Pe e te talitonu i le Atua? Pe afai o lea, pe e mafai ona e faailoa mai ni faamaoniga o loo soifua o ia? O le mea moni, e tele faamaoniga o loo tatou vaaia, e iloa ai o Lē na foafoaina mea e atamai, malosi, ma e alofa. O ā na faamaoniga, ma o le ā le malosi o na faamaoniga? Ina ia maua le tali, seʻi mātau upu a le aposetolo o Paulo i lana tusi i Kerisiano i Roma.

Na faapea mai Paulo: ʻO uiga lē vaaia o le Atua, ua vaaia lava ia talu ona foafoaina le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua, o lea ua lē mautali ai i latou.’ (Roma 1:20) E pei ona taʻua e Paulo, ua tatou vaaia faamaoniga manino o Lē na foafoaina mea, e ala i galuega a ona aao. Seʻi o tatou iloilo totoʻa le uiga o upu a Paulo.

Na taʻua e Paulo, ua vaaia uiga o le Atua “talu ona foafoaina le lalolagi.” E tusa ai ma le gagana Eleni, e faasino atu le upu “lalolagi” i tagata, a ae lē o le lalolagi paneta. O lea, na uiga atu Paulo, o le taimi lava na foafoaina ai tagata, na mafai ona latou vaaia i le foafoaga faamaoniga o uiga o Lē na foafoaina mea.

O loo siʻomia i tatou i na faamaoniga. “Ua vaaia lava ia,” e lē o natia. E amata mai lava i foafoaga e sili ona tetelē seʻia oo i foafoaga e sili ona ninii, ua faaalia manino mai ai, e iai Lē na foafoaina mea ma e matagofie foʻi ona uiga. Pe e lē o faaalia le atamai o le Atua i le auala maoaʻe ma le matagofie na foafoaina ai lo tatou siʻomaga faalenatura? Ae faapefea le anoanoaʻi o fetu i le lagi faapea le fafati mai o galu, pe e lē o faaalia ai lona malosi? E tatou te maua foʻi le fiafia i le tofo o le tele o taumafa susua, faapea le vaaia o le matagofie o le oso aʻe o le lā ma goto atu. Pe e lē o faaalia ai le alofa o le Atua mo tagata?​—Salamo 104:24; Isaia 40:26.

E matuā manino faamaoniga o uiga o Lē na foafoaina mea. O lea, “ua lē mautali” ai i latou e faapea mai e latou te lē o iloaina ni faamaoniga, ma e lē o mananaʻo e talitonu i le Atua. O le faataʻitaʻiga lenei na taʻua e se tagata atamai: Seʻi faapea e lē amanaʻia e se avetaavale se faailoilo o loo tuu i le auala e faasā ai taavale ona uia. Ua taofia o ia e se leoleo ma faasala o ia. Peitaʻi, e finau atu le avetaavale e na te leʻi iloa se faailoilo. E ui i lea, e lē talitonu le leoleo i lana faamatalaga, auā e lē o iai se faalētonu i le vaai a le avetaavale. E lē gata i lea, o le tiute o le avetaavale o le vaaia lea o faailoilo ma utagia. I se tulaga talitutusa, o loo tatou vaaia faamaoniga e iloa ai e iai Lē na foafoaina mea. E lē mafai ona natia lenā “faailoga.” Na foafoaina i tatou ma le tomai e mafaufau ai. O lea, e lē mafai ona tatou faia ni faamolemolega e faapea e tatou te lē iloa lenā faailoga.

E tele mea e tatou te aʻoaʻoina e faatatau i Lē na foafoaina mea mai i galuega o le foafoaga. Peitaʻi, e sili atu mea e tatou te aʻoaʻoina e faatatau iā te ia mai le Tusi Paia. E tatou te iloa mai ai le tali i lenei fesili tāua: O le ā le fuafuaga a le Atua mo le lalolagi faapea tagata o loo nonofo ai? O le iloaina o le tali i lenā fesili, o le a fesoasoani iā te oe e mafuta vavalalata atu ai i le Atua ʻe lē vaaia ona uiga, ae ua vaaia’ i le lalolagi o loo siʻomia ai i tatou.