Lipoti a Ē Faalauiloa le Malo

Saʻilia o Tagata i o Latou Fale Faigaluega

O LE ā le tulaga sa tutusa uma ai aposetolo o Mataio, Peteru, Aneterea, Iakopo, ma Ioane? Sa valaaulia i latou uma lava e Iesu a o iai i a latou galuega. Sa pisi lava ia Peteru, Aneterea, Iakopo, ma Ioane i la latou pisinisi o le fai faiva ina ua valaauina i latou e Iesu, na ia faapea atu: “Inā mulimuli mai ia iā te aʻu.” Sa iai Mataio i lona ofisa o se ao lafoga ina ua valaauina e avea ma soo o Iesu.—Mataio 4:18-21; 9:9.

O le molimau atu i tagata i mea e faigaluega ai, e mafai ona fua mai. I le iloaina o lenei mea, na faia ai talu ai nei e Molimau i Iapani se taumafaiga filigā ina ia auai i lenei vala o le faiva. O ā ni iʻuga na maua ai? E na o ni nai masina, ae faitau afe ia toe asiga na faia, ma e tusa ma le 250 suʻesuʻega faale-Tusi Paia na amataina. Seʻi manatunatu i nei mea na tutupu.

Na feiloaʻi se faifeʻau faataimi atoa i Tokyo ma se pule o se faleʻaiga, o lē ua silia ma le 30 tausaga ua mavae talu ona talanoa ma se tama aʻoga o se Molimau. E ui lava e leʻi malamalama tele le pule i mea na ia faalogo ai i tuā i inā, ae sa avea o se mea na fiafia ai o ia i le Tusi Paia. O lea la ua toe faaolaola nei lona naunau, ma ua talia ma le fiafia se suʻesuʻega faale-Tusi Paia i le tusi, Le Poto e Taʻitaʻia ai i le Ola e Faavavau. * E lē gata i lea, na ia amataina sana lava polokalame o le faitauina o le Tusi Paia i pō uma a o leʻi moe.

Na asiasi atu se faifeʻau paeonia faapito i se ofisa. E ui lava e leʻi avanoa le pule, ae o le fafine talavou lea na taliina mai le telefoni a le pule, na fesili atu, “E te fia talanoa mai iā te aʻu?” Ina ua uma se talanoaga puupuu i le telefoni, na sau i fafo le fafine ma fai atu, e fiafia o ia e faitauina le Tusi Paia. Sa fuafua e le paeonia faapito e toe foʻi atu ma se Tusi Paia ma amataina se suʻesuʻega faale-Tusi Paia ma le fafine, sa faia i se paka e latalata ane i le taeao pō lava, a o leʻi amataina galuega.

I se isi ofisa, na iloa atu ai e se tamāloa o talia e se tagata la te faigaluega faatasi, le Olomatamata ma le Ala Mai! Ae ina ua alu ese le Molimau, sa vave ona ia lafoaʻiina ia mekasini. Ina ua oo le tamāloa i le fale, sa ia faamatala atu i lana avā le mea na ia vaai i ai ma faapea atu, ana o aʻu, ou te taliaina ia mekasini. O lona afafine lea na faalogo ane i le faamatalaga a lona tamā, sa ia faamatala atu lea mea i se Molimau o loo galueaʻiina lenā oganuu. Sa vave lava ona asiasi atu le Molimau i le tamāloa lea i lona ofisa ma amata ai se suʻesuʻega faale-Tusi Paia. Sa amata loa ona auai e lē aunoa le tamāloa i sauniga i le Aso Sa.

E iai foʻi isi aogā ua maua ona o le molimau atu i tagata i a latou galuega. E toʻatele tagata talaʻi i Iapani ua iloga le tomai i le faia o toe asiga i nofoaga o faatauga, fale faigaluega, ma ofisa. E lē gata i lea, e ala i lenei vala o le molimau atu, na mafai ai ona feiloaʻi atu i le toʻatele o tagata ua leva ona lē toe talaʻi, ma amataina ai ni suʻesuʻega faale-Tusi Paia ma i latou na. Na matuā maoaʻe lava iʻuga na maua ai. Talu ai nei lava, na lipotia mai ai e se tasi faapotopotoga i le ogatotonu o Tokyo ni suʻesuʻega faale-Tusi Paia se 108, ua faaluaina ai le aofaʻi na lipotia mai i le tausaga ua mavae.

[Faamatalaga pito i lalo]