Ua Fesili Mai le ʻAufaitau . . .

Aiseā na Faaaogā ai e Satani se Gata e Tautala Atu ai iā Eva?

▪ Atonu e te ioe, o Satani le malosiaga na mafai ai ona tautala atu le gata iā Eva, e pei ona taʻua i le itulau e 8. O le aʻoaʻoga lenā a le Tusi Paia. Ae e te ono fesili, ‘Aiseā na tautala atu ai se agelu malosi e ala i se gata?’

Ua faamatalaina i le Tusi Paia mailei a Satani o ni “togafiti,” ma ua faamaonia e lenei tala le moni o lenei mea. (Efeso 6:11) O le mea na tupu i Etena e lē o se fagogo e uiga i se meaola e tautala. Ae o se faaaʻoaʻoga mataʻutia lea o le atamai o Satani ma ana mailei, e faatosina ese ai tagata mai i le Atua. E faapefea?

Na filifili ma le poto e Satani le tagata e na te maileia. O Eva e aupito i itiiti i le aoao o mea, ma na fuafua Satani e faasesēina auā e leai sona poto masani. E leʻi faailoa atu e Satani o ia lava iā Eva, ae na ia faaaogā se meaola e matuā faaeteete, o se gata. O lea na ia natia ai ma le poto ona sini faamaualuga ma le fia pule. (Kenese 3:1) Seʻi manatu i mea na ia faia e ala i le faafoliga atu o le gata lea na tautala.

Muamua, o gaoioiga a Satani na māfua ai ona uaʻi ma faalogo atu Eva i le gata. Na faaigoa e lana tane o Atamu meaola uma, e aofia ai ma le gata, o lea la sa ia iloa lelei e lē tautatala ni gata. (Kenese 2:19) E lē taumatea sa mātauina e Eva gaoioiga faaeteete a lenei meaola. O le togafiti a Satani na faatupuina ai lona fia iloa, ma amata ai ona mafaufau i le mea e tasi e faasā i totonu o le faatoʻaga. Lona lua, pe afai sa iai le gata i lālā o le laau na faasāina, faamata o le ā se manatu o Eva? Pe faamata na ia manatu na mafai ona tautala lenei meaola faatauvaa, ona na ia ʻaina le fua o le laau? Pe manatu foʻi afai na aogā le fua o le laau i le gata, pe e lē aogā foʻi la iā te ia? Tatou te lē mautinoa le manatu sa iā Eva pe na ʻai foʻi e le gata le fua o le laau, ae e tatou te iloa na talitonu Eva ina ua fai atu ma le pepelo le gata, o le a pei o ia o le Atua pe a ʻai i le fua o le laau.

E tele mea ua iloa mai i upu na faaaogā e Satani. Na tupu le masalosalo o Eva, ona o tala a Satani e faapea ua taofia e le Atua se mea lelei mai iā te ia, ma e faasāsā naʻuā ana poloaʻiga. E mafai ona taunuu le faufauga a Satani pe a faasilia e Eva lona lava lelei, nai lo o le alofa i le Atua o lē na foaʻiina mai mea uma iā te ia. (Kenese 3:4, 5) Ae pagā lea, na malo Satani. E leʻi iai i le loto o Atamu po o Eva le alofa ma le talisapaia lea sa tatau ona iai mo Ieova. Pe e lē o faatupuina foʻi e Satani lenā ituaiga o mafaufauga lē saʻo ma manatu faapito i aso nei?

O le ā na uunaʻia Satani, ma o le ā na ia saʻilia? I Etena, sa ia taumafai e natia o ia lava ma ana uunaʻiga. A o faagasolo taimi na faaalia ai o ia. Ina ua ia faaosoosoina Iesu, sa iloa lava e Satani e lē mafai ona toe natia o ia lava. O lea la, sa ia fai atu saʻo iā Iesu: “Tau lava ina e faapaʻū ma tapuaʻi mai iā te aʻu.” (Mataio 4:9) Ua leva ona fuā Satani iā Ieova le Atua ona o le tapuaʻiga ua avatu e tagata iā te Ia. E na te faia mea uma e taofia ai tagata mai le tapuaʻi atu i le Atua, pe ia faia foʻi i se auala sesē. E fiafia tele o ia pe a lē toe faamaoni tagata i le Atua.

Ua faaalia manino i le Tusi Paia, e manaʻo Satani e faaumatia ē o loo auauna i le Atua. Ae o le mea e lelei ai, e lē ʻolegia i tatou e pei o Eva, ‘auā tatou te lē vālea i togafiti’ a Satani.—2 Korinito 2:11.