5, Terjemahan Dunia Baru) I kitẹ matuhụ si Yehuwa ual᷊ingu i kitẹ makěndagẹ̌ si Sie. Su tempong kakěndagi kitẹ si Yehuwa kakạtoghase, i kitẹ sarung měkoạ kěbị apang dẹ̌dorongang i Yehuwa si kitẹ. Rasul Yohanes němohẹ, ”Kuměndagu Ruata e mangal᷊ene tụtuhụ kal᷊awọu titan’E.  Dingangu manga titan’E mahaěng bue si kite.”​—1 Yohanes 5:3.

18, 19. (a) Apa piram baụ hal᷊ẹ̌ ikẹ̌kawěnsingang i Yehuwa? (b) Kerea i kitẹ masingkạ Yehuwa tawe mẹ̌dorong si kitẹ měkoạ apa tawe ikakoạ i kitẹ?

¹⁸ Apa piram baụ hal᷊ẹ̌ ikẹ̌kawěnsingang i Yehuwa? Piram baụ contone kạbawohẹ su kotak ” Mawěnsing Apa Ikẹ̌kawěnsingang i Yehuwa”. Humotong, ěndịu i kau mẹ̌pěndang piram baụ hal᷊ẹ̌ ene tawe nẹ̌sal᷊a. Katewe su tempong nẹ̌basa Alkitapẹ̌ dingangu nẹ̌tiněna soal u hal᷊ẹ̌ ene, i kau buhudeng nakaěna apa gunane tumuhụ hukung i Yehuwa. Ěndịu i kau mẹ̌pěndang harusẹ̌ měkoạ pẹ̌bawal᷊ui. Maning tawe gampang, katewe mạeng turusẹ̌ mẹ̌bal᷊ui, i kau sarung makapěndang  karal᷊uasẹ̌ ual᷊ingu nakoạ hapị masatia bọu Mawu. (Yesaya 48:17, 18) Kerea i kitẹ makasingkạ i kitẹ botonge mẹ̌bal᷊ui?

¹⁹ Yehuwa tawe mẹ̌dorong si kitẹ měkoạ apa tawe ikakoạ i kitẹ. (Pangangonggọ u Toratẹ̌ Kapia 30:11-14) Ual᷊ingu Yehuwa kai Hapị mapia, i Sie limembong masingkạ apa kapaelange gunang i kitẹ. I Sie masingkạ toghasẹ̌ dingangu kurang i kitẹ. (Mazmurẹ̌ 103:14) Rasul Paulus naul᷊ị, ”Kai arawe Mawu Ruata e mang satia su kědon’E. I Sie ta mapakawalang kamene e sal᷊ukateng limembo wọu kuat’i kamene. Su tempong i kamene kaěbakengu wawitaugẹ̌ e, i Sie sarungbe mangonggọu ral᷊enge si kamene, tadeạu i kamene matoghasẹ̌ kụ makakẹ̌dang mẹ̌tatahangu sasal᷊ukạ e.” (1 Korintus 10:13) I kitẹ mangimang Yehuwa sarung měnoghasẹ̌ si kitẹ gunang měkoạ barang nihino. I Sie měgělị ”kawasa” tadeạu tatapẹ̌ masatia maning piạ sasal᷊ukạ. (2 Korintus 4:7) Su tempong nakapěndang tul᷊umang bọu i Yehuwa, Paulus nẹ̌bera, ”Ual᷊ingkeng kawasa kụ seng nighěllị i Kristus si siạ, ute iạ e matoghasẹ̌ tumatěngo haghim patikụ.”​—Filipi 4:13.

20. Sipatẹ̌ kerea harusẹ̌ těnoěngu?

²⁰ Mạeng i kitẹ mapulu makoạ hapị i Yehuwa, i kitẹ bal᷊inẹ kětạeng mawěnsing su apa ikẹ̌kawěnsingang i Yehuwa. (Roma 12:9) Hapị u Mawu lai  harusẹ̌ kuměndagẹ̌ apa ikẹ̌kěndagu Mawu. Ene nilahẹ su Mazmurẹ̌ 15:1-5. (Basa.) Hapị i Yehuwa mẹ̌těno sipat’E dingangu ”měkẹ̌kakěndagẹ̌, mẹ̌daral᷊uasẹ̌, maghaghighilẹ̌, makakẹ̌dang, dingangu mawawudi, maral᷊ahimumu sěmbaụ su wal᷊ine, masatia, naung i sire masasanạ dingangu měngkai mětẹ̌těngkaudupu watangeng”.​—Galatia 5:22, 23.

21. Kerea i kau botonge měnodẹ sipatẹ̌ ikẹ̌kapulung Mawu?

²¹ Kerea i kau botonge měnodẹ manga sipatẹ̌ ene? I kau botonge makasingkạ hal᷊ẹ̌ apa kẹ̌kěndagengi Yehuwa mạeng marading mẹ̌basa dingangu měngěndung Alkitapẹ̌. (Yesaya 30:20, 21) Su tempong měkoạ ene, kakěndagu si Yehuwa sarung matoghasẹ̌, kụ ene makakoạ si kau mapulu tumuhụ parenta-Ne.

22. Apa gunane mạeng i kau matuhụ si Yehuwa?

²² Pẹ̌bawal᷊ui seng nikoạu ene mẹ̌sul᷊ungu měluạ lakụ těbe bọu ene měluhe lakụ buhu. Alkitapẹ̌ něngoro, ’pẹ̌bawiahẹ̌ těbe ringangu patikụ kakakoạ e demẹko’ kụ pakẹ e ”pẹ̌bawiahẹ̌ arau sipatẹ̌ buhu”. (Kolose 3:9, 10) Maning tawe gampang měkoạ ene, katewe su tempong i kitẹ mẹ̌bal᷊ui dingangu tumuhụ si Yehuwa, i Sie nẹ̌diandi sarung měgělị si kitẹ ”tatendenge arau al᷊amatẹ̌ masaria”. (Mazmurẹ̌ 19:12) Pakatuhụ e si Yehuwa dingangu todẹko Setang ene kai kontiang. Pẹ̌tahamawụe si Yehuwa, bal᷊inẹ ual᷊ingu piạ al᷊amatẹ̌ su tempo mahi, katewe ual᷊ingu i kitẹ makěndagẹ̌ si Sie. I kau sarung makoạ hapị u Mawu!