Pe e Mai i le Atua le Tautala i Gagana Eseese?

UA FAI mai Devon: “Ou te lē malamalama. O vaiaso uma lava i le matou lotu, e foliga mai e maua e le toʻatele o tagata le agaga paia, ma faavavega ai ona tautatala i gagana eseese. O nisi o i latou o loo ola i ni olaga e lē mamā amio. Ae o loo oʻu taumafai e ola i se olaga mamā. Peitaʻi, e tigā ona ou tatalo, ae e lē taitai ona ou maua lenei meaalofa a le agaga. Aiseā?”

E auai foʻi Gabriel i se lotu e foliga mai e maua e tagata le agaga paia ma tautatala i gagana eseese. Ua fai mai o ia: “O le mea ou te lē fiafia ai, a o fai aʻu tatalo, e faalavelave isi ona e tautatala leotetele i ni gagana ou te lē malamalama ai faapea foʻi i latou. E leai se tasi e aogā i ai na talanoaga. Pe e lē tatau ona iai ni aogā e maua mai i le meaalofa a le agaga o le Atua?”

O mea na tutupu iā Devon ma Gabriel, ua lāgā ai se fesili faatupu manatu, Pe e mai i le Atua le tautala i gagana eseese, e pei ona faia e nisi lotu i aso nei? Ina ia tali lenā fesili, e lelei ona iloilo le meaalofa sa iai i Kerisiano o le uluaʻi senituri, o le tautatala faavavega i gagana eseese.

Ua Latou ‘Amata Ona Tautatala i Gagana Eseese’

Ua taʻua i le Tusi Paia nisi o tane ma fafine na maua le mana e tautatala ai i gagana e latou te leʻi aʻoaʻoina muamua. O le uluaʻi taimi na tupu ai, o le aso o le Penetekoso i le 33 T.A., i ni nai vaiaso talu le maliu o Iesu Keriso. I lenā aso i Ierusalema, o soo e 120 o Iesu na “faatutumuina . . . i le agaga paia, ma amata ai ona tautatala i gagana eseese.” O tagata na asiasi mai i atunuu eseese, na “matuā taufaiofo, auā ua taʻitasi ma faalogo atu iā i latou o tautatala i lana lava gagana.”—Galuega 1:15; 2:1-6.

O loo taʻua i le Tusi Paia nisi o uluaʻi soo o Iesu na mauaina lenei tomai mataʻina. O se faaaʻoaʻoga, o le fesoasoani a le agaga paia na tautala faavavega ai le aposetolo o Paulo i nisi o gagana. (Galuega 19:6; 1 Korinito 12:10, 28; 14:18) Ae o so o se meaalofa mai i le agaga paia o le Atua, e tatau ona iai se fuafuaga lelei. O le ā la le fuafuaga o le tautatala i gagana eseese i taimi o le Tusi Paia?

O se Faailoga o le Lagolagoina e le Atua

Ina ua tusi Paulo i Kerisiano i Korinito, o nisi o ē na foliga mai na tautatala i gagana eseese, na fai atu i ai o ia “o le tautala i gagana  eseese o se faailoga lea . . . i ē e lē talitonu.” (1 Korinito 14:22) O isi la tomai faavavega ma le tautala i gagana eseese, o se faailoga e iloa ai e tagata na mātau ane, na talia ma lagolagoina e le Atua le faapotopotoga Kerisiano ua faatoʻā faavaeina. Sa pei meaalofa faavavega o se faailoilo e faasino ai tagata o loo saʻili i le upu moni, i le mea e maua ai tagata o le Atua.

Ia mātau, e lē o taʻua i le Tusi Paia na tautatala faavavega Iesu po o se tasi o perofeta anamua, i ni gagana e latou te leʻi aʻoaʻoina muamua. O lona uiga la, sa iai se isi fuafuaga na ala ai ona tuuina i soo o Iesu le meaalofa o le tautala i gagana eseese.

O se Auala e Talaʻi Atu ai le Tala Lelei i Isi

I le amataga o lana faiva, na faatonu e Iesu ona soo e talaʻi atu le tala lelei o le Malo o le Atua i na o tagata Iutaia. (Mataio 10:6; 15:24) O lea sa seāseā ai ona talaʻi atu le ʻausoo i vaipanoa sa lē iai ni tagata Iutaia. Ae e leʻi umi ae suia lenā tulaga.

Ina ua faatoʻā mavae lona maliu i le 33 T.A., na faatonu e Iesu ua toe faatūina ona soo ia “fai tagata o nuu uma lava ma soo.” Na ia taʻu atu foʻi i ona soo o le a fai i latou ma molimau iā te ia i “tuluʻiga uma o le lalolagi.” (Mataio 28:19; Galuega 1:8) Ina ia faia faapea, e ao la ona faaaogā nisi gagana se tele e ese mai i le faa-Eperu.

Peitaʻi, o le toʻatele o na uluaʻi soo “e leʻi lava ni aʻoaʻoga ma e faatauvaa.” (Galuega 4:13) E faapefea la ona latou talaʻi atu i atunuu mamao, lea e tautatala i gagana e latou te leʻi faalogo muamua i ai pe tautatala ai foʻi? Na fesoasoani le agaga paia i nisi o na tagata talaʻi maelega, i le mauaina lea o le tomai faavavega e talaʻi atu i ni gagana e latou te leʻi aʻoaʻoina muamua.

E lua la fuafuaga tāua o le meaalofa o le tautala i gagana eseese. Muamua, na fai ma faamaoniga o le lagolagoina e le Atua. Lua, o se auala na fesoasoani i uluaʻi Kerisiano e faataunuu ai lo latou tofiga, e talaʻi i tagata o gagana eseese. Po o faataunuuina nei fuafuaga i le tautatala i gagana eseese i le tele o falesā i aso nei?

Po o se Faailoga o le Lagolagoina e le Atua Le Tautala i Gagana Eseese i Aso Nei?

O fea e te faapipiiina ai se faailoilo ina ia iloa atu e le toʻatele o tagata o lou vaipanoa? Ioe, e te lē faapipiiina i totonu o se fale e lē iloa atu e tagata. Ua taʻua i le tala e uiga i le aso o le Penetekoso, na mātauina e se “motu o tagata e toʻatele” le faailoga na faia i le tautatala faavavega o soo i gagana eseese. O le pogai lea na iʻu ai i le “pe tusa ma le tolu afe o tagata ua faaopoopo atu,” i le faapotopotoga Kerisiano i lenā aso! (Galuega 2:5, 6, 41) Pe a fai mai tagata o loo latou tautatala i gagana eseese ae e na o totonu o se falesā o loo faia ai, e faapefea la ona avea lenei faiga o se faailoga i le toʻatele o tagata e lē talitonu?

Ua taʻua i le Tusi Paia le faitaaga ma isi “galuega a le tino,” o mea ia e lē maua ai le agaga paia, ma ua taʻua atili “o ē o loo faia mea faapena, e lē fai le malo o le Atua mo o latou tofi.” (Kalatia 5:17-21) Pe afai e te mātauina tagata e ola i ni olaga e lē mamā amio, ae o loo tautatala i gagana eseese, e te ono taumānatu, ‘⁠Pe e talafeagai ma sesē le tuuina atu o le agaga paia o le Atua, i tagata o loo faaauau ona faia amioga ua taʻusalaina i le Afioga a le Atua?’ E talitutusa lenā ma le faatūina o se faailoilo e faasino ai taavale i le auala sesē.

Po o le Tautala i Gagana Eseese i Aso Nei o se Auala e Talaʻi ai le Tala Lelei?

Ae faapefea le isi fuafuaga o le meaalofa o le tautala i gagana eseese i le uluaʻi senituri? Po o avea le tautala i gagana eseese i falesā i aso nei, o se auala e talaʻi atu ai le tala lelei i tagata o gagana eseese? Manatua o tagata ia na vaavaai ane i le aso o le Penetekoso 33 T.A. i Ierusalema,  na ō mai mai i atunuu eseese, ma na latou malamalama lelei i gagana na tautatala faavavega ai le ʻausoo. Ae o ē o loo tautatala i gagana eseese i aso nei, e masani ona tautatala i upu e lē taitai ona malamalama i ai se tasi.

O lea la, o le tautala i gagana eseese i aso nei, e matuā ese mamao mai i le meaalofa a le agaga paia na tuuina atu i uluaʻi soo o Iesu. E matuā leai se faamatalaga maufaatuatuaina e iloa ai, na maua e se tasi lea mana faavavega ina ua maliliu le ʻauaposetolo. E lē faateʻia ai tagata faitau o le Tusi Paia i lenei mea. E tusa ai o meaalofa faavavega e aofia ai ma le tautala i gagana eseese, na valoia e Paulo: “O le a mavae ia.” (1 Korinito 13:8) E faapefea la ona iloa e se tasi ē o loo iai le agaga paia i aso nei?

O Ai ua Faamaonia o Loo Iai le Agaga Paia?

Na silafia lelei e Iesu, pe a faavaeina le faapotopotoga Kerisiano, o le a lē umi ae mavae atu le meaalofa o le tautala i gagana eseese. A o lata ina maliu Iesu, na taʻua e ia se faailoga o le a iloa ai pea ona soo moni. Na fetalai o ia: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:35) Ae i le mau lava foʻi o le Afioga a le Atua lea e valoia ai le mavae atu o meaalofa faavavega, ua taʻua ai: “E lē uma le alofa.”—1 Korinito 13:8.

Ua muamua ona taʻua le alofa i vala e iva o “le fua” o le agaga paia o le Atua. (Kalatia 5:22, 23) O ē la o loo iai moni lava le agaga ma lagolagoina e le Atua, e alofa moni le tasi i le isi. E lē gata i lea, o le vala lona tolu o le fua o le agaga, o le filemu. O ē o loo iai le agaga paia i aso nei, e latou te tausia le filemu, ma tauivi e tetee atu i le ʻinoʻino i isi tagata, faailogalanu ma le sauā.

Aua foʻi neʻi galo le valoaga a Iesu o loo i le Galuega 1:8. Na ia valoia o le a maua e ona soo le mana e molimau atu ai e uiga iā te ia i “tuluʻiga uma o le lalolagi.” Na taʻua foʻi e Iesu o le a faia pea lenei galuega “e oo lava i le gataaga o le lalolagi.” (Mataio 28:20, Tusi Paia Samoa—Faaliliuga o le 1969) O lea la, o le a avea pea lenei galuega talaʻi i le lalolagi aoao, o se faailoga e iloa ai ē o loo iai moni lava le agaga paia.

O le ā sou manatu? O lē fea vaega o tagata ua e mātauina o loo iai le agaga paia i aso nei? O ai o loo faaalia le fua o le agaga, aemaise lava le alofa ma le filemu, e ui o loo puapuagatia i le lalolagi aoao i pulega a malo ona o le lē auai i faigātaua? (Isaia 2:4) O ai o loo taumafai e ʻalofia galuega a le tino e pei o le faitaaga, ma aveesea mai iā i latou tagata e faia ma le lē salamō nei amioga? (1 Korinito 5:11-13) O ai o loo talaʻia i le lalolagi aoao le tala lelei e faapea, o le Malo o le Atua ua na o le pau lea o le faamoemoe mo tagata?—Mataio 24:14.

E lē matamumuli ē ua lomiaina lenei lomiga e faapea atu, ua talafeagai lelei i Molimau a Ieova faamatalaga a le Tusi Paia e uiga i ē o loo iai le agaga paia. Aiseā e te lē faamasani atu ai iā i latou ma filifili e oe lava po o lagolagoina moni i latou e le Atua?