1. Faamatala faalogona na oo iā Mareta ma le māfuaaga.

NA FAIGATĀ iā Mareta ona talitonu ua maliu si ona tuagane pele o Lasalo. E tū mai pea i ona luma le ana o loo teu ai o ia, o loo ufiufi le gutu i se maa. Ua avea lona faanoanoa e pei o se avega mamafatū. Ua fā aso talu ona maliu Lasalo, ae ua soloatoa aso iā Mareta ona e lē gata i lona mafatia, ae ona o le pisi i le toʻatele o ē alolofa na asiasi mai.

2, 3. (a) O ā lagona o Mareta ina ua ia vaaia Iesu? (e) Ina ua faia e Mareta se tala e sili ona tāua, o le ā ua tatou iloa e faatatau iā te ia?

² A o lenei ua taunuu lē e sili ona pele iā Lasalo. Ina ua iloa atu e Mareta Iesu ua atili ai lona faavauvau, auā e na o ia lava sa ono mafai ona laveaʻiina lona tuagane. E ui i lea, na faamāfanafanaina Mareta ona ua oo atu Iesu i si o latou tamaʻi aai o Petania. Na faamāfanafanaina atili foʻi i le vaaia o fofoga agaalofa o Iesu, ma faalaeiauina ai i ona uiga agalelei. Na fai atu e Iesu ni fesili e fesoasoani ai iā Mareta, ia taulaʻi atu ona manatu i le toetū. O lea, na faia ai e Mareta se tala e sili ona tāua: “Ua ou talitonu o oe o le Keriso, o le Alo o le Atua, o Lē ua maliu mai i le lalolagi.”—Ioa. 11:27.

³ O lenā faaupuga e faailoa mai ai, o Mareta o se tagata e malosi lona faatuatua. E lē tele ni faamatalaga i le Tusi Paia e uiga iā te ia, ae e tele lesona tāua e tatou te aʻoaʻoina ai ina ia faamalosia ai lo tatou faatuatua. O lea, seʻi o tatou toe tepa i le amataga o le masaniga a Mareta ma Iesu.

4. Aiseā e ese ai le aiga o Mareta, ma na faapeʻī la latou faiā ma Iesu?

⁴ I ni nai masina muamua atu, o loo malosi ma fiafia Lasalo, ma ua lata ina asia lo latou aiga e Iesu Keriso, o se tagata e sili ona tāua. E ese le aiga o Mareta, ona o i latou ma Maria ma Lasalo o ni tagata matutua, ae o loo nonofo faatasi  i se fale e tasi. E manatu nisi tagata suʻesuʻe, e ulumatua Mareta ona o ia e taliina malo, ma i nisi taimi e muamua ona taʻua lona igoa. (Ioa. 11:5) E lē o iloa pe na faaipoipo se isi o i latou, ae na māfana uma iā Iesu. Sa faamautū Iesu i lo latou aiga pe a talaʻi i Iutaia, le nuu sa tetee i lana galuega. E mautinoa lona talisapaia o le lagolagosua ma le filemu o lo latou aiga.

5, 6. (a) Aiseā na matuā pisi ai Mareta i le taimi na asiasi atu ai Iesu? (e) O le ā na faia e Maria ina ua taunuu Iesu?

⁵ E tele galuega a Mareta na faia auā le tausiga o malo. E foliga mai e tele ina pisi o ia ona o sē e toʻaga, ma na faapena foʻi ina ua asiasi atu Iesu. Sa ia fuafuaina se ʻaiga faapitoa mo lana malo aloaʻia, ma atonu foʻi ma nisi na latou malaga faatasi atu. Sa tāua tele le talimālō i na taimi. E taunuu loa se mālō, ona faafeiloaʻi lea o ia i le sogi i ai, tatala ese ona seevae ma mulumulu ona vae, ma uu lona ulu i se uu manogi, ma faamautinoa ua lelei se moega ma lava mea taumafa.—Faitau le Luka 7:44-47.

⁶ E mautinoa na tele galuega a Mareta ma Maria. O Maria e iai le uiga e mafaufau loloto, ma e mautinoa na fesoasoani o ia iā Mareta i le amataga. Ae na taunuu loa Iesu, lē toe ano loa i ni feʻau, ona sa faaaogā e Iesu le avanoa e aʻoaʻo atu ai. E ese Iesu mai i taʻitaʻi lotu o lenā taimi, ona e āva o ia i fafine ma fiafia e aʻoaʻo i latou i le Malo o le Atua, le autū o lana faiva. Na fiafia lava i ai Maria ma saofaʻi loa i luma o Iesu ma uaʻi totoʻa atu iā te ia.

7, 8. Aiseā na lē lava ai le onosaʻi o Mareta, ma o le ā le auala na ia faaalia ai lona lē malie?

⁷ Peitaʻi, e lē faigatā ona iloa atu, ua amata ona lē fiafia Mareta. Ua popole o ia, ona e leʻi faia le tele o kuka ma isi mea e tatau ona fai mo mālō. A o fai ana feʻau ma tilotilo atu i le saofaʻi lelei o lona uso ae lē fesoasoani atu, faamata o ā ni ona foliga vaaia ma uiga na faaalia? E lē taumatea na faaʻūʻū o ia, ona e lē mafai ona ia faia toʻatasi le mau feʻau.

⁸ Na iʻu ina lē lava le onosaʻi o Mareta ma fai atu loa iā Iesu: “Le Alii e, e te lē manatu mai ea, auā ua tuu mai e loʻu uso na o aʻu e faia nei mea uma? Seʻi e fai ane iā te ia e sau e fesoasoani mai iā te aʻu.” (Luka 10:40) Ioe, ua fai sina malolosi o ana upu. I nisi o faaliliuga, o loo faaupu ai lana fesili e faapea: “Le Alii e, pe e te lē o popole mai ea . . . ?” Ona  ia fai loa lea iā Iesu, e faatonu Maria e alu atu e fai a la feʻau.

9, 10. (a) O le ā le tali atu a Iesu iā Mareta? (e) E faapefea ona tatou iloa sa tāua iā Iesu taumafaiga a Mareta e saunia se taumafataga manaia mo ia?

⁹ E lē taumatea na faateʻia Mareta i le tali a Iesu, e pei foʻi o le toʻatele ua faitau ai i le Tusi Paia. Na fetalai atu Iesu i se leo mālū: “Mareta, Mareta e, ua e popole ma atuatuvale i le tele o mea. Ae e itiiti lava ni mea e manaʻomia, pe e na o le tasi foʻi. A ua filifilia e Maria le mea lelei, ma e lē aveesea mai iā te ia.” (Luka 10:41, 42) O lea, o le ā le uiga o ana fetalaiga? Po o lona uiga ea, o loo faamuamua e Mareta mea faaletino? Pe lē tāua iā Iesu taumafaiga a Mareta e saunia se taumafataga manaia mo ia?

¹⁰ E lē o lenā, auā sa silafia lelei e Iesu uiga alofa ma le lotomamā o Mareta. E lē o manatu foʻi o ia, e leaga le tele o mea e tali ai mālō, ona e leʻi leva talu ona auai i se “faigaʻai tele” sa faia e Mataio mo ia. (Luka 5:29) E lē o le taumafataga o loo saunia e Mareta le faafitauli, ae o mea o loo ia faatāuaina. O lona pupū tele e fai se taumafataga tele, na galo ai iā te ia le mea e sili ona tāua. O le ā lea mea?

11, 12. Na faaalia faapefea e Iesu le agalelei i le auala na ia faasaʻo ai Mareta?

¹¹ Ua afio mai Iesu, le Alo e toʻatasi o Ieova le Atua, i le fale o Mareta e aʻoaʻo atu le upu moni. E sili atu ona tāua lenā mea i lo o se taumafataga manaia. E mautinoa le faanoanoa o Iesu ona o le a misia e Mareta le avanoa faa-auro e faamalosia ai lona faatuatua, ae na tuu pea o ia e fai lana filifiliga. * Peitaʻi, e lē tatau ona faalavelave atu o ia iā Maria, neʻi misia ai foʻi e ia lenei avanoa.

¹² O lea, na faaalia e Iesu le agalelei i le auala na faasaʻo ai Mareta, i le taʻua faalua o lona igoa ina ia toʻa ai o ia, ma fai atu e aua le “popole ma atuatuvale i le tele o mea.” Ua lava se kuka se tasi pe lua, ona e sili atu meaʻai faaleagaga. E lē o  finagalo Iesu e aveesea “le mea lelei” ua filifilia e Maria, o le faalogo ma aʻoaʻo mai lea iā te ia.

13. O le ā e tatou te aʻoaʻoina mai i le auala na faasaʻo ai e Iesu Mareta?

¹³ E tele ni lesona e tatou te aʻoaʻoina mai i lenei tala. Ia aua neʻi faatagaina se mea e faalavelave mai ma iʻu ai ina galo lo tatou “naunau i mea faaleagaga.” (Mata. 5:3) E tatou te fia faataʻitaʻi iā Mareta i lona agaga talimālō ma lona toʻaga. Ae aua le avea le ʻpopole ma le atuatuvale’ i na mea, ma itu e galo ai mea e sili ona tāua. O le ʻauga o lo tatou faatasitasi ma uso talitonu, ina ia fefaalaeiauaʻi ma fetufaaʻi faaleagaga, ae lē ona o taumafa faaletino mananaia. (Faitau le Roma 1:11, 12.)  I taimi e faatasitasi ai faaleagaga ma faalaeiauina ai, ua lava sina taumafa faigofie.

14. Aiseā e tatou te mautinoa ai na faataatia e Mareta se faaaʻoaʻoga lelei o le taliaina o faasaʻoga?

¹⁴ Pe na talia e Mareta le aʻoaʻiga alofa a Iesu? Ioe, talu ai, ina ua taʻua e le aposetolo o Ioane le tala e uiga iā Lasalo, na ia faapea mai: “E alofa Iesu iā Mareta, ma lona uso, ma Lasalo.” (Ioa. 11:5) Ua mavae ni nai masina talu lenā asiasiga a Iesu i Petania. E manino mai, e leʻi teulotoina e Mareta le aʻoaʻia o ia e Iesu ae na ia talia le fautuaga. Ua ia faataatia ai foʻi se faaaʻoaʻoga lelei mo i tatou, auā o i tatou uma lava e manaʻomia faasaʻoga.

15, 16. (a) O le ā sa faia e Mareta ina ua maʻi lona tuagane? (e) Aiseā na lē taunuu ai faamoemoega o Mareta ma Maria?

¹⁵ Ina ua maʻi Lasalo, e mautinoa sa pisi Mareta i le tausiga o ia. Sa taumafai ia toe malosi si ona tuagane ma faaitiitia ona tigā. Peitaʻi, na faasolosolo ina tigāina Lasalo, ae e leʻi faavaivai ai Mareta ma Maria i le tausiga o ia. A o fai ifo le malosi o Lasalo, sa tilotilo pea i ai Mareta ma mafaufau i le tele o tausaga o la latou mafutaga, i taimi fiafia ma taimi faanoanoa.

¹⁶ E tusa ma le lua aso le savaliga le mamao o le aai sa talaʻi ai Iesu. Ina ua iloa e Mareta ma Maria e lē toe foʻi le maʻi o Lasalo i se lelei, na la auina atu loa le feʻau iā Iesu: “Le Alii e, silasila foʻi, ua maʻi lē ua e alofa faapelepele i ai.” (Ioa. 11:1, 3) E talitonu i laʻua, e alofa Iesu i lo la tuagane ma e mafai ona fesoasoani iā te ia. Pe faamata na faamoemoe i laʻua ia oo atu Iesu a o leʻi maliu Lasalo? Afai o lea, e leʻi taunuu lenā faamoemoe, auā na oti Lasalo.

17. O le ā le mea sa lē malamalama i ai Mareta, ma o le ā le gaoioiga na ia faia ina ua logotala ua toeitiiti taunuu Iesu?

¹⁷ Sa faavauvau Mareta ma Maria ona ua maliu lo la tuagane, ma sauniuni e teu o ia ma tali le mau tagata na ō atu mai Petania ma nuu tuaoi. Ae e leʻi maua lava se tala e uiga iā Iesu, ma ua lē malamalama Mareta pe aiseā ua tuai atu ai. I le fā o aso talu ona maliu Lasalo, ae logotala loa Mareta ua toeitiiti taunuu Iesu. E ui i lona faavauvau, ae na tausolomua o ia e alu e faafeiloaʻi Iesu e aunoa ma le taʻuina iā Maria.—Faitau le Ioane 11:18-20.

18, 19. O le ā le faamoemoe na talitonu i ai Mareta, ma aiseā na mataʻina ai lona faatuatua?

 ¹⁸ O le taimi lava na feiloaʻi ai Mareta iā Iesu, na sasaa atu loa i ai o la mafatiaga: “Le Alii e, ana e iai i inei, semanū e lē oti loʻu tuagane.” Ae sa tumau pea le faatuatua ma le faamoemoe o Mareta e toe faatū e Iesu lona tuagane e ala i le faapea atu: “Ua ou iloa lava, o mea uma e te talosaga atu ai i le Atua, e foaʻi mai lava e le Atua iā te oe.” Ona faalaeiau atu lea o Iesu: “O le a toetū lou tuagane.”—Ioa. 11:21-23.

¹⁹ Na manatu Mareta o loo fetalai Iesu e uiga i le toetū i le lumanaʻi. O lea na ia tali atu ai: “Ou te iloa e toetū o ia i le toetū i le aso mulimuli.” (Ioa. 11:24) Na talitonu malosi Mareta i lenā aʻoaʻoga. E leʻi talitonu nisi o taʻitaʻi lotu Iutaia e pei o le ʻau Satukaio i le aʻoaʻoga o le toetū, e ui o loo manino mai i le Tusi Paia. (Tani. 12:13; Mare. 12:18) Peitaʻi, na  iloa e Mareta na aʻoaʻo e Iesu le toetū ma na ia faatutūina foʻi nisi mai i le oti, e ui e na te leʻi faatūina mai se isi na umi se taimi o i le tuugamau, e pei o Lasalo. Ae e lē o iloa e Mareta le mea o le a faia e Iesu.

20. Faamatala le uiga o upu lē mafaagaloina a Iesu faapea le tali a Mareta o loo i le Ioane 11:25-27.

²⁰ Na fetalai atu lea o Iesu i upu e lē mafai ona faagaloina: “O aʻu o le toetū ma le ola.” Ioe, ua tuuina atu e Ieova i lona Alo le pule e toe faatutūina ai tagata i le lalolagi i le lumanaʻi. Na fesili atu Iesu iā Mareta: “Pe e te talitonu i lenei mea?” Na tali Mareta i upu o loo taʻua i le amataga o le mataupu. Na faatuatua o ia o Iesu le Keriso po o le Mesia, o le Alo o Ieova le Atua, ma na valoia e perofeta lona afio mai i le lalolagi.—Ioa. 5:28, 29; faitau le Ioane 11:25-27.

21, 22. (a) Na faaalia faapefea e Iesu lona faanoanoa? (e) Faamatala mai mea na tutupu i le taimi na toetū ai Lasalo.

²¹ Pe e tāua iā Ieova le Atua ma lona Alo o Iesu Keriso se faatuatua e pei ona iai iā Mareta? E maua se tali manino mai i mea o le a tutupu. Na nanati atu loa Mareta e saʻili mai lona uso, ma na ia vaaia le faanoanoa o Iesu a o talanoa iā Maria ma isi na ō atu. Na ia iloa atu le tagi o Iesu ona o lona tigā alofa, ma lagona atu foʻi le faatonuga a Iesu e fuli ese le maa o loo pupuni ai le tuugamau o lona tuagane.—Ioa. 11:28-39.

²² Na faamanatu atu e Mareta, atonu ua manogi le tino o Lasalo ona ua fā aso talu ona maliu. Ae na fetalai atu Iesu: “Po ou te leʻi fai atu ea iā te oe, afai e te talitonu, e te vaai i le mamalu o le Atua?” Na talitonu Mareta, ma na ia molimauina le mamalu o Ieova le Atua. O le taimi lava lea na tuuina atu ai e le Atua le mana i lona Alo e toe faatū Lasalo mai i le oti! E mautinoa e leʻi faagaloina e Mareta nei mea ofoofogia seʻia oo i lona maliu, aemaise le valaau atu o Iesu i se leo malosi, “Lasalo e, inā sau ia i fafo!” Na lagona atu le gasēsē mai i totonu o le tuugamau a o taumafai Lasalo e tū aʻe i luga, o loo saisai pea o ia i ʻie. Na faalatalata atu Iesu i le gutu o le tuugamau, ma fetalai atu, “ia tatala o ia ma tuu atu e alu,” na tamomoʻe atu loa Mareta ma Maria ma fusi mai lo la tuagane. (Faitau le Ioane 11:40-44.) Na vave ona mou atu le faanoanoa o Mareta!

23. O le ā le naunautaʻiga o Ieova ma Iesu mo oe, ma o le ā e tatau ona e faia?

²³ Ua faaalia i lenei tala, e taunuu moni lava le toetū, ma  o se aʻoaʻoga e faamāfanafanaina ai mai i le Tusi Paia, ma ua faamaonia i mea na tutupu anamua. (Iopu 14:14, 15) E naunau Ieova ma lona Alo e tauia tagata faatuatua, e pei o Mareta, Maria, ma Lasalo. O le a e maua foʻi se taui matagofie pe a e atiaʻe se faatuatua malosi.

24. O le ā le taimi mulimuli na toe taʻua ai Mareta i le Tusi Paia?

²⁴ E faatasi ona toe taʻua Mareta i le Tusi Paia, i le amataga o le vaiaso mulimuli o Iesu i le lalolagi. Na silafia lelei e Iesu faigatā o i luma, ma na filifili ai e toe faamautū i Petania ona e maua ai lona filemu. E na o le lua maila (3 km) le mamao mai i Ierusalema. Sa tausasami Iesu ma Lasalo i le fale o Simona le lepela, ma o le taimi mulimuli lea ua toe taʻua ai Mareta, a o “tautua” ai i inā.—Ioa. 12:2.

25. Aiseā o se faamanuiaga ai mo faapotopotoga i aso nei le iai o ni tuafāfine e pei o Mareta?

²⁵ Maʻeu le toʻaga o lenei fafine, ona o le taimi muamua ma le taimi mulimuli na taʻua ai Mareta i le Tusi Paia, o loo galue. Ua faamanuiaina faapotopotoga Kerisiano i aso nei ona o tuafāfine e pei o Mareta, e taofimau i le upu moni ma limafoaʻi, ma faatino lo latou faatuatua e ala i le auauna atu i isi. E mautinoa na faaauau ona faia faapea e Mareta, ma na aogā lea iā te ia, auā o le a feagai ma ni mafatiaga mulimuli ane.

26. O le ā na uunaʻia Mareta e fai ona o lona faatuatua?

²⁶ E leʻi umi ae oo se maliu tigā iā Iesu lona Matai pele. E lē gata i lea, o taʻitaʻi lotu faafiaamiotonu na fasiotia Iesu, sa taumafai foʻi e fasioti Lasalo, ona sa avea le toetū o Lasalo ma mea e faamalosia ai le faatuatua o le toʻatele. (Faitau le Ioane 12:9-11.) E mautinoa foʻi, na faamutaina e le oti le mafutaga a Mareta, Maria ma Lasalo. E tatou te lē iloa pe na faapefea ona tupu lenā mea, ae e mautinoa na mafai e Mareta ona tumau seʻia oo i lona maliu ona o lona faatuatua. O le māfuaaga lenā e tatau ai i Kerisiano ona faaaʻoaʻo i le faatuatua o Mareta.