Lengolo le Eang ho Bagalata 6:1-18
6 Bana beso, haeba motho a etsa ntho e fosahetseng a sa hlokomele, lona Bakreste ba tšoanelehang ba tataisoang ke moea o halalelang le leke ho thusa motho eo ka bonolo.+ Empa le lona le itlhokomele+ hore le se ke la lekeha ho etsa liphoso.+
2 Tsoelang pele ho thusana* ha le e-na le mathata+ hobane ha le etsa joalo, le tla be le mamela molao oa Kreste.+
3 Haeba motho a inka e le oa bohlokoa ho feta batho ba bang empa ho se joalo,+ oa ithetsa.
4 Motho e mong le e mong a ke a khotsofalle lintho tseo a khonang ho li etsa+ kaha o tla thabela seo a se entseng a sa ipapise le motho e mong.+
5 Motho e mong le e mong o tla ikarabella ka lintho tseo a li etsang.*+
6 Motho ea rutoang Lentsoe la Molimo le motho ea mo rutang ba lokela ho arolelana lintho tseo ba nang le tsona.+
7 Le se ke la ithetsa hobane ha ho na motho ea ka thetsang* Molimo. Motho e mong le e mong o tla kotula seo a se jetseng.+
8 Motho ea latelang litakatso tsa hae tse mpe o tla shoa* empa motho ea tataisoang ke moea o halalelang o tla fumana bophelo bo sa feleng.+
9 A re se keng ra khathala ho etsa lintho tse ntle hobane re tla fumana moputso* haeba re sa khathale.+
10 Ka lebaka leo, a re thuseng batho bohle ha re sa na le monyetla empa haholo-holo a re thuseng balumeli-’moho le rona.
11 Ke le ngolletse lengolo lena ka letsoho la ka ’me ke ngotse ka mongolo o motenya.
12 Batho bohle ba batlang ho khahlisa batho ba bang* ke bona ba lekang ho le qobella hore le bolle, ba etsa joalo e le hore ba se ke ba hlorisoa ka lebaka la Kreste.*
13 Le bona batho ba bolotseng ha ba mamele Molao+ empa ba batla hore le bolle e le hore ba tle ba ithorise ka lona.
14 Le ka mohla nke ke ka ithorisa empa ke tla ithorisa feela ka Morena Jesu Kreste ea shoetseng palong.*+ Ke nka lefatše le ahloletsoe lefu ka lebaka la hae ’me lefatše lona le nka ’na ke ahloletsoe lefu ka lebaka la hae.
15 Taba ea hore motho o bolotse kapa ha a bolla ha se ea bohlokoa+ empa ntho ea bohlokoa ke hore Molimo o etsa hore motho a be mocha.+
16 E se eka Iseraele ea Molimo e leng batho bohle ba mamelang molao ona ba ka ba le khotso ’me Molimo a ba hauhele.+
17 Ho tloha hona joale, ho se ke ha e-ba le motho ea ntšoenyang hobane ’mele oa ka o na le mabali a bontšang hore ke molateli oa Jesu.+
18 Bana beso, e se eka Morena Jesu Kreste a ka ba mosa* ho lona ka lebaka la makhabane ao le a bontšang. Amen.
Linaletsana
^ Kapa: “ho jarelana meroalo.”
^ Kapa: “Motho e mong le e mong o tla jara mojaro oa hae.”
^ Ka Segerike: “somang.”
^ Ka Segerike: “bola.”
^ Kapa: “kotula.”
^ Kapa: “ba iketsang eka ba lokile.”
^ Kapa: “ka lebaka la palo eo Kreste a ileng a hlokofaletsoa ho eona.” Sheba Tlhaloso.
^ Kapa: “palong eo batho ba hlokofaletsoang ho eona.” Sheba Tlhaloso ea Palo.
