Pe E te Manatua?

Pe na e fiafia i le faitauina o lomiga fou o Le Olomatamata? Seʻi taumafai pe e mafai ona e taliina fesili nei:

• O le ā se mea e fesoasoani i se Kerisiano moni pe a fulitua sē pele iā Ieova?

Ia ati aʻe oe ma isi sui faamaoni o le aiga. Ia faapisi le mafaufau i meafai faaleagaga. Ia nofo sauni e fesoasoani i isi. Ia tumau pea le faamoemoe o le a iai se aso e ono toe foʻi mai ai lē pele. Aua le tuuaʻia fua oe. Ia amanaʻia le faatulagaga a Ieova mo aʻoaʻiga, ma faaleo atu ou faalogona i ni uō.—9/1, itulau 18-21.

• O ā auala e lua ua fesoasoani le Tusi Paia e mātaulia ai “aso e gata ai”?

Na valoia i le Tusi Paia mea o le a tutupu a o faagasolo le “gataaga o le lalolagi.” (Mataio 24:3, 7, 8; Luka 21:11) O loo faamatalaina ai foʻi suiga i amioga ma gaoioiga a tagata o loo ola i “aso e gata ai.” (2 Timoteo 3:1-5) O le itu e mataʻina ai, e ao ona talaʻiina atu le tala lelei o le Malo i lenei taimi.—9/15, itulau 4-6.

• O le ā e ao ona faia e le faapotopotoga pe a lavea se taavale na aveina e se Kerisiano, ma iʻu ina maliliu ai nisi?

E ono manatu toeaina o loo iloiloina le mataupu, e lē o nofosala le avetaavale ona sa faigatā pe leai sana mea na mafai i tulaga na iʻu ai i le faalavelave matuiā. Ae a faamaonia le nofosala i le toto ma ua salamō le tagata, ua tatau la iā te ia ni aʻoaʻiga mai le Tusi Paia ma taofia ni ona faaeaga i le faapotopotoga.—9/15, itulau 30.

• Aiseā e lē faalagolago ai le mauaina o le ola e faavavau i mea ua taulau manuia ai saienitisi?

Ua faia e saienitisi ni taumafaiga ina ia faaumi atu le ola, e pei o le taumafai e faatele le taimi lea e faafouina ai sela o le tino, po o le suia o totoga o se tagata i ni totoga fou e matuā fetaui lelei. Ae ua faailoa mai i le Tusi Paia e na o le pau le auala e maua ai e tagata le ola e faavavau, o le taulaga a Iesu.—10/1, itulau 3-5.

• Po o le faamamāina faaletapuaʻiga a Iutaia, o se faataʻimuaga lea o le papatisoga faa-Kerisiano?

E leai. Sa faia e tagata Iutaia le faamamāina mo i latou lava, lea e leʻi faia i le papatisoga o Ioane. E tusa ai ma le Tulafono a Mose, sa tatau ona faamamā le tagata tapuaʻi i taimi uma lava, ae e na o le tasi le taimi e faia ai le papatisoga faa-Kerisiano.—10/15, itulau 12-13.

• O le ā le Aʻoga mo Toleniga i le Faiva?

O se aʻoga e valu vaiaso le umi mo toeaina ma auauna o le faiva o loo nofo fua o le faapotopotoga, ma o loo i tulaga e tofia e galulue i le mea o loo tele ai se manaʻoga. Atonu i le faapotopotoga e latou te ō mai ai, o se isi vaipanoa i lenā lava atunuu, pe i se isi foʻi atunuu.—11/15, itulau 10-11.

• O le ā po o ai le anetikeriso lea o loo taʻua i le 1 Ioane 2:18; 4:3?

Pe a faalautele le manatu, e faasino atu le “anetikerio” i ē uma e tetee pe faapea mai ma le pepelo, o i latou o Keriso po o sui o Keriso. Ua faaalia i upu a Iesu ma Ioane, o le anetikeriso o se vaega tuufaatasi ua faia aʻe i le tele o anetikeriso taʻitasi, o ē ua faasalalau atu pepelo faalotu ma teena le Malo o le Atua.—12/1, itulau 4-6.