Pasili—O se Tane e Nofouta i Mea e Gata ai Lona Malosi

‘AISEĀ o le a avea ai aʻu ma faatigā iā te oe?’ Na fai atu ai Pasili, o se tamā ua 80 tausaga, nei upu i le tupu o Isaraelu, o Tavita. Ua taʻua i le Tusi Paia Pasili, o ia o “le alii tele lava,” e lē taumatea ona o lona tamaoaiga. (2 Samuelu 19:32, 35) Na soifua aʻe Pasili i Kiliata, o se vaipanoa maugā e i le itu i sasaʻe o le vaitafe o le Ioritana.—2 Samuelu 17:27; 19:31.

O ā tulaga o mea na iai, na māfua ai ona fai atu e Pasili na upu iā Tavita? Aiseā na fai atu ai faapea lenei tamā matua?

Fouvale i le Tupu

Na lamatia le ola o Tavita. Na foua e lona atalii o Apisaloma le malo ina ua ‘ia faaliliuina loto o tagata o Isaraelu.’ E mautinoa o le a fasiotia e Apisaloma so o se tasi na faamaoni i lona tamā. Na tuua loa e Tavita ma ana auauna Ierusalema. (2 Samuelu 15:6, 13, 14) Na fesoasoani Pasili iā Tavita ina ua taunuu i Maanaima, o se vaega e i sasaʻe o Ioritana.

Na saunia ma le agalelei e Pasili, Sopi, ma Makira le tele o mea na manaʻomia e Tavita. Na malamalama nei tane faamaoni e  toʻatolu i le mafatia o Tavita, ina ua latou faapea mai e uiga iā te ia ma ona tagata: “Ua fia aai le nuu, ma ua vaivai, ma fia inu i le vao.” Na latou faia mea uma na mafaia e faamalie ai na manaʻoga, i le saunia mo Tavita ma ona tagata o moega, saito, karite, falaoa, saito tunu, fua o fue, atasema, meli, mamoe, ma isi mea.—2 Samuelu 17:27-29.

O se lamatiaga le fesoasoani iā Tavita. E ono faasala e Apisaloma so o se tasi e lagolagoina le tupu. O lea, na loto tele Pasili i lona faamaoni atu iā Tavita.

Ua Suia le Tulaga o Mea

E leʻi leva ae fetaiaʻi le ʻaufouvale a Apisaloma ma tagata a Tavita. Na faia se taua i le vao o Efaraima, e lata ane i Maanaima. Na toʻilalo ʻau a Apisaloma, ma sa “fai le fasi tele i lea aso.” E ui sa taumafai Apisaloma e sola ese, ae na fasiotia lava o ia.—2 Samuelu 18:7-15.

Na toe avea Tavita ma tupu o Isaraelu ma e leʻi toe luʻia e se tasi o ia. E leʻi toe ola fesolasolataʻi foʻi ona tagata. O lo latou faamaoni iā Tavita, na faaaloalogia ma talisapaia ai i latou e Tavita.

Ina o le a toe foʻi Tavita i Ierusalema, “o Pasili foʻi le Kiliata, ua alu ifo o ia nai Rokeli; ua la sopoʻia atu Ioritana, ma le tupu ina ia momoli iā te ia i Ioritana.” O inā lea na ofo atu ai e Tavita lenei valaaulia iā Pasili le tamā matua: “Ta te ō ma aʻu, ta te mafuta faatasi ma aʻu i Ierusalema.”—2 Samuelu 19:15, 31, 33.

E mautinoa na matuā talisapaia e Tavita le fesoasoani a Pasili. E foliga mai e leʻi tau ina manaʻo le tupu e tauia le agalelei o Pasili i le saunia o ni manaʻoga faaletino. E leʻi manaʻomia e Pasili o lē e tamaoaiga lenā ituaiga o fesoasoani. Atonu na manaʻo Tavita ia iai Pasili i lona maota, ona o uiga lelei o lenei tamā matua. O le maua o se nofoaga tumau i le maota o le tupu, o se faaeaga mamalu auā o le a olioli ai Pasili i le faauōga ma le tupu.

Loto Maulalo ma Amanaʻia le Tulaga Moni

Na tali atu Pasili i le valaaulia a le tupu o Tavita: “E fia ni aso o tausaga o loʻu olaga o totoe, ta te ō aʻe ai ma oe le tupu i Ierusalema? Ua valugafulu oʻu tausaga i lenei aso; e iloa ea e aʻu se lelei ma se leaga? e lagona ea e lau auauna ni aʻu mea e ʻai ma ni aʻu mea e inu? ou te toe lagona ea le leo o tane pepese ma fafine pepese?” (2 Samuelu 19:34, 35) O lea, na teena ma le faaaloalo e Pasili le valaaulia ma le faaeaga matagofie. Aiseā?

O se tasi o pogai o le faaiʻuga a Pasili, atonu ona ua matua lona soifua ma ua gata mai mea e mafai i lona malosi. Atonu na ia lagona e lē o toe umi ni aso e ola ai. (Salamo 90:10) Na ia faia le mea na te mafaia e lagolago ai Tavita, ae na ia nofouta foʻi i mea e gata ai lona malosi ona o le soifua matua. E leʻi faataga e Pasili le manatu i le mamalu ma le fia lauiloa e taofia ai o ia mai le iloiloina ma le talafeagai o mea e na te gafatia ona fai. E leʻi pei Pasili o Apisaloma lea na faasausili, ae na ia faaalia ma le poto le loto maulalo.—Faataoto 11:2.

O le isi pogai o le faaiʻuga a Pasili, atonu o se faanaunauga ia aua neʻi avea mea e gata ai lona malosi, ma itu o le a lē mafai ai ona fai tiute o le tupu na tofia e le Atua. Na fesili Pasili: “Se ā le mea e toe faatigā ai loʻu alii e  lau auauna?” (2 Samuelu 19:35) E ui na lagolagoina pea e Pasili ia Tavita, ae atonu na ia talitonu e mafai e se tane e itiiti ifo ona faatino tofiga i se tulaga e sili ona lelei. Atonu sa faasino i lona atalii na fai atu Pasili: “Silasila foʻi o lau auauna o Kimeama, e alu atu o ia ma loʻu alii le tupu, e te faia iā te ia se mea e te finagalo i ai.” Na i lo le teena e Tavita, na ia talia lenā manatu. A o leʻi sopoʻia Ioritana, “ona feasogi lea o le tupu ma Pasili, ma ua faamanuia iā te ia.”—2 Samuelu 19:37-39.

E Manaʻomia le Fetuutuunaʻi

Ua faamatilatila mai i le tala iā Pasili le manaʻomia ona fetuutuunaʻi. I le isi itu, e lē tatau ona tatou teena se faaeaga o le auaunaga pe ʻalofia foʻi le taumafai e ausia lenā faaega, ona e tatou te mananaʻo i se olaga toʻafilemu pe lagona foʻi le lē agavaa e amo le avega tauave. O le a fesoasoani le Atua i lo tatou lē agavaa pe a tatou faalagolago iā te ia mo le malosi ma le poto.—Filipi 4:13; Iakopo 4:17; 1 Peteru 4:11.

I le isi itu, e ao ona tatou iloa mea e gata ai lo tatou malosi. O se faaaʻoaʻoga, atonu o loo pisi tele se Kerisiano i mea faaleagaga. Ua ia iloa o le taliaina o nisi faaeaga, o le a ia lafoaʻia ai tiute tauave faale-Tusi Paia e pei o le tausia o lona aiga. I lea tulaga, pe lē o se faailoaga ea o le loto maulalo ma le fetuutuunaʻi mo ia le teena o nisi faaeaga mo lea taimi?—Filipi 4:5; 1 Timoteo 5:8.

Na faataatia e Pasili se faaaʻoaʻoga lelei ma e ao ona tatou faaaʻoaʻo i ai. Sa ia faamaoni, loto tele, agalelei, ma loto maulalo. Ae o le sili o na mea, sa maumauaʻi Pasili e faamuamua le finagalo o le Atua na i lo o ia lava.—Mataio 6:33.

[Faafanua i le itulau 15]

(Tagaʻi i le lomiga mo le ata atoa)

Na alu atu Pasili ua 80 tausaga i se malaga fitā ina ia fesoasoani iā Tavita

KILIATA

Rokeli

Sukota

Maanaima

Vaitafe o Ioritana

Kilikala

Ieriko

Ierusalema

EFARAIMA

[Ata i le itulau 13]

Aiseā na teena ai e Pasili le ofo a Tavita?