Fesoasoani i Ē Mafatia

“E faamanuiaina le tagata agalelei, auā ua ia tuuina atu ana meaʻai i lē ua faatauvaa.”—FAATAOTO 22:9.

Aiseā ua faamanatu ai e isi le Kerisimasi?

E mananaʻo isi e faaaʻoaʻo iā Iesu ona sa fesoasoani o ia i ē matitiva, mamaʻi, ma puapuagatia. E latou te manatu o le taimi sili e faia ai faapea, o le Kerisimasi, pe a aoina e nisi o faalapotopotoga ni foaʻi.

Aiseā ua avea ai o se luʻi?

A o faagasolo lenā vaitau, e toʻatele tagata e matuā pisi i le faia o faatauga, tafafao, ma asiasi i aiga ma uō. E alu uma lo latou taimi, malosi, ma tupe i na mea, ma e pau le mea e latou te faia, o le avatu o sina foaʻi i faalapotopotoga e fesoasoani i ē matitiva.

Mataupu silisili o le Tusi Paia.

“Aua e te taofia se mea lelei mai i ē ua tatau i ai, pe a mafai ona e faia.” (Faataoto 3:27) E lē na o taimi o le Kerisimasi e mafatia ai tagata matitiva, o ē fia aai ma puapuagatia. Pe a e mātauina se tasi o manaʻomia le fesoasoani ma o loo “mafai ona e faia,” aiseā la e te faatali ai seʻi oo i le Kerisimasi faatoʻā fesoasoani atu? O le a faamanuiaina lou agalelei ma lou alofa mutimutivale.

“O aso muamua uma o le vaiaso, ia taʻitoʻatasi outou i lona fale ma tuu ese se mea e tusa ma mea ua ia maua.” (1 Korinito 16:2) O le fautuaga lenā a le aposetolo o Paulo i uluaʻi Kerisiano na mananaʻo e fesoasoani i ē matitiva. Pe e mafai ona fai ma au masani le “tuu ese” o se tupe e avatu i ē matitiva, po o se faalapotopotoga o loo faaaogāina lelei foaʻi? O le faia faapea o le a e mautinoa ai o loo e fesoasoani i ē matitiva e tusa ma mea ua e gafatia.

“Aua neʻi galo le faia o mea lelei, ma le tufa atu o mea i isi, auā o taulaga faapena e matuā fiafia i ai le Atua.” (Eperu 13:16) Ia mātau, e lē gata e ao ona ʻtufa atu mea i isi,’ ae e tatau foʻi ona ʻfaia mea lelei’ po o gaoioiga e fesoasoani atu ai. O se faaaʻoaʻoga, e toleni e mātua atamamai a latou fanau e fesoasoani i tagata matutua i le faia o feʻau masani; faalaeiau se tasi o maʻi e ala i le tusi atu o se tusi, asiasi pe e vili i ai, po o le naunau alofa foʻi i tamaiti matitiva ma lē atoatoa le malosi. O le iʻuga, ua aʻoaʻoina ai fanau ina ia agalelei ma limafoaʻi i so o se taimi o le tausaga.

[Faamatalaga faaopoopo i le itulau 6]

E toleni e mātua atamamai a latou fanau e fesoasoani i ē matutua, o ē e mamaʻi, ma tamaiti e matitiva ma lē atoatoa le malosi. O le iʻuga, ua aʻoaʻoina ai fanau ina ia agalelei ma limafoaʻi i so o se taimi o le tausaga

[Ata i le itulau 6]