O le Tusi Lona Lua o Samuelu 18:1-33

  • Le toʻilalo ma le fasiotia o Apisaloma (1-18)

  • Faailoa atu iā Tavita le oti o Apisaloma (19-33)

18  Ua faitauina e Tavita le aofaʻi o le nuu o loo faatasi ma ia, ma ua ia tofia alii e avea ma ta‘ita‘i o ‘au e taʻitoʻaafe, ma ta‘ita‘i o ‘au e taʻitoʻaselau.+  Ona aauina atu lea e Tavita o le tasi vaetolu o tagata e taʻitaʻia e Ioapo,+ o le isi tasi vaetolu e taʻitaʻia e Apisai+ le tama a Seruia,+ o le uso o Ioapo, a o le isi tasi vaetolu e taʻitaʻia e Itai+ le tagata Kata. Ona faapea atu lea o le tupu i tagata: “Ou te alu atu lava e tatou te ō faatasi ma outou.”  Ae ua fai mai tagata: “E lē tatau ona e alu atu,+ auā afai e matou te sosola, e latou te lē manatu mai lava iā i matou; afai foʻi e feoti le ʻafa o i matou, e latou te lē manatu mai lava, auā e tusa oe ma le toʻa 10,000 o i matou.+ A o lenei, e sili atu ona lelei pe a e fesoasoani mai iā i matou mai i le aai.”  Ona fai atu lea o le tupu iā i latou: “O le mea e lelei iā te outou, ou te faia lava.” Ua tū pea le tupu i autafa o le faitotoʻa o le aai, ae ua ō atu tagata uma e taʻitoʻaselau ma le taʻitoʻaafe.  Ua poloaʻi atu le tupu iā Ioapo, o Apisai, ma Itai, e faapea: “Ia outou agalelei i le tauleʻaleʻa o Apisaloma ona o aʻu.”+ Ua faalogo ai foʻi tagata uma ina ua poloaʻi atu le tupu i ta‘ita‘i‘au uma e faatatau iā Apisaloma.  Ua ō atu tagata i le fanua e faafetaiaʻi iā Isaraelu; ma ua faia le taua i le vaomatua o Efaraima.+  Ua faatoʻilaloina le nuu o Isaraelu+ i inā e auauna a Tavita,+ ma e matuā toʻatele tagata na fasia ai i lenā aso, e toʻa 20,000.  Ua salalau solo atu le taua i inā i le laueleele uma. E lē gata i lea, e toʻatele atu tagata na feoti i le vaomatua, i lo o tagata na fasiotia i le pelu i lenā aso.  Ua fetaiaʻi Apisaloma ma auauna a Tavita. Ua tiʻetiʻe Apisaloma i le asini,* ona alu atu lea o le asini i lalo o lālā felefele o se laau telē, ua lāvea ai le lauulu o Apisaloma i le laau telē, ma ua tautau ai o ia i inā* a o alu ese atu le asini. 10  Ua iloa atu lea mea e le tasi tagata, ona taʻu atu lea e ia iā Ioapo,+ ua faapea atu: “Faauta! Na ou vaai iā Apisaloma o tautau i luga o se laau telē.” 11  Ona fai mai lea o Ioapo i le tagata na fai atu iā te ia: “O lenā na e vaai i ai, aiseā na e lē fasiotia ai o ia ina ia paʻū i le eleele? Pe ana e faia faapena, semanū ou te tuuina atu lava iā te oe o tupe siliva e sefulu, ma se fusipa‘u.” 12  Ae ua fai atu le tagata iā Ioapo: “E tusa lava pe e aumai iā te a‘u* tupe siliva e 1,000, e lē oo lava loʻu lima i le atalii o le tupu; auā na tatou faalogo uma lava o poloaʻi atu le tupu iā te oe, o Apisai, ma Itai, e faapea, ‘Ia outou faaeteete ina neʻi mao se tasi i le tauleʻaleʻa o Apisaloma.’+ 13  Pe ana ou lē usita‘i ma fasiotia o ia, e lē lilo lava lenei mea i le tupu, ma o le a e lē puipuia fo‘i a‘u.” 14  Ae ua fai mai Ioapo: “E lē toe ma‘imau so‘u taimi iā te oe!” Ona ia ave lea o matatao e tolu i lona lima ma tutuʻi ai le fatu o Apisaloma a o ola pea o ia, a o tautau o ia i le laau telē. 15  Ona ō mai ai lea o auauna e toʻasefulu e aveina auupega a Ioapo, ma fasi iā Apisaloma se‘ia oo ina oti.+ 16  Ona ili lea e Ioapo o le pū, ma ua toe foʻi mai tagata mai i le tuliloaina o Isaraelu; ua taofia fo‘i e Ioapo le nuu. 17  Ua latou ave Apisaloma ma lafo i se lua telē i le vaomatua, ma faaputu ai i ona luga se faaputuga maa telē.+ Ae ua sosola tagata Isaraelu uma i o latou fale. 18  A o ola Apisaloma, na ia ave ma faatū mo ia lava se poutū i le vanu* o le tupu,+ auā sa ia faapea ane: “E leai soʻu atalii e manatua ai pea loʻu igoa.”+ Ona ia faaigoa lea o le poutū i lona igoa, ma ua taʻua o le Maa Faamanatu a Apisaloma, e oo mai lava i aso nei. 19  Ua fai atu Aimaasu+ le atalii o Satoka: “Faamolemole, tuu mai aʻu seʻi oʻu tamoʻe e taʻu atu le tala i le tupu, auā ua faamasinoina ma le tonu o ia e Ieova e ala i le faasaʻoloto o ia mai i ona fili.”+ 20  Peitaʻi, ua fai mai Ioapo iā te ia: “E te lē avea se tala i lenei aso. Se‘i oo i se isi aso ona e alu lea e ave le tala, ae o le asō e te lē avea ai se tala, auā ua oti le atalii o le tupu.”+ 21  Ona fai atu lea o Ioapo i se tagata Kuso:+ “Inā alu ia ma taʻu atu i le tupu le mea na e vaaia.” Ua ifo le tagata Kuso iā Ioapo ma tamoʻe loa. 22  Ona toe fai mai lea o Aimaasu le atalii o Satoka iā Ioapo: “Tuu mai ia aʻu seʻi oʻu tamoʻe atu faamolemole e mulimuli i le tagata Kuso, e tusa lava po o le ā le mea e tupu.” Ae ua fai atu Ioapo: “Loʻu atalii e, o le ā le mea e te tamoʻe atu ai fua, ae e leai se tala e te ta‘uina atu?” 23  Ae ua fai mai pea o ia: “Tuu mai pea aʻu seʻi oʻu tamoʻe, e tusa lava po o le ā le mea e tupu.” Ona fai atu lea o Ioapo iā te ia: “Inā tamoʻe ia!” Ua tamoʻe atu Aimaasu, ua ui atu i le itumalo o Ioritana,* ona ia tamoʻe atu lea ma pasia le tagata Kuso. 24  O loo nofo Tavita i le vā o faitotoʻa e lua o le aai.+ Ua alu atu le tagata vāai+ i le taualuga o le faitotoʻa o le pā. Ona ia vaai atu lea ma iloa ai se tagata o loo tamoʻe mai na o ia. 25  Ua valaau mai le tagata vāai ma taʻu mai i le tupu, ona fai atu lea o le tupu: “Afai e na o ia, ua ia aumaia se tala.” A o tamoʻe mai pea o ia ma ua latalata mai, 26  ua iloa atu e le tagata vāai se isi tagata o loo tamoʻe mai. Ona valaau atu lea o le tagata vāai i le leoleo faitotoʻa: “Faauta! Ua tamoʻe mai foʻi le isi tagata na o ia!” Ae ua fai atu le tupu: “O loo ia aumaia foʻi se tala.” 27  Ua fai mai le tagata vāai: “Ou te vaai atu i le tamoʻe mai a lē o muamua, e pei o le tamoʻe a Aimaasu+ le atalii o Satoka.” Ona fai atu lea o le tupu: “O ia o se tagata lelei, o loo ia aumaia se tala lelei.” 28  Mulimuli ane, ua valaau mai Aimaasu ma faapea mai i le tupu: “O loo saogalemu mea uma!” Ona ia ifo lea i le tupu ma faō i le eleele. Ua ia faapea atu: “Ia viia Ieova lou Atua, o lē na tuuina mai tagata na fouvale* i loʻu alii le tupu!”+ 29  Peitaʻi, ua fai atu le tupu: “Po o saogalemu le tauleʻaleʻa o Apisaloma?” Ua fai mai Aimaasu: “Na ou iloa le vevesi tele i le taimi na auina mai ai lau auauna ma le auauna a le tupu e Ioapo, ae ou te leʻi iloa le mea na tupu.”+ 30  Ua fai atu le tupu: “Sōsō ese ma tū ane i inā.” Ona ia sōsō ese lea ma tū ai i inā. 31  Ona sau ai lea o le tagata Kuso+ ma ua ia faapea mai: “Seʻi faafofoga mai loʻu alii le tupu i lenei tala: O le aso lenei ua aumaia ai e Ieova le faamasinogatonu, e ala i le faasaʻoloto o oe mai i lima o i latou uma na fouvale iā te oe.”+ 32  Ae ua faapea atu le tupu i le tagata Kuso: “Po o saogalemu ea le tauleʻaleʻa o Apisaloma?” Ua faapea mai le tagata Kuso: “Tau ina ia faaumatia fili uma o loʻu alii le tupu ma i latou uma na fouvale ma agaleaga iā te oe, ia pei o le taule‘ale‘a.”+ 33  Ona tigā ai lea o le tupu ma alu aʻe i le potu i luga o le faitotoʻa o le pā, ua tagi ai. O ana upu foʻi nei na fai a o ia savali: “Loʻu atalii e, Apisaloma, loʻu atalii e, loʻu atalii e, Apisaloma! Ta fia oti e sui ai oe, loʻu atalii e, Apisaloma, loʻu atalii e!”+

Faamatalaga Pito i Lalo

O le upu Eperu e faasino atu i le tama a le asini poʻa ma le solofanua fafine.
Epe., “i le vā o le lagi ma le lalolagi.”
Epe., “e fuaina mai i loʻu lima.”
Po o “le fanua laugatasi.”
Epe., “le itumalo.”
Epe., “na sii atu o latou lima.”