O Lesona Tatou te Aʻoaʻoina Mai iā Iesu

Mea o Faia e Agelu mo i Tatou

Na soifua Iesu i le lagi faatasi ma lona Tamā, a “o leʻi faia tagata i le lalolagi.” (Ioane 17:5) O le mea lea, ua agavaa ai o ia e tali fesili o loo i lalo.

Po o naunau mai agelu iā i tatou?

▪ Ua tatou iloa mai iā Iesu le matuā naunau mai o agelu iā i tatou. Na fetalai o ia: “E olioli agelu a le Atua pe a salamō se tagata agasala e toʻatasi.”—Luka 15:10.

Ua faailoa mai e Iesu le matafaioi ua tuuina atu i agelu a le Atua, ina ia latou vaavaaia le lelei faaleagaga o ana auauna. O lea, na lapataʻia ai e Iesu ona soo ina ia aua neʻi faatausuai i isi i lona faapea atu: “Vaai lelei ia aua neʻi o outou ʻinoʻino i se tasi o i latou nei e faatauvaa, auā ou te fai atu iā te outou o loo vaavaai atu pea a latou agelu i le lagi, i fofoga o loʻu Tamā o i le lagi.” (Mataio 18:10) E lē o le uiga o le tala a Iesu, e tofu ona soo ma le agelu o loo leoleoina o ia. Ae ua faaalia ai le naunau mai o agelu o loo galulue faatasi ma le Atua, i tagata o le faapotopotoga Kerisiano.

 Pe e mafai ona faaleaga i tatou e le Tiapolo?

▪ Na lapataʻia e Iesu ona soo, o loo taumafai Satani e taofia tagata mai i le iloa o le upu moni e faatatau i le Atua, i le faapea mai: “O ia lea ua faalogo i le upu o le malo ae lē malamalama, ona sau ai lea o lē ua leaga ma fao ese le mea na lūlūina i lona loto.”—Mataio 13:19.

O se tasi o auala ua faasesēina ai e Satani tagata, na faaalia e Iesu i lana talafaatusa i se tamāloa na lūlū le saito i lona fanua. O le tamāloa, ua faaatagia ai Iesu, a o le saito ua faaatagia ai Kerisiano moni o ē e pule faatasi ma Iesu i le lagi. Peitaʻi na taʻua e Iesu, na alu ane le fili ma “lūlū vao leaga i le saito.” O vao leaga ua faaatagia ai Kerisiano pepelo. A “o le fili na lūlūina vao leaga, o le Tiapolo lea.” (Mataio 13:25, 39) E tai tutusa lava foliga o vao leaga ma le saito faatoʻā tupu, e faapena foʻi i latou ua taʻua o Kerisiano, e foliga mai e pei o tagata tapuaʻi moni. Ua faasesē e lotu tagata i a latou aʻoaʻoga sesē ma ua lē usiusitaʻi ai i le Atua. Ua faaaogā e Satani lotu sesē ia lē mafai ai e tagata ona mafuta vavalalata atu iā Ieova.

E faapefea ona puipuia i tatou mai iā Satani?

▪ Na taʻua e Iesu, o Satani “le pule o le lalolagi.” (Ioane 14:30) Na faaalia i le tatalo a Iesu i le Atua le auala e puipuia ai i tatou mai iā Satani. Na tatalo Iesu i lona Tamā i le lagi e faatatau i ona soo: “Ia leoleo iā i latou ona o lē ua leaga. E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi. Ia faapaiaina i latou i le upu moni, o lau afioga o le upu moni lea.” (Ioane 17:15-17) E mafai e le poto mai i le Afioga a le Atua ona puipuia i tatou, ia lē taaʻina e le lalolagi ua pulea e Satani.

Ua faapefea ona taaʻina e agelu i tatou i aso nei?

▪ Na fetalai Iesu: “I le taufaaiʻuiʻuga o le faiga o mea a le lalolagi: e ō atu [ai] agelu ma tuueseese tagata amioleaga mai i tagata amiotonu.” (Mataio 13:49) Ua tatou ola i le “taufaaiʻuiʻuga o le faiga o mea a le lalolagi,” ma e faitau miliona i latou ua tali mai i le tala lelei o le Malo o le Atua.—Mataio 24:3, 14.

Peitaʻi, e lē o tagata uma e suʻesuʻe i le Afioga a le Atua e maua lona finagalo malie. O loo faatonutonu e agelu le galuega a auauna a Ieova, ma o ē e alolofa moni i le Atua, e vavaeesea mai i ē e lē faatatauina mea ua latou iloa. Na faamatala e Iesu, o ē e maua le finagalo malie o le Atua: “O i latou ia ua faalogo i le upu ma le loto mamā ma lelei, ma tausi i ai, ua fua mai, ma ua tumau.”—Luka 8:15.

Mo nisi faamatalaga, tagaʻi i le mataupu e 10 o lenei tusi, ua lomia e Molimau a Ieova.

[Ata i le itulau 16]

Ua faia se vaega a agelu i le aoao mai i le faapotopotoga Kerisiano, o ē e fiafia moni