O le ā le Malo o le Atua?

“Lenei tala lelei o le malo . . . ”—MATAIO 24:14.

I LANA lauga taʻutaʻua i luga o le Mauga, na taʻua ai e Iesu se tatalo faaaʻoaʻo e aofia ai le ōlega lenei i le Atua: “Ia oo mai lou malo.” E lē mafaitaulia tagata ua taulotoina lenā tatalo ma faia e lē aunoa. Fai mai se tasi lomifefiloi, “o le tatalo autū lea e masani ona faia e Kerisiano i a latou tapuaʻiga. Ae o le toʻatele e faia pea lenā tatalo, e latou te lē iloa po o le ā le Malo, ma mea o le a faia e lenā Malo pe a oo mai.—Mataio 6:9, 10.

E lē o se mea e faateʻia ai ona e lavelave ma fenuminumiaʻi faamatalaga a taʻitaʻi lotu e uiga i le Malo. Na tusi se taʻitaʻi lotu e faapea o le Malo o le Atua, “o se mea e pogai mai i le mana o le Atua, . . . o se sootaga faaleagaga ma le Atua soifua . . . , e maua ai e tane ma fafine le faaolataga.” A ua fai mai le isi, o le tala lelei o le Malo, o “faatonuga e faatatau i le lotu.” Ua taʻua i le tusi Catechism of the Catholic Church: “O le malo o le Atua o le amiotonu, o le filemu ma le olioli i le Agaga Paia.”

E sili atu ona manino le faamatalaga o loo i le itulau e 2 o lenei mekasini. Ua taʻua ai e faapea: “[O] le Malo o le Atua, o se pulega ua faavaeina i le lagi, ma ua toeitiiti ona faaiʻuina ai lea o amioga leaga uma, ma faia le lalolagi e avea ma parataiso.” Seʻi o tatou iloilo mau o le Tusi Paia e lagolagoina ai lenā manatu.

O Pule o le Lalolagi i le Lumanaʻi

O le malo, o se pulega e iai sona tupu. O le Tupu o le Malo o le Atua o Iesu Keriso ua toe faatū mai. Ua faamatalaina lona nofotupu i le lagi i se faaaliga na tuuina atu i le perofeta o Tanielu e faapea: “Na ou vaaia pea i le faaaliga i le pō, tagaʻi foʻi! ua afio mai i ao o le lagi se tasi e pei o le atalii o le tagata [Iesu]; ma ua tuu atu o ia e ulufale atu i Lē e mai anamuā ona aso [Ieova le Atua], ua latou momoli atu o ia i Ona luma. Ua tuuina atu iā te ia le pule, o le mamalu ma le malo, ina ia auauna iā te ia o tagata ma nuu ma gagana uma. O lana pule, o le pulega lea e tumau e lē mavae atu, e lē faaumatia foʻi lona malo.”—Tanielu 7:13, 14.

Ua taʻua foʻi i le tusi o Tanielu e faapea, o lea Malo e faamausalīina e le Atua, ma faaiʻuina ai malo uma faaletagata, ma e lē faaumatia lava. Ua faamatalaina i le mataupu e 2 le miti a le tupu o Papelonia lea na ia  vaaia ai se tupua tele, ua faaata mai ai le faasologa o malo malolosi o le lalolagi. Na faamatala e le perofeta o Tanielu lenā miti. Na ia taʻua: “I le faaiʻuga o aso . . . o le a faatūina ai e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.”—Tanielu 2:28, 44.

O le tupu o le Malo o le Atua e lē pule na o ia. A o faagasolo lana faiva i le lalolagi, na faamautinoa atu e Iesu i ona soo faamaoni e faapea, o le a toe faatutūina i latou faapea ma isi, ma nonofo i nofoālii i le lagi. (Luka 22:28-30) E lē o uiga lana fetalaiga i nofoālii faaletino, ona na taʻua e Iesu, o lea Malo e i le lagi. O nei pule lagolago, ua taʻua i le Tusi Paia, e mai i “ituaiga uma, ma gagana uma, ma nuu uma, ma atunuu uma.” O le a avea i latou ma “malo ma ositaulaga i lo tatou Atua, e latou te pule mai foʻi o ni tupu i le lalolagi.”—Faaaliga 5:9, 10.

Le Pogai e Lelei ai Tala o le Malo

Mātau, ua tuuina atu iā Keriso Iesu le pule i “tagata ma nuu ma gagana uma,” ma o i latou e aufaatasi ma ia, o le a “pule mai foʻi o ni tupu i le lalolagi.” O ai la o le a avea ma tagatānuu o lenei Malo? O ē e talia le tala lelei o loo talaʻia i aso nei. E aofia ai ma i latou o le a toe faatutūina mai e ola i le lalolagi, ma ua iai le faamoemoe e ola e faavavau.

Ua faamanino mai i le Tusi Paia faamanuiaga o le a olioli ai tagata i le pulega a le Malo. O nisi nei o na faamanuiaga:

“Ua ia faaiʻuina taua i tuluʻiga o le lalolagi. Ua ia gauia foʻi le ʻaufana ma vaevaeina le tao; ma ua ia susunuina i le afi o taavale toso.”—Salamo 46:9.

“O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi.”—Isaia 65:21, 22.

“E soloiesea foʻi [e le Atua] loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:3, 4.

“O lea foʻi taimi o le a faapupulaina ai mata o ē ua pō le vaai, ma o le a faalogo foʻi taliga o ē e tutuli. O le a osooso ai lē ua pipili e pei o le ʻaila, e alaga fiafia le laulaufaiva o lē ua gūgū.”—Isaia 35:5, 6.

“E oo mai le itula e faalogo ai i latou uma o loo i tuugamau i lona leo [Iesu], ma latou ō mai ai, o ē na faia mea lelei e toetutū i le ola.”—Ioane 5:28, 29.

“O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:11.

E mautinoa o ni tala lelei! E lē gata i lea, ua faaalia i valoaga o le Tusi Paia, ua lata mai le taimi e pulea ai e le Malo faimeatonu le lalolagi aoao.