Skip to content

Skip to table of contents

 MATAUPU AUTŪ | AUALA E TE FIAFIA AI I LAU GALUEGA

Pe e Aogā le Galue Mamafa?

Pe e Aogā le Galue Mamafa?

Ua mapuea Aleki a o sii atu le isi pusa i luga o le loli a le kamupani lea e faigaluega ai. Ua fesili ifo iā te ia lava, ʻAiseā ua ou faigaluega ai pea i lenei galuega e leai se lumanaʻi e maua ai? O afea ea o le a ou taulau manuia ai? O le matuā manaia lava o loʻu olaga pe ana ou lē faigaluega!’

I le pei o Aleki, e toʻatele tagata i aso nei e lē fiafia e galulue mamafa. Ua faapea mai Arona o se inisinia: “E manatu le toʻatele o le matuā maulalo lava o o latou tulaga pe a faia galuega ʻfaatauvaa.’ E masani ona latou fai mai: ʻOu te galue i inei mo lenei taimi seʻi maua se isi aʻu galuega e sili atu.’”

Aiseā ua lē fiafia ai le toʻatele e galulue mamafa? Atonu ua taaʻina i latou i faasalalauga e faapea, a tele meafaitino ma faifailemū, o se olaga “sologa lelei” lenā. Ua faapea mai Mataio, o sē e faaleleia fale ma isi mea: “E manatu tagata o le tele e te galue mamafa ai e saʻili mea e ola ai, o le itiiti foʻi lenā o lou taulau manuia.” Ua faapea mai foʻi Shane, o sē e vaaia ma tausia le lelei o se faleaʻoga: “Ua lē toe faigaluega tagata mo se aso atoa, ina ia maua le totogi o se aso atoa.”

I le isi itu, o le toʻatele o tagata e taulau manuia e fiafia e galulue mamafa. Ua faapea mai Tanielu, e 25 tausaga ma e galue i faugāfale: “Ou te manatu e matuā tauia le galue mamafa, aemaise pe afai e tāua le māfuaaga e fai ai se galuega.” Ua faapea mai foʻi Andre e 23 tausaga: “Ou te ioe e iai le sootaga o galuega i le fiafia ma le faamalieina. O le itiiti o galuega e fai e lē o se faiga e iʻu ai i le fiafia mo se taimi umi, ae e na o le lagona ai o le fiu.”

Ua mafai faapefea i tagata e pei o Tanielu ma Andre ona atiaʻe se vaaiga saʻo e faatatau i le galue mamafa? O le tali faigofie, ona ua latou faatatauina mataupu silisili o le Tusi Paia. E lē o faapea mai le Tusi Paia e aua le galue mamafa, ae o loo fautua mai ia toʻaʻaga ma finafinau. E lē o tau ina faapea mai ia tatou galulue, ae o loo taʻua ai foʻi auala e tatou te fiafia ai i a tatou galuega.

O lē fea mataupu silisili o le Tusi Paia e mafai ona fesoasoani iā te oe, ina ia lagona ai le faamalieina i au galuega? E matou te faalaeiau oe e iloilo nisi o na mataupu silisili, ia o le a talanoaina i le mataupu o loo sosoo mai.